រាជធានីភ្នំពេញ ៖ បុរសម្នាក់មានវិបត្តិផ្លូវចិត្តបន្ទាប់ពីរូបគាត់ប្រើប្រាស់គ្រឿងញៀន និងរករឿងប្រពន្ធ ញឹកញាប់ពេក ធ្វើឲ្យប្រពន្ធអស់និស្ស័យរស់នៅជាមួយលែងកើត សម្រេចចិត្តរត់ចោលតែម្ដង។ បន្ទាប់មកបានធ្វើឲ្យបុរសនេះខូចចិត្តយ៉ាងខ្លាំងរហូតគិតខ្លីលែងចង់រស់នៅតទៅទៀតក៏សម្រេចចិត្តធ្វើអត្តឃាតដោយយកប្រេងសាំងចាក់ស្រោចខ្លួនរួចដុតសម្លាប់ខ្លួនឯង។ ប៉ុន្តែមិនបានបណ្ដាលឲ្យស្លាប់ តាមបំណងឡើយ ព្រោះត្រូវបានប្រជាពលរដ្ឋនៅជិតនោះជួយពន្លត់ទាន់ និងហៅរថយន្តសង្គ្រោះអង្គភាព ៧១១ ដឹកយកទៅកាន់មន្ទីរពេទ្យព្រះកុសុមៈដើម្បីសង្គ្រោះបន្ទាន់ភ្លាមៗដែរ។
ហេតុការណ៍នេះបានកើត ឡើង កាលពីវេលាម៉ោង៥ និង៤៥នាទីល្ងាច ថ្ងៃទី៨ ខែកក្កដា ឆ្នាំ២០១៨ នៅខាងក្រោយសាលា បឋមសិក្សា ជម្ពូវ័ន ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ តាមប្រភពព័ត៌មានបានឲ្យដឹងថា បុរសដែលព្យាយាមដុតសម្លាប់ខ្លួននេះឈ្មោះ ព្រំ ដាវិន អាយុ៣៥ឆ្នាំ មានទីលំនៅក្នុងភូមិកើតហេតុខាងលើ ហើយបានរងរបួសធ្ងន់ធ្ងរណាស់។ នៅមុនពេលកើតហេតុ គេបានឃើញ បុរសនេះយកដបសាំងមកចាក់ស្រោចខ្លួនបន្ទាប់មកបានយកដែកកេះ ដុតខ្លួនបណ្ដាល ឲ្យឆាបឆេះយ៉ាងសន្ធោសន្ធៅតែម្ដង។
ប្រភពដដែលបានបន្តទៀតថា ខណៈនោះអ្នកជិតខាងមានការ ភ្ញាក់ផ្អើលយ៉ាងខ្លាំងហើយបាននាំគ្នាជួយពន្លត់រហូតរលត់ទៅវិញ បន្ទាប់មកបានហៅរថយន្តសង្គ្រោះ អង្គភាព៧១១ ទៅដឹកយកទៅសង្គ្រោះបន្ទាន់នៅមន្ទីរពេទ្យព្រះកុសុមៈ។ មូលហេតុដែលបុរសនេះ ព្យាយាមធ្វើអត្តឃាតដុតសម្លាប់ខ្លួនបែបនេះក៏ព្រោះតែគាត់ពិបាកចិត្តមួយរយៈពេលមកហើយ ដោយសារតែប្រពន្ធរត់ចោល។ ម្យ៉ាងទៀតរឿងដែលប្រពន្ធរត់ចោលព្រោះតែអស់និស្ស័យ រស់នៅជាមួយ គាត់ ដោយគាត់ប្រើប្រាស់គ្រឿងញៀន ហើយតែងតែរករឿងប្រពន្ធញឹកញាប់ពេក។
ពេលនេះមិនទាន់ដឹងថា គាត់អាចគេចផុតពីសេចក្ដីស្លាប់ ឬអត់នៅឡើយទេ ព្រោះរបួសធ្ងន់ធ្ងរណាស់ ហើយក្រុមគ្រូពេទ្យកំពុងជួយសង្គ្រោះបន្ទាន់ ទោះជាបែបណាក៏សូមជូនពរឲ្យគាត់រួចផុតពីគ្រោះថ្នាក់ដល់ជីវិតទៅចុះ៕
https://youtu.be/rc2Gnyl8Cus
ចែករំលែកព័តមាននេះ