រាជធានីភ្នំពេញ ៖ បន្ទាប់ពីសារព័ត៌មានកោះសន្តិភាពបានចុះផ្សាយថា ប្រព័ន្ធលូបង្ហូរទឹកធំមួយខ្សែមានមុខកាត់១ម៉ែត្រលាតសន្ធឹងក្នុងភូមិឬស្សី ភូមិឬស្សី៣ និងភូមិនានាក្នុងសង្កាត់ស្ទឹងមានជ័យ២ ខណ្ឌមានជ័យត្រូវបានអ្នកបច្ចេកទេសចុះដាក់ខុសលក្ខណៈបច្ចេកទេស ដោយមិនឃើញមានមន្ត្រីជំនាញណាចុះត្រួតពិនិត្យត្រូវបានប្រជាពលរដ្ឋរស់នៅអមសងខាងរអ៊ូរទាំ តាំងពីដើមភូមិដល់ចុងភូមិ ចំពោះក្រុមកម្មករទទួលម៉ៅការបានទារលុយថ្លៃភ្ជាប់បណ្តាញលូចូលផ្ទះ និងទារលុយថ្លៃចាក់បំពេញដីខ្សាច់នៅមុខផ្ទះក្នុងតម្លៃចាប់ ពី៣ម៉ឺនទៅ៥ម៉ឺនរៀលក្នុង១ឡានដូចត្រីងៀតពងនោះត្រូវបានអាជ្ញាធររាជធានីភ្នំពេញបញ្ជាផ្ទាល់ទៅក្រុមហ៊ុនទទួលម៉ៅការឲ្យមានការកែសម្រួលបច្ចេកទេស និងបញ្ឈប់ការយកលុយពីប្រជាពលរដ្ឋជាបន្ទាន់។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យកោះសន្តិភាពដឹងតាមរយៈទូរស័ព្ទនៅថ្ងៃទី០៨ ខែកក្កដា ឆ្នាំ២០១៨នេះថា បន្ទាប់ពីទទួលបានព័ត៌មានខាងលើនេះភ្លាមលោកបានចាត់មន្ត្រីជំនាញចុះពិនិត្យជាក់ស្តែងនូវតាំងដាក់លូនោះ។
លោក បានទទួលស្គាល់ថា ការដាក់លូនោះមានចំណុចខ្វះខាតខ្លះដែលជាការធ្វេសប្រហែសរបស់ក្រុមកម្មករ ប៉ុន្តែទោះជាយ៉ាងណាលោកបានណែនាំឲ្យក្រុមហ៊ុនទទួលម៉ៅការនោះបានកែសម្រួលឡើងវិញ និងឲ្យបញ្ឈប់ឲ្យកម្មករយកលុយពីប្រជាពលរដ្ឋជាបន្ទាន់ចាប់ពីពេលនេះតទៅ ៕
ចែករំលែកព័តមាននេះ