រាជធានីភ្នំពេញ ៖ ភូមិព្រែកថ្មី ជាភូមិមួយក្នុងចំណោមភូមិចំនួន៣របស់សង្កាត់ព្រែកថ្មី ខណ្ឌច្បារអំពៅ ដែលជាប្រភពផ្គត់ផ្គង់ផ្កាម្លិះធំជាងគេនៅទីក្រុងភ្នំពេញ ។ នៅពេលធ្វើដំណើរឆ្លងកាត់ភូមិទាំងនេះ មិនថា នៅទីធ្លាខាងមុខ ឬខាងក្រោយផ្ទះទេ គឺហ៊ុមព័ទ្ធដោយចម្ការផ្កាម្លិះដែលបានចោលក្លិនក្រអូបឈ្ងុយឈ្ងប់ និងគួរឲ្យគយគន់ ។
កំពុងបេះផ្កាបណ្ដើរ អ៊ំស្រី សាន គឹមសួ មានវ័យ៦០ឆ្នាំ បានប្រាប់កោះសន្ដិភាពថា គាត់បានប្រកបរបរដាំផ្កាម្លិះនេះអស់រយៈពេល៣០ឆ្នាំមកហើយ ក្នុងទំហំផ្ទៃដី២៥ម៉ែត្រគុណនឹង៨០ម៉ែត្រ ដែលបានផ្ដល់ចំណូលប្រចាំថ្ងៃដល់ក្រុមគ្រួសារ ។ អ៊ំស្រីគឹមសួ និយាយថា ៖« ផ្កាម្លិះនេះ គឺជាជីវិតប្រចាំថ្ងៃរបស់ខ្ញុំ ហើយដើមម្លិះផ្តល់ផ្កាជារៀងរាល់ថ្ងៃ ដូច្នេះ វាក៏ផ្តល់នូវចំណូលរាល់ថ្ងៃសម្រាប់គ្រួសារខ្ញុំដែរ » ។
អ៊ំស្រីបន្ដថា ដំណាំម្លិះមានផ្កាគ្រប់រដូវ ប៉ុន្ដែរដូវប្រាំងមានផ្កាច្រើនជាងរដូវវស្សា ។ ចំណែកតម្លៃវិញ គឺអាស្រ័យលើរដូវដែរ ប្រសិនបើរដូវផ្កាសម្បូរខ្លាំងអាចធ្លាក់មកនៅត្រឹម៣ទៅ៤ម៉ឺនរៀលក្នុង១គីឡូក្រាម ប៉ុន្ដែបើរដូវខ្សត់ផ្កា អាចហក់ឡើងដល់១០ម៉ឺនរៀលដែរ ។
អ៊ំស្រីនិយាយថា ៖« តម្លៃផ្កាម្លិះវាអាស្រ័យតែលើមាត់ឈ្មួញទេ ។ ពេលរដូវប្រាំង ម្លិះចេញផ្កាច្រើន យើងលក់១គីឡូក្រាមបានពី៣ម៉ឺនទៅ៤ម៉ឺនរៀល ។ ចំណែកខែវស្សា ម្លិះមិនសូវចេញផ្កា អាចឡើងដល់១០ម៉ឺនរៀលក្នុងមួយ១គីឡូ ហើយសព្វថ្ងៃនេះ លក់បានតម្លៃ៨ម៉ឺន ទៅ៩ម៉ឺនរៀលក្នុង១គីឡូក្រាម ព្រោះជារដូវបុណ្យទានច្រើន » ។ អ៊ំស្រីបញ្ជាក់ថា ដំណាំនេះងាយស្រួលដាំ មិនពិបាកមើលថែ និងដាក់ជីដូចដំណាំផ្សេងៗនោះទេ ។
លើកឡើងស្រដៀងគ្នានេះដែរ លោក យឹម ណយ អាយុ៥៨ឆ្នាំ បានឱ្យដឹងថា ការដាំដើមម្លិះគឺជាមុខរបរតាំងពីជីដូនជីតាមក ប៉ុន្ដែបានអាក់ខានមួយរយៈធំ គ្រាដែលខ្មែរក្រហមបណ្តេញចេញ ។ ទោះបីយ៉ាងនេះក្ដី ក្រោយពីថ្ងៃរំដោះ ពួកគាត់បានវិលចូលមកស្រុកកំណើតវិញ ហើយចាប់ផ្ដើមដាំផ្កាម្លិះនៅក្នុងភូមិព្រែកថ្មីដដែល ។
លោក យឹម ណយ បញ្ជាក់ថា ៖« ដំណាំនេះងាយស្រួលដាំ ដោយត្រូវការស្រោចទឹកតែ២ដងប៉ុណ្ណោះក្នុង១សប្តាហ៍ ហើយពេលចេញផ្កា ត្រូវតែបេះជាប្រចាំ មិនអាចខានបានឡើយ។ ការបេះនេះមិនត្រូវឲ្យហួសម៉ោង១រសៀលទេ ប្រសិនបើហួសពេលបន្តិច ផ្កានឹងរីកធំធ្វើឲ្យតម្លៃធ្លាក់ចុះ ។ ក្នុងករណីបេះមិនទាន់ យើងជួលគេឲ្យបេះក្នុង១គីឡូ គេយកថ្លៃ៧.០០០រៀល » ។
ចំពោះទីផ្សារផ្កាម្លិះវិញ ម្ចាស់ចម្ការភាគច្រើនគឺលក់ឱ្យឈ្មួញកណ្តាលដែលដើរប្រមូលទិញនៅតាមផ្ទះស្រាប់ ។ ក្រៅពីលក់បោះដុំឲ្យឈ្មួញ ពួកគាត់ក៏បានឆ្លៀតក្រងជាភួង ដោយដឹកមកលក់នៅទីក្រុងនៅរៀងរាល់ថ្ងៃសីល ដើម្បីបានកម្រៃបន្ថែមទៀតផងដែរ ។
បច្ចុប្បន្ននេះ ពួកគាត់អាចបេះផ្កាម្លិះបាន២ទៅ៣គីឡូក្រាមក្នុងទំហំដី១ហិកតា ។ ចំណែកនៅរដូវប្រាំងវិញ ពួកគាត់អាចប្រមូលបានរហូតដល់២០ទៅ២៥គីឡូក្រាមក្នុងទំហំដីដូចគ្នានេះ ។
សង្កាត់ព្រែកថ្មីនៃខណ្ឌច្បារអំពៅ មានភូមិចំនួន៣ ក៏ប៉ុន្តែមានតែភូមិកោះក្របី និងភូមិព្រែកថ្មីទេ ដែលមានប្រជាពលរដ្ឋប្រកបរបរដាំផ្កាម្លិះសម្រាប់លក់ច្រើនជាងគេ ។
ដោយឡែក ភូមិចំពុះក្អែក មានការដាំដុះផ្កាម្លិះបន្តិចបន្តួច ក៏ប៉ុន្តែប្រជាពលរដ្ឋនៅទីនេះជំនួសមកវិញដោយការដាំចេក ស្វាយ ត្របែក និងដំណាំហូបផ្លែផ្សេងទៀត រួមទាំងបន្លែ ដែលបន្លែពីតំបន់នេះក៏បានចូលរួមចំណែកផ្គត់ផ្គង់តម្រូវការនៃទីផ្សារក្នុងក្រុងភ្នំពេញយ៉ាងសំខាន់ផងដែរ ។
នៅប្រទេសកម្ពុជា ផ្កាម្លិះ គឺជាប្រភេទបុប្ផាម្យ៉ាងដែលមានក្លិនក្រអូបស្រាល និងមានការពេញនិយមជាទីបំផុត ។ វាក៏ជាផ្កាដែលគេអាចប្រើសម្រាប់ប្រយោជន៍ច្រើនយ៉ាងផងដែរ ដូចជា គេអាចក្រងជាភួងផ្កាសម្រាប់ថ្វាយព្រះ, សម្រាប់ការសែនព្រេនដល់វត្ថុសក្តិសិទ្ធិជាទីសក្ការៈ និងសម្រាប់ពិធីស្រោចទឹក ឬពិធីសាសនាផ្សេងៗ ។ ហេតុដូច្នេះហើយបានជាការដាំដើមផ្កាម្លិះបានចារឹកជាវប្បធម៌ពិសេសមួយសម្រាប់អ្នកភូមិព្រែកថ្មី និងអ្នកភូមិកោះក្របី ៕
ចែករំលែកព័តមាននេះ