រាជធានីភ្នំពេញ ៖ បុរសម្នាក់មានទំនាស់ជាមួយប្រពន្ធ ប៉ុន្តែពុំមាននរណាម្នាក់បានដឹងថា ផ្ដើមចេញពីរឿងអ្វីនោះឡើយ ស្រាប់តែបុរសនេះបានកាប់ប្រហារទៅលើស្ត្រីជាប្រពន្ធ បណ្ដាលឲ្យរងរបួសធ្ងន់ធ្ងរ ។ ហេតុការណ៍ខាងលើនេះបានកើតឡើង កាលពីវេលាម៉ោង១២និង៤០នាទីរសៀល ថ្ងៃទី០៨ ខែកក្កដា ឆ្នាំ២០១៨ នៅក្នុងបន្ទប់ជួល ស្ថិតនៅក្នុងភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ខណៈនោះអ្នកជិតខាងមិនបានដឹងភ្លាមៗនោះឡើយ ចំណែកជនដៃដល់ដែលជាប្ដី ក្រោយកាប់ប្រពន្ធរួច បានបីនាងចេញពីបន្ទប់ ហើយមុនដំបូងស្មានថា នាងខ្យល់គ ប៉ុន្តែពេលសួរនាំទើបដឹងថា នាងត្រូវប្ដីកាប់ ហើយមិនមាននរណាហ៊ានឃាត់ខ្លួនប្ដីឡើយ បន្ទាប់មកប្ដីកំណាចបានរត់គេចខ្លួនបាត់ស្រមោល ។
ជនសង្ស័យដែលបានកាប់ប្រហារប៉ុនប៉ងសម្លាប់ប្រពន្ធរបស់ខ្លួននោះត្រូវបានស្គាល់ហើយឈ្មោះ ហន រិទ្ធី ភេទប្រុស អាយុ២៨ឆ្នាំ មុខរបរកម្មករសំណង់ មានស្រុកកំណើត ភូមិវាលពន់ ឃុំព្រៃមិច ស្រុកថ្ពង ខេត្ដកំពង់ស្ពឺ ។ ចំណែកប្រពន្ធដែលជាជនរងគ្រោះត្រូវបានគេស្គាល់តាមរយៈកាតការងារមានឈ្មោះ ត្រេន ពៅ អាយុ៣៣ឆ្នាំ មុខរបរជាកម្មការិនីរោងចក្រកាត់ដេរ ស្នាក់នៅក្នុងបន្ទប់ជួល បានរងរបួសក្បាល និងកញ្ចឹង.កជាច្រើនកន្លែង មិនតែប៉ុណ្ណោះនៅក្នុងបន្ទប់នោះមានឈាម និងសក់ក្បាលរបស់ស្ត្រីរងគ្រោះដោយសារប្ដីកាប់ដាច់ ហើយក៏បន្សល់ទុកនៅកាំបិតផ្គាក់មួយនៅក្បែរថ្លុកឈាមនោះផងដែរ ។
អ្នកជិតខាងបាននិយាយថា ពួកគាត់មិនបានដឹងថា ប្ដីប្រពន្ធ១គូនេះមានទំនាស់គ្នា ព្រោះតែរឿងអ្វីទេព្រោះមិនបានឮអ្នកទាំង២ទាស់គ្នាឡើយ ដោយនៅក្នុងបន្ទប់ស្នាក់នៅរបស់ពួកគេមានការស្ងប់ស្ងាត់ជាធម្មតា ។
ដោយឡែកនៅមុនពេលមានការភ្ញាក់ផ្អើលពុំមាននរណាបានដឹងថា បុរសនេះដាច់ចិត្តកាប់ប្រហារប្រពន្ធបែបនេះដែរ ប៉ុន្តែរហូតដល់ពេលកើតហេតុ ស្រាប់តែឃើញបុរសជាប្ដីបីប្រពន្ធចេញពីក្នុងបន្ទប់ដោយនាងស្ថិតនៅក្នុងអាការៈធ្ងន់ធ្ងរទៅហើយ ។
ប្រភពដដែលបានបន្តទៀតថា ភ្លាមៗនោះពួកគាត់ស្មានថា នាងខ្យល់គក៏នាំគ្នាសួរ ហើយខណៈនោះបុរសជាប្ដីមិនបានឆ្លើយតបទេ ប៉ុន្តែនាងជាប្រពន្ធបាននិយាយតិចៗថា ត្រូវប្ដីកាប់ ។ បន្ទាប់មកប្ដីនោះបានបីប្រពន្ធទៅកាន់គ្លីនិកជិតនោះ ប៉ុន្តែដោយសារតែរបួសធ្ងន់ពេកអ្នកជិតខាងបាននាំគ្នាហៅម៉ូតូរ៉ឺម៉កកង់បី ដើម្បីដឹកយកទៅកាន់មន្ទីរពេទ្យ ។ ហើយឆ្លៀតពេលនោះជនដៃដល់ជាប្ដីបានរត់គេចខ្លួនបាត់ស្រមោលមិនមាននរណាហ៊ានឃាត់ខ្លួននោះឡើយ លុះក្រោយមកទើបរាយការណ៍ជូននគរបាលឲ្យចុះទៅធ្វើការស្រាវជ្រាវ ដើម្បីចាប់ខ្លួនជននេះចាត់ការតាមច្បាប់ ដោយឡែកនាងរងគ្រោះបានសន្លប់បាត់ស្មារតីមិនអាចនិយាយកើតឡើយ ៕
ចែករំលែកព័តមាននេះ