រាជធានីភ្នំពេញ ៖ ទោះបីជារាជរដ្ឋាភិបាល និងស្ថាប័នពាក់ព័ន្ធមួយចំនួន បានខិតខំប្រឹងប្រែងអំពាវនាវដល់ពលរដ្ឋឲ្យងាកមកប្រើប្រាស់ផលិតផលក្នុងស្រុកយ៉ាងណាក្ដី ក៏នៅតែមិនទាន់ទទួលបានជោគជ័យដូចការរំពឹងទុកនៅឡើយ បើធៀបនឹងការគាំទ្រផលិតផលបរទេសដែលនាំចូលមកលក់ក្នុងទីផ្សារកម្ពុជា។ កង្វះការគាំទ្រនេះ បើតាមមន្ត្រីជាន់ខ្ពស់ក្រសួងពាណិជ្ជកម្មបានលើកឡើងថា ដោយសារតែគុណភាពផលិតផលក្នុងស្រុកនៅមានកម្រិត ខណៈដែលតម្លៃប្រហាក់ប្រហែលនឹងផលិតផលនាំចូល ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍កន្លងមកថា ពលរដ្ឋខ្មែរនឹងងាកមកគាំទ្រ ហើយប្រើប្រាស់ផលិតផលខ្មែរកាន់តែច្រើននៅពេលដែលផលិតករ និងសហគ្រិនក្នុងស្រុក អាចផលិតទំនិញដែលមានគុណភាពខ្ពស់ ជាមួយតម្លៃសមរម្យ ប្រហាក់ប្រហែលនឹងទំនិញនាំចូលពីបរទេស ព្រោះនេះគឺជាកត្តាសត្យានុម័តនៃការប្រកួតប្រជែងទីផ្សារសេរី ។
លោករដ្ឋមន្ត្រីក៏បានអំពាវនាវឲ្យផលិតករ បន្តខំប្រឹងអភិវឌ្ឍន៍គុណភាពផលិតផលឲ្យបានកាន់តែប្រសើរថែមទៀត ដោយប្រើប្រាស់គំនិតច្នៃប្រឌិត ទាំងបច្ចេកទេសផលិត ការវេចខ្ចប់ ការដាក់ម៉ាក និងការកំណត់តម្លៃ ព្រមទាំងធ្វើយុទ្ធសាស្ត្រទីផ្សារ ដើម្បីអាចប្រកួតប្រជែងជាមួយទំនិញនាំចូលពីបរទេស ។
ជាមួយគ្នានេះ លោកបានលើកយកបញ្ហាប្រឈម និងលក្ខខណ្ឌដែលកម្ពុជាត្រូវបំពេញ ក្រោយចូលរួមនៅក្នុងសហគមន៍សេដ្ឋកិច្ចអាស៊ាន អំពីវិធានការរយៈពេលខ្លី ដែលរាជរដ្ឋាភិបាលកម្ពុជាកំពុងអនុវត្តដូចជា ការយកពន្ធ និងការប្រើប្រាស់ច្បាប់ពាណិជ្ជកម្ម ដើម្បីទប់ស្កាត់ការហូរចូលនូវប្រភេទទំនិញ ដែលអាចបង្កផលប៉ះពាល់ដល់សុខភាពប្រជាពលរដ្ឋ និងហានិភ័យចំពោះសេដ្ឋកិច្ចកម្ពុជា ។
លោកថា ៖« ដើម្បីឲ្យផលិតផលខ្មែរមានទីផ្សារខ្ពស់ ទាមទារឲ្យមានការចូលរួមពីគ្រប់ភាគីពាក់ព័ន្ធ ជាពិសេស ផលិតករ សហគ្រិន និងប្រជាជនខ្មែរទាំងអស់ ហើយរាជរដ្ឋាភិបាលកម្ពុជា ដែលមានក្រសួងពាណិជ្ជកម្មជាសេនាធិការ នឹងនៅតែបន្តស្វែងរកទីផ្សារថ្មីៗ និងគាំទ្រវិស័យឯកជនជានិច្ច » ។
បើតាមលោកស្រី កែវ មុំ នាយិកាក្រុមហ៊ុនផលិតនំស្រួយលីលី បានឲ្យដឹងកន្លងមកថា ការផលិតអស់ថ្លៃដើមច្រើនធ្វើឲ្យតម្លៃក៏ត្រូវតែខ្ពស់ដែរ ហើយរហូតមកដល់ពេលនេះសហគ្រិនភាគច្រើននៅកម្ពុជានៅតែជួបបញ្ហា ការផលិតអស់ថ្លៃដើមខ្ពស់ ទើបធ្វើឲ្យមិនអាចប្រកួតប្រជែងតម្លៃជាមួយផលិតផលមកពីប្រទេសក្រៅបាន ។
គួរកត់សម្គាល់ផងដែរថា ដើម្បីឲ្យពលរដ្ឋងាកមកប្រើផលិតផលខ្មែរឲ្យបានកាន់តែច្រើន ក្រសួងពាណិជ្ជកម្មតែងតែរៀបចំនូវយុទ្ធនាការទិញផលិតផលខ្មែរ ដែលជាផ្នែកមួយនៃគោលនយោបាយអភិវឌ្ឍន៍ទីផ្សារ និងបានអនុវត្តចាប់តាំងពីឆ្នាំ២០១៥មក ។ យុទ្ធនាការនេះ គឺជាសំឡេងជួង ដើម្បីដាស់ពញ្ញាក់ស្មារតីប្រជាពលរដ្ឋខ្មែរឲ្យងាកមកគាំទ្រ និងប្រើប្រាស់ទំនិញក្នុងស្រុក ជំនួសទំនិញនាំចូលពីបរទេស ។ ម្យ៉ាងទៀត យុទ្ធនាការនេះ ក៏មានគោលដៅជួយពង្រឹងសង្វាក់ផលិតកម្មក្នុងស្រុក បង្កើតឱកាសការងារ និងប្រាក់ចំណូលជូនប្រជាពលរដ្ឋ ព្រមទាំងផ្តល់ចំណេះដឹង និងបទពិសោធន៍ល្អៗដល់សហគ្រាសធុនតូច និងមធ្យម ដើម្បីផលិតទំនិញដែលមានគុណភាព សុវត្ថិភាព និងអនាម័យខ្ពស់ សម្រាប់ប្រកួតប្រជែងជាមួយទំនិញនាំចូលពីបរទេស ៕
ចែករំលែកព័តមាននេះ