ខេត្តកំពត ៖ ខណៈដែលដីនៅក្នុងក្រុងកំពត កំពុងមានតម្លៃគ្រប់ទីកន្លែង ជាពិសេសនៅតំបន់ជាប់មាត់សមុទ្រ និងតំបន់មាត់ទឹកតាមដៃព្រែកនានា ទើបបានជាមានក្រុមឈ្មួញដីនៅក្នុងក្រុងកំពត ដែលកំពុងត្រូវប៉ាន់ ក្នុងការដើរគួកជេដីសម្រាប់លក់ឲ្យឈ្មួញ ក្នុងតម្លៃមួយម៉ែត្រការ៉េពី៥០ដុល្លារ…
ខេត្តកំពត ៖ ខណៈដែលដីនៅក្នុងក្រុងកំពត កំពុងមានតម្លៃគ្រប់ទីកន្លែង ជាពិសេសនៅតំបន់ជាប់មាត់សមុទ្រ និងតំបន់មាត់ទឹកតាមដៃព្រែកនានា ទើបបានជាមានក្រុមឈ្មួញដីនៅក្នុងក្រុងកំពត ដែលកំពុងត្រូវប៉ាន់ ក្នុងការដើរគួកជេដីសម្រាប់លក់ឲ្យឈ្មួញ ក្នុងតម្លៃមួយម៉ែត្រការ៉េពី៥០ដុល្លារ ទៅ១០០ដុល្លារក៏មាន។
ជាមួយគ្នានេះ សម្រាប់អ្នកដែលមានដីស្នាក់នៅជាបណ្តោះអាសន្ន នៅតាមដងព្រែកកំពង់បាយ និងព្រែកវត្តត្រើយកោះ តភ្ជាប់ពីព្រែកស្ពានបេហ្សេអុី(BGI) ស្ថិតក្នុងក្រុងកំពត ដែលកន្លងមក អាជ្ញាធរក្រុងនិងមន្ត្រីជំនាញហាមឃាត់មិនឲ្យសង់សំណង់រឹងមាំ ព្រោះនាំឲ្យបាត់បង់សោភ័ណភាពក្រុង និងប៉ះពាល់ដល់បរិស្ថានឆ្នេរនោះ ឥឡូវនេះ ត្រូវបានអ្នកដែលកាន់កាប់បណ្តោះអាសន្ននោះ លក់ទៅឲ្យអ្នកផ្សេងជាច្រើនតំណ ។
រីឯអ្នកដែលហ៊ានទិញផ្ទះលើដីចំណីព្រែក ក៏បានសាងសង់លំនៅឋានដោយចាក់សសរបេតុងបុកគ្រឹះយ៉ាងរឹងមាំចុះទៅក្នុងទឹកព្រែកយ៉ាងអនាធិបតេយ្យ ដោយគ្មានការកោតញញើត នឹងច្បាប់ហាមឃាត់បន្តិចសោះឡើយ ។ ការសង់លំនៅឋានដោយគ្រឹះរឹងមាំ រំលោភលើដីចំណីព្រែកកំពុងកើតមានជាច្រើនកន្លែង នៅក្នុងក្រុងកំពត និងស្រុកទឹកឈូ ដែលមានព្រំប្រទល់ជាប់ក្រុងកំពតមានដូចជា នៅជាប់ស្ពានផែកំពង់កណ្តាល ស្ថិតក្នុងភូមិកំពង់កណ្តាល ឃុំជុំក្រៀល ស្រុកទឹកឈូ ព្រែកវត្តត្រើយកោះចំណុចខាងកើតអ៊ូទូកតាលី ស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុងកំពតជាដើម ។ ក្នុងចំណោមសំណង់ទាំងនេះ គេឃើញសំណង់ខ្លះកំពុងចាក់ដីចុះទៅក្នុងទឹកព្រែក ហើយរៀបខឿនថ្មយកដីចំណីព្រែក សំណង់ខ្លះកំពុងបុកគ្រឹះចាក់សសរបេតុងចុះទៅក្នុងទឹកព្រែកយ៉ាងជ្រៅផងដែរ ។
ទាក់ទិននឹងសកម្មភាពខាងលើនេះ កោះសន្តិភាពទាក់ទងសុំការបំភ្លឺពីលោក លាង រឿនសុទ្ធីអភិបាលក្រុងកំពត កាលពីព្រឹកថ្ងៃទី៦ កក្កដា លោកបានឲ្យដឹងថា ការសាងសង់សំណង់រឹងមាំរំលោភដីចំណីព្រែកនេះ គឺគ្មានច្បាប់ឯណាអនុញ្ញាតឲ្យបុគ្គលនោះសាងសង់ទេ ប៉ុន្តែបុគ្គលមួយចំនួនតូចនោះបានលួចសាងសង់ដោយគ្មានច្បាប់អនុញ្ញាតឡើយ ។ ចំពោះការសាងសង់សំណង់អត់ច្បាប់ខាងលើ កន្លងមកលោកបានចាត់ក្រុមការងាររបស់សាលាក្រុងកំពត ឲ្យចុះពិនិត្យមើលម្តងរួចមកហើយ ព្រមទាំងឲ្យមន្ត្រីជំនាញកោះអញ្ជើញម្ចាស់សំណង់មកសាលាក្រុងដើម្បីសុំច្បាប់សាងសង់ឲ្យបានត្រឹមត្រូវទៅតាមផ្លូវច្បាប់ ប៉ុន្តែមិនអនុញ្ញាតឲ្យសង់សំណង់រឹងមាំរំលោភចុះទៅក្នុងទឹកព្រែកឡើយ ។
លោកឲ្យដឹងទៀតថា បើបុគ្គលម្ចាស់សំណង់នៅតែរឹងទទឹងមិនគោរពច្បាប់ ដោយនៅតែសង់រំលោភចុះទៅក្នុងទឹកព្រែកបន្តទៀតនោះ លោកនឹងចាត់មន្ត្រីជំនាញដោយសហការជាមួយក្រុមការងារសាលាក្រុង មានវិធានការ៣ចំណុចនៅពេលខាងមុខ ៖
ទី១-កោះហៅម្ចាស់សំណង់មកណែនាំឲ្យបញ្ឈប់ការសាងសង់បន្ត ។
ទី២-ធ្វើកិច្ចសន្យាឲ្យឈប់សាងសង់រំលោភទៅក្នុងទឹកព្រែកបន្ត ។
ទី៣-បើនៅមិនគោរពសំណូមពររបស់សាលាក្រុងទេ នឹងរាយការណ៍ទៅថ្នាក់ខេត្តសុំយោបល់ ដើម្បីមានវិធានការរុះរើឬបំផ្លាញចោលនូវសំណង់ខុសច្បាប់ទាំងនោះ ។
ប្រជាពលរដ្ឋក៏ដូចជាមហាជនក្នុងក្រុងផងដែរ កំពុងរង់ចាំមើលថា តើចំណាត់ការរបស់លោកអភិបាលក្រុងធ្វើបានឬមិនបាន ចំពោះសំណង់អនាធិបតេយ្យនៅតាមឆ្នេរព្រែកក្នុងក្រុងទេសចរណ៍ដ៏ស្រស់ស្អាតមួយនេះ ។ គេនិយាយថា ការចាត់ការទាន់នៅតិចៗជាការល្អ ជាងលើកកម្លាំងទៅកម្ទេចចោល ហើយក៏អាចរារាំងអ្នករំលោភដទៃផងដែរ ៕
ចែករំលែកព័តមាននេះ