ខេត្តកំពង់ធំ ៖ករណីគ្រោះថ្នាក់ចរាចរណ៍បានកើតឡើងចំពោះករណីទី ១-បានកើតឡើងនៅវេលាម៉ោង២០និង០០នាទីយប់ថ្ងៃទី០៧ ខែកក្កដា ឆ្នាំ២០១៨ លើផ្លូវជាតិលេខ៦ ចន្លោះគីឡូម៉ែត្រលេខ១៤៧-១៤៨ ស្ថិតក្នុងភូមិជីមាឃ ឃុំកកោះ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍ខាងលើនេះបង្កឡើងដោយរថយន្តបុកម៉ូតូ ក្នុងទិសដៅផ្ទុយគ្នា បណ្តាលឲ្យស្លាប់មនុស្សម្នាក់ (ប្រុស) ជនរងគ្រោះជិះម៉ូតូ C125 ពណ៌ខ្មៅពាក់ស្លាក លេខកំពង់ធំ1F- 2955 (បើកបរក្នុងទិសដៅពីជើងទៅត្បូង) ដោយឈ្មោះ ជ័យ សុកជា ភេទប្រុស អាយុ២៦ឆ្នាំ រងរបួសធ្ងន់ ហើយត្រូវស្លាប់នៅពេលដែលបញ្ជូនទៅសង្គ្រោះនៅមន្ទីរពេទ្យ (មិនពាក់មួកសុវត្ថិភាព) ។ ចំណែករថយន្តបង្ក ពណ៌បៃតងចាស់ ស្លាកលេខ ភ្នំពេញ 2AK- 6360 (បើកបរទិសពីត្បូងទៅជើង) ដោយឈ្មោះ យ៉ យ៉ាំងថេរ ភេទប្រុស អាយុ៤៨ឆ្នាំ និងអ្នករួមដំណើរជាមួយឈ្មោះ យ៉ យ៉ាំងធី ភេទប្រុស អាយុ១៦ឆ្នាំ ត្រូវជាកូន អ្នកទាំងពីររស់នៅភូមិ ឃុំជាមួយគ្នា ក្នុងភូមិដៃនៀត ឃុំមេទឹក ស្រុកបាកាន ខេត្តពោធិ៍សាត់ ត្រូវបានឃាត់ខ្លួននាំទៅអធិការដ្ឋាននគរបាលស្រុកសន្ទុក) ។
រីឯអ្នករួមដំណើរនិងអ្នកបើកបររថយន្ត ហើយវត្ថុតាងយកមកកាន់អធិការដ្ឋាននគរបាលស្រុកសន្ទុកចាត់ការតាមនីតិវិធី ។ សមត្ថកិច្ចបញ្ជាក់ថា គ្រោះថ្នាក់ចរាចរណ៍ខាងលើមូលហេតុជាបឋមបង្កដោយអ្នកបើកបររថយន្តបើកមិនប្រកាន់ស្តាំ ។ ចំណែកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ។
ករណីទី២ – បានកើតឡើងនៅវេលាម៉ោង២០និង០០ដដែលថ្ងៃទី៧ ខែកក្កដា ឆ្នាំ២០១៨ នៅលើផ្លូវជាតិលេខ៦ ចន្លោះគីឡូម៉ែត្រលេខ៩៤-៩៥ ភូមិសូយោង ឃុំសូយោង ស្រុកបារាយណ៍ ខេត្តកំពង់ធំ បង្កដោយរថយន្តបុកអ្នកថ្មើរជើងក្នុងទិដៅស្របគ្នាពីត្បូងមកជើង បណ្តាលឲ្យស្លាប់មនុស្សម្នាក់(ប្រុស) ដែលរថយន្តបង្កពណ៌បៃតងចាស់ ពាក់ស្លាកលេខ ភ្នំពេញ 2I- 0766 អ្នកបើកបរមិនស្គាល់អត្តសញ្ញាណបានរត់គេចខ្លួនបាត់ បន្ទាប់ពីបង្កហេតុរួច ឯអ្នកថ្មើរជើង ឈ្មោះនិងអាសយដ្ឋានសមត្ថកិច្ចយើងនៅមិនស្គាល់អត្តសញ្ញាណនោះទេ ពីព្រោះគាត់ជាជនអនាថា បានស្លាប់នៅកន្លែងកើតហេតុ ។
វត្ថុតាងវិញរថយន្តយកមករក្សាទុកអធិការដ្ឋាននគរស្រុកបារាយណ៍ ចំណែកសពយកទៅតម្កល់ទុកនៅវត្តខ្លុយ ភូមិខ្លុយកើត ឃុំសូយោង ស្រុកបារាយណ៍ ដើម្បីស្វែងរកគ្រួសារ មូលហេតុជាបឋមបង្កពីអ្នកថ្មើរជើងដើរតាមផ្លូវ ខ្វះការប្រុងប្រយ័ត្ន ៕
ចែករំលែកព័តមាននេះ