BBCផ្សាយកាលពីពេល ថ្មីៗកន្លងមកថានៅអាហ្វ្រិកខាងត្បូងស្ត្រីមិនស្គាល់ឈ្មោះម្នាក់ បានដឹងខ្លួននៅក្នុងបន្ទប់រក្សាទុកសព ក្រោយពីរងគ្រោះថ្នាក់ចរាចរណ៍នៅលើដងផ្លូវ កាលពីថ្ងៃទី២៤ មិថុនា ២០១៨ បង្កឲ្យមានអ្នកស្លាប់ចំនួន២នាក់ ។
រថយន្តសង្គ្រោះបន្ទាន់នៅកន្លែងកើតហេតុបញ្ជាក់ថា ក្នុងពេលត្រួតពិនិត្យលើខ្លួនប្រាណរបស់នាងឃើញថាគ្មានដង្ហើមទេ និងបញ្ជូនទៅរក្សាទុកក្នុងបន្ទប់សាកសព ប៉ុន្តែនៅពេលបុគ្គលិកក្នុងបន្ទប់រក្សាទុកសពត្រួតពិនិត្យជាថ្មី បែរជាឃើញថានាងនៅរស់ ។
បច្ចុប្បន្នបានបញ្ជូនទៅមន្ទីរពេទ្យនៅក្រុង«ចូហាន់ណេស្បើក »ដើម្បីត្រួតពិនិត្យ និងព្យាបាល ខណៈពេលសមត្ថកិច្ចកំពុងស៊ើបអង្កេតរកមូលហេតុពីការមានកំហុសឆ្គងលើករណីនេះ ។
មិនមែនជាលើកដំបូងនៅក្នុងឆ្នាំនេះទេ ដែលមានមនុស្សដឹងខ្លួននៅក្នុងបន្ទប់រក្សាទុកសព កាលពីខែមករាកន្លងមកអ្នកទោសម្នាក់នៅអេស្ប៉ាញបានដឹងខ្លួន មុនពេលធ្វើកោសល្យវិច័យលើសព ក្រោយពីគ្រូពេទ្យ៣នាក់បញ្ជាក់ថាគេបានស្លាប់ ។
ដោយឡែកនៅអាហ្វ្រិកខាងត្បូង កាលពី៧ឆ្នាំមុន ក៏មានបុរសអាយុ៥០ឆ្នាំម្នាក់ បានដឹងខ្លួននៅក្នុងបន្ទប់រក្សាទុកសពនៅក្រុងEastern Cape ។ ចំណែកនៅឆ្នាំ២០១៦ក៏មានអ្នកស្លាប់ពីគ្រោះថ្នាក់ចរាចរណ៍បានដឹងខ្លួននៅព្រឹកថ្ងៃបន្ទាប់ក្រោយពេលកើតហេតុ ៕
ចែករំលែកព័តមាននេះ