រាជធានីភ្នំពេញ ៖ បុរសម្នាក់ស្លាប់ភ្លាមៗនៅនឹងកន្លែងកើតហេតុ បន្ទាប់ពីរថយន្តបែនបើកឆ្លងផ្លូវមកបុកម៉ូតូក្នុងទិសដៅបញ្ច្រាសទិសគ្នាចំពីមុខពេញទំហឹង បង្កការឱ្យមានការភ្ញាក់ផ្អើលកាលពីវេលាម៉ោង៧និង៥០នាទីយប់ថ្ងៃទី៧ ខែកក្កដា ឆ្នាំ២០១៨ ស្ថិតនៅលើកំណាត់ផ្លូវជាតិលេខ៣ ភូមិព្រៃកី ខ…
រាជធានីភ្នំពេញ ៖ បុរសម្នាក់ស្លាប់ភ្លាមៗនៅនឹងកន្លែងកើតហេតុ បន្ទាប់ពីរថយន្តបែនបើកឆ្លងផ្លូវមកបុកម៉ូតូក្នុងទិសដៅបញ្ច្រាសទិសគ្នាចំពីមុខពេញទំហឹង បង្កការឱ្យមានការភ្ញាក់ផ្អើលកាលពីវេលាម៉ោង៧និង៥០នាទីយប់ថ្ងៃទី៧ ខែកក្កដា ឆ្នាំ២០១៨ ស្ថិតនៅលើកំណាត់ផ្លូវជាតិលេខ៣ ភូមិព្រៃកី ខ សង្កាត់ពងទឹក ខណ្ឌដង្កោ ។
ជនរងគ្រោះដែលស្លាប់ឈ្មោះខាយ កំសេន ភេទប្រុស អាយុ២៧ឆ្នាំ មុខរបរជាងភ្លើង ស្នាក់នៅផ្ទះជួលក្នុងសង្កាត់ទួលសង្កែ ខណ្ឌឫស្សីកែវ មានស្រុកកំណើត ភូមិស្រឡូងទី១ ឃុំអង្គរទ្រេត ស្រុកស្វាយអន្ទរ ខេត្តព្រៃវែង ។ ម៉ូតូមួយគ្រឿងរបស់ជនរងគ្រោះម៉ាកហុងដា សេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ ១CN-០៩៧០ ។ ចំណែករថយន្តបង្ក ត្រូវបានប្រជាពលរដ្ឋអះអាងថាជារថយន្តបែនកង់៦ ក្រោយកើតហេតុបានបើកគេចទៅបាត់ ។
តាមប្រភពនៅកន្លែងកើតហេតុបានឲ្យដឹងថា មុនកើតហេតុ រថយន្តបង្កបើកពីជើងទៅត្បូង លុះដល់ចំណុចកើតហេតុបានបត់ឆ្លងផ្លូវក៏ជ្រុលទៅបុកចំពីមុខម៉ូតូជនរងគ្រោះដែលបើកបរក្នុងទិសដៅពីត្បូងទៅជើង បណ្តាលឲ្យអ្នកបើកបរម៉ូតូបោកក្បាលធ្លាយខួរស្លាប់ភ្លាមៗនៅកន្លែង រីឯម៉ូតូខ្ទេចមួយកំណាត់មុខ ចំណែករថយន្តបង្កបានបើកកាត់តាមផ្លូវបេតុងក្នុងភូមិគេចខ្លួនបាត់ស្រមោល ។
ដោយពលរដ្ឋមិនអស់ចិត្ត ឃើញនៅស្រស់ៗពេក បានហៅរថយន្តសង្គ្រោះ១១៩ដើម្បីមកពិនិត្យជាក់ស្តែង ក្រោយពេលពិនិត្យឃើញថាជនរងគ្រោះបានស្លាប់បាត់ទៅហើយ និងបានរាយការណ៍ប្រាប់សមត្ថកិច្ចឱ្យចុះមកពិនិត្យកន្លែងកើតហេតុ ។
ក្រោយកើតហេតុ សពជនរងគ្រោះត្រូវបានសមត្ថកិច្ចស្រាវជ្រាវរកសាច់ញាតិ ដើម្បីមកទទួលយកសពទៅធ្វើបុណ្យតាមប្រពៃណីនៅឯស្រុកកំណើត ។ រីឯម៉ូតូ ត្រូវបានសមត្ថកិច្ចយកទៅរក្សាទុកជាបណ្តោះអាសន្នរង់ចាំប្រគល់ជូនសាច់ញាតិវិញនៅពេលក្រោយ ៕
ចែករំលែកព័តមាននេះ