ខេត្តកណ្ដាល ៖ បុរសម្នាក់ស្រវឹងស្រា ព្រោះតែខឹងឪពុកមាទះកំផ្លៀងបានទាញកាំបិតបុ័ងតោ ដេញកាប់មិនបានទៅដុតផ្ទះខ្លួនឯងឆេះម៉ដ្ឋ រួមទាំងសម្ភារក្នុងផ្ទះ ហេតុការណ៍នេះកាលពីម៉ោង៣និង៤៥នាទីរសៀល ថ្ងៃទី០៨ កក្កដានេះ នៅភូមិថ្កុល ឃុំត្រើយស្លា ស្រុកស្អាង ។
មន្ត្រីនគរបាលស្រុកស្អាងបានឲ្យដឹងថា ជនដែលដុតផ្ទះត្រូវបាននគរបាលចាប់ខ្លួនឈ្មោះ ផល ទិត្យ ភេទប្រុស អាយុ២២ឆ្នាំ នៅភូមិថ្កុល ឃុំត្រើយស្លា ស្រុកស្អាងខេត្តកណ្តាល មុខរបរ កសិករ ។ ចំណែកម្ដាយជនរងគ្រោះឈ្មោះ កុក ស្រ៊ឺ ភេទស្រី អាយុ ៥៧ឆ្នាំនៅភូមិថ្កុល ឃុំត្រើយស្លា ស្រុកស្អាងខេត្តកណ្តាល មុខរបរកសិករ ។ សម្ភារដែលឆេះមានផ្ទះចំនួន១ខ្នង ធ្វើពីឈើប្រក់សង្ក័សីមានប្រវែងទទឹង៥ម៉ែត្រ បណ្តោយ៦ម៉ែត្រ ចានឆ្នាំង និងសំលៀកបំពាក់មួយចំនួនទៀត ។
នគរបាលបានឱ្យដឹងបន្ថែមថា មុនពេលកើតហេតុនៅថ្ងៃទី០៨ កក្កដា វេលាម៉ោងប្រហែល៨ព្រឹកឈ្មោះ ផល ទិត្យ (ជនសង្ស័យ) បានទៅចូលរួមកម្មវិធីបង្កក់កូនគេនៅផ្ទះឈ្មោះ ខាន់ ភេទប្រុស អាយុ២៩ឆ្នាំ នៅភូមិថ្កុល ឃុំត្រើយស្លា ស្រុកស្អាង ខេត្តកណ្តាល ។ រហូតដល់វេលាម៉ោង១១ថ្ងៃដដែលឈ្មោះ ផល ទិត្យ ត្រឡប់មកផ្ទះវិញមានសភាពស្រវឹងស្រា បានសុំលុយម្តាយទិញភេសជ្ជៈហូប ។ ទិញរួចឈ្មោះ ផល ទិត្យ បានត្រឡប់មកវិញ បានទាស់សម្តីជាមួយឈ្មោះ សូត្រ ស៊ីម (ត្រូវជាជីដូន) ហើយបានរើសដុំដីគប់ទៅលើឈ្មោះ សូត្រ ស៊ីម ឃើញដូចនោះឈ្មោះ ប៉ោ លីធី (ឪពុកមា) បានទៅឃាត់តែមិនព្រមស្តាប់ ក៏ទះមួយដៃត្រូវភ្នែកខាងឆ្វេង ឈ្មោះ ផល ទិត្យ ខឹងបានកាន់កាំបិតប៉័ងតោចំនួន២ រកកាប់ឈ្មោះ ប៉ោ លីធី តែឈ្មោះប៉ោ លីធី គេចបាត់រកមិនឃើញស្រាប់តែឈ្មោះ ផល ទិត្យ ខឹងខ្លាំងបានទៅដុតផ្ទះម្ដាយខ្លួនឯង ឈ្មោះកុក ស្រ៊ឺ ឆេះអស់ទាំងស្រុងតែម្ដង ។
ក្រោយទទួលបានព័ត៌មានកម្លាំងនគរបាលប៉ុស្តិ៍បានចុះដល់កន្លែងកើតហេតុធ្វើការឃាត់ខ្លួនជនសង្ស័យរួមទាំងវត្ថុតាង បញ្ជូនទៅអធិការស្រុក ដើម្បីអនុវត្តនីតិវិធី ៕
ចែករំលែកព័តមាននេះ