រាជធានីភ្នំពេញ ៖ ស្ត្រីពីរនាក់ម្តាយនិងកូនបានឌុបគ្នាទៅទិញម្ហូប ពេលធ្វើដំណើរជិតមកដល់ផ្សារត្រូវជនសង្ស័យប្លន់យកម៉ូតូ និងលុយជាង៤លានរៀល បង្កអោយមានការភ្ញាក់ផ្អើលកាលពីវេលាម៉ោង៤និង២០នាទីទៀបភ្លឺថ្ងៃទី៩ ខែកក្កដា នៅតាមបណ្ដោយផ្លូវបេតុង ភូមិជម្ពូវ័ន សង្កាត់ចោមចៅ៣…
រាជធានីភ្នំពេញ ៖ ស្ត្រីពីរនាក់ម្តាយនិងកូនបានឌុបគ្នាទៅទិញម្ហូប ពេលធ្វើដំណើរជិតមកដល់ផ្សារត្រូវជនសង្ស័យប្លន់យកម៉ូតូ និងលុយជាង៤លានរៀល បង្កអោយមានការភ្ញាក់ផ្អើលកាលពីវេលាម៉ោង៤និង២០នាទីទៀបភ្លឺថ្ងៃទី៩ ខែកក្កដា នៅតាមបណ្ដោយផ្លូវបេតុង ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។
ស្ត្រីជាជនរងគ្រោះទាំង២នាក់ខាងលើ ម្ដាយឈ្មោះ ណេត សំបូរ អាយុ៥២ឆ្នាំ មុខរបរលក់បាយនៅផ្ទះ រស់នៅភូមិព្រៃសណ្តែក សង្កាត់ចោមចៅ២ ខណ្ឌពោធិ៍សែនជ័យ និងកូនស្រីឈ្មោះ សេង សុភក្តិ ភេទស្រីអាយុ៣០ឆ្នាំ មុខរបរកម្មកររោងចក្រ រស់នៅជាមួយម្តាយ។ ចំណែកសម្ភារដែលបាត់បង់រួមមាន ម៉ូតូស្គូពីមួយគ្រឿង ពណ៍ក្រហម ស៊េរីឆ្នាំ២០១៤ ពាក់ស្លាកលេខ ភ្នំពេញ ១DY-៤៦១៣ ប្រាក់ជាង២លានរៀល និង៥០០ដុល្លារ ។
តាមប្រភពព័ត៌មានពីស្ត្រីជាម្តាយបាននិយាយប្រាប់ថា នៅមុនពេលកើតហេតុ ពួកគាត់បានចេញពីផ្ទះដោយកូនស្រីជាអ្នកឌុបគាត់ទៅទិញអីវ៉ាន់នៅផ្សារជម្ពូវ័ន លុះជិះម៉ូតូមកដល់ផ្លូវកាត់ម្តុំផ្ទះសំណាក់ខាងក្រោយវិទ្យាល័យជម្ពូវ័ន ស្រាប់តែមានជនសង្ស័យ៤នាក់ ជិះម៉ូតូ២គ្រឿង និងពាក់មួកសុវត្ថិភាព ធ្វើដំណើរស្របទិសគ្នាជាមួយគាត់ លុះមកដល់ផ្លូវស្ងាត់ ជនសង្ស័យទាំងនោះបានធ្វើសកម្មភាពឆក់កាបូបយួរពីគាត់ បណ្តាលឲ្យដួលម៉ូតូ ។
ស្ត្រីជាម្តាយបន្តទៀតថា ជនសង្ស័យម្នាក់បានចុះទាញកាបូបជាមួយគាត់ បន្ទាប់មកជនសង្ស័យម្នាក់ទៀតបានយកដំបងរកវាយស្ត្រីជាម្តាយ ដោយកូនស្រីឃើញជនសង្ស័យយកដំបងរកវាយម្តាយ ក៏បានស្រែកប្រាប់ម្តាយថា «ឱ្យកាបូបទៅគេទៅម៉ែ គេវាយឥឡូវហើយ» បន្ទាប់មកជនសង្ស័យបានយកកាបូបពីស្ត្រីជាម្តាយបានដោយសុវត្ថិភាព ភ្លាមៗនោះដែរជនរងគ្រោះទាំងពីរនាក់ម្តាយនិងកូនស្រីរត់ចេញពីម៉ូតូ ហើយត្រូវជនសង្ស័យលើកយកម៉ូតូជិះចេញទៅបាត់ដោយសុវត្ថិភាព បន្ទាប់មកទើបជនរងគ្រោះស្រែកអោយ ប្រជាពលរដ្ឋជួយ តែមិនមាននណាម្នាក់ជួយពួកគាត់ឡើយ ។
ក្រោយពេលកើតហេតុ ជនរងគ្រោះទាំងពីរនាក់ម្តាយនិងកូនស្រីបាននាំគ្នាជិះម៉ូតូកង់បីទៅដាក់ពាក្យបណ្តឹងនៅប៉ុស្តិ៍នគរបាលចោមចៅ៣ឲ្យជួយអន្តរាគមន៍ ៕
ចែករំលែកព័តមាននេះ