ប្រទេសថៃ ៖ ថ្ងៃទី៨ ខែកក្កដា ឆ្នាំ២០១៨ នេះជាថ្ងៃដ៏ពិសេសបំផុត ដោយប្រតិបត្តិការនាំកុមារ១២នាក់ និងគ្រូបង្វឹកបាល់ទាត់ពួកគេ ជាប់ក្នុងរូងភ្នំទឹកលិចចាប់តាំងពី១៥ថ្ងៃមកហើយនៅថៃ ទីបំផុតចាប់ផ្ដើមនាថ្ងៃទី៨ កក្កដានេះហើយ។
ក្រោយរយៈពេលច្រើនថ្ងៃនៃការពន្យារពេល មកពីគ្រោះថ្នាក់ខ្លាំងបំផុតជាមួយការត្រូវធ្វើដំណើរប្រើពេលយូរដោយមុជទឹក ក្មេងទាំងនេះត្រូវត្រៀមប្រឈមគ្រប់ឧបសគ្គ។ នេះជាការអះអាងរបស់លោក NARONGSAK OSOTTANAKORN ប្រមុខប្រតិបត្តិការជួយសង្គ្រោះ ក្នុងសន្និសីទសារព័ត៌មានមួយ។
អ្នកទទួលខុសត្រូវរូបនោះបានបញ្ជាក់ថា កុមារដំបូងគេត្រូវនាំចេញនាវេលាម៉ោង២១យប់ម៉ោងក្នុងស្រុក។ ហើយលោកប្រកាសពីការចេញដំណើរទៅរកកុមារទាំងនោះរបស់អ្នកឯកទេសកម្រិតពិភពលោកចំនួន១៣នាក់ ដែលមកពីប្រទេសមានឯកទេសខាងគុហាវិទ្យា។
រហូតមកទល់ពេលនេះ គេត្រូវប្រើពេលដល់ទៅ១១ម៉ោងសម្រាប់អ្នកមុជទឹកពូកែម្នាក់ទៅឲ្យដល់កុមារទាំង១២នាក់ហើយត្រឡប់មកវិញ គឺ៦ម៉ោងទៅនិង៥ម៉ោងមក។ ផ្លូវនាំពួកគេចេញមានប្រវែងជាច្រើនគីឡូម៉ែត្រ កាត់ច្រកប្រកបដោយគ្រោះថ្នាក់ក្រោមទឹក។ក្នុងចំណោមកុមារទាំងនេះដែលមានអាយុពី១១ទៅ១៦ឆ្នាំ មួយភាគធំពុំចេះហែលទឹកហើយពុំមាននរណាម្នាក់ធ្លាប់មុជទឹកឡើយ។
សម្រាប់ពេលនេះក្រុមជួយសង្គ្រោះវិនិច្ឆ័យថា បណ្ដាលក្ខខណ្ឌសម្រាប់នាំមនុស្សចេញមានលក្ខណៈប្រសើរបំផុត ពិសេសទាក់ទិនដល់កម្រិតទឹកក្នុងរូង។ កាលពីថ្ងៃទី៧ កក្កដា កុមារទាំង១២នាក់ជាប់ក្នុងរូងភ្នំ១៥ថ្ងៃមកហើយ បានផ្ញើសំបុត្រតាមពួកអ្នកជួយសង្គ្រោះមកកាន់ឪពុកម្ដាយពួកគេ ចំណែកពួកអ្នកជួយសង្គ្រោះលើកពីការប្រើពេល៣ទៅ៤ថ្ងៃ ដើម្បីនាំពួកគេចេញមុនពេលភ្លៀងធ្លាក់ថ្មីៗ។
ពួកអ្នកជួយសង្គ្រោះបានតទុយោជាច្រើនគីឡូម៉ែត្រ ដើម្បីបញ្ចូលអុកស៊ីហ្សែនចូលទៅកាន់កន្លែងដែលក្រុមនេះរត់ទៅ។ ហើយកម្រិតអុកស៊ីហ្សែនមានគ្រប់គ្រាន់ក្នុងរូងភ្នំ ក៏ប៉ុន្តែកម្រិតអុកស៊ីតដឹកាបោន គឺជាកត្តាមួយទៀតដែលត្រូវគិតដល់។
កាលពីយប់ថ្ងៃទី៧ កក្កដា មានភ្លៀងធ្លាក់កន្លះម៉ោង ដែលនាំឲ្យគេប្រញាប់ប្រញាល់នាំក្មេងៗចេញពីរូងនោះ ពេលនោះក៏មានអ្នកកាសែតដល់ទៅរូងភ្នំនោះជាង១១០០នាក់ ហើយក្រាញ់ននៀលចាំយកព័ត៌មានពីការនាំក្មេងចេញនេះ៕
ចែករំលែកព័តមាននេះ