បាងកក ៖ សុខភាពបេះដូងល្អ គឺជាកាដូមិនអាចកាត់ថ្លៃបានសម្រាប់ជីវិតលោកអ្នកយ៉ាងណាមិញការយល់ដឹងអំពីរបៀបនៃការរស់នៅល្អសម្រាប់សុខភាពបេះដូងរបស់លោកអ្នក គឺជារឿងដែលលោកអ្នកគួរអនុវត្ត ដើម្បីចៀសវាងបញ្ហាសុខភាពធ្ងន់ធ្ងរ ដែលអាចប៉ះពាល់ដល់អាយុជីវិត និងសេដ្ឋកិច្ចគ្រួសារផងដែរ ។
វេជ្ជបណ្ឌិត វិសុទ្ឋ វីវេកាភីរ៉ាត ( Dr. Visuit Vivekaphirat ) ឯកទេសជំងឺបេះដូងនៃមន្ទីរពេទ្យលំដាប់ផ្កាយ ៥ Bumrungrad International Hospital នៅទីក្រុងបាងកក ប្រទេសថៃ មានប្រសាសន៍ឲ្យដឹងថា ប្រសិនបើលោកអ្នកស្រលាញ់បេះដូងរបស់លោកអ្នក ហើយចង់បង្កើនសុខភាពបេះដូងរបស់អ្នកឲ្យល្អប្រសើរ ត្រូវកាត់បន្ថយកត្តាហានិយភ័យដែលប៉ះពាល់ដល់សុខភាពរបស់អ្នក ដូចជាការជក់បារី ទឹកនោមផ្អែម មានកូលេស្តេរ៉ុល សម្ពាធឈាមខ្ពស់ ទទួលទានជាតិអាកុលច្រើនជ្រុល និងស្ត្រេសជាដើម ។
គ្រូពេទ្យជំនាញបេះដូងនៅកម្ពុជា និងនៅថៃបានប្រាប់កោះសន្តិភាពពីវិធីរស់នៅដូចខាងក្រោមដើម្បីអោយបេះដូងមានសុខភាពល្អ ៖
១- បញ្ឈប់ការជក់បារី ៖ បើស្រលាញ់បេះដូងរបស់អ្នក និងចង់បង្កើនសុខភាពបេះដូង អ្វីដែលសំខាន់បំផុតដែលអ្នកអាចធ្វើដើម្បីបង្កើនសុខភាពបេះដូងរបស់អ្នក បើអ្នកទទួលទានបារីគឺអ្នកត្រូវតែបញ្ឈប់ការជក់បារី។
២- គ្រប់គ្រងសម្ពាធឈាម និងជាតិខ្លាញ់ កូលេស្តេរ៉ុល ៖ គ្រប់គ្រងសម្ពាធឈាម និងកូលេស្តេរ៉ុលរបស់អ្នក។ ប្រសិនបើអ្នកមានបញ្ហាមួយ ឬទាំងពីរខាងលើនេះខ្ពស់ អ្នកគួរជួបជាមួយគ្រូពេទ្យជំនាញ ព្រោះគ្រូពេទ្យអាចចេញវេជ្ជបញ្ជាសម្រាប់លោកអ្នកទទួលទានថ្នាំគ្រប់គ្រងនូវ សម្ពាធឈាមនិងកូលេស្តេរ៉ុល ក៏ដូចជាការ ផ្លាស់ប្តូររបបអាហារនិងឱសថរបស់អ្នក។ សូមសួរវេជ្ជបណ្ឌិតរបស់អ្នកថាតើអ្នកត្រូវការកម្រិតសម្ពាធឈាមនិងកម្រិតកូលេស្តេរ៉ុលតាមរបៀបណា។
៣- គ្រប់គ្រងជំងឺទឹកនោមផ្អែម ៖ ការធ្វើលំហាត់ប្រាណទៀងទាត់ ការញ៉ាំអាហារល្អ និងការសម្រកទម្ងន់ គឺទាំងអស់នេះជួយរក្សាកម្រិតជាតិស្ករនៅក្នុងឈាមក្នុងកម្រិតកាន់ល្អប្រសើរ។ មនុស្សជាច្រើនក៏ត្រូវការថ្នាំដើម្បីគ្រប់គ្រងជំងឺទឹកនោមផ្អែមរបស់ពួកគេដែរ ដូច្នេះត្រូវជួបគ្រូពេទ្យជំនាញដើម្បីទទួលទានថ្នាំគ្រប់គ្រងកម្រិតជាតិស្កររបស់លោកអ្នក។
៤- ត្រួតពិនិត្យសុខភាពជាទៀងទាត់ ៖ ការត្រួតពិនិត្យសុខភាពជាទៀងទាត់ គឺជួយលោកអ្នកឲ្យបានដឹងទាន់ពេលវេលានូវបញ្ហាណាមួយដែលអាចប៉ះពាល់ដល់សុខភាពបេះដូងរបស់អ្នក ។
៥- ហាត់ប្រាណ ៖ ការដើរ ៣០ នាទីក្នុងមួយថ្ងៃ និងអនុវត្ត ៥ថ្ងៃ ក្នុងមួយសប្តាហ៍ អាចបង្កើនសុខភាពបេះដូងរបស់អ្នកឲ្យដំណើរការបានល្អ។
៦- រក្សាទំងន់ ៖ ការលើសទម្ងន់ប៉ះពាល់ដល់សុខភាពបេះដូងរបស់អ្នក ហើយអាចរួមចំណែកដល់ការកើនឡើងកូឡេស្តេរ៉ុលខ្ពស់, សម្ពាធឈាមខ្ពស់ និងជំងឺទឹកនោមផ្អែម ដូច្នេះចូររក្សាទម្ងន់របស់អ្នកឲ្យបានល្អ។
៧- ទទួលទានរបបអាហារដែលមានសុខភាពល្អ ៖ កាត់បន្ថយអាហារមានជាតិខ្លាញ់ និងកាត់បន្ថយជាតិប្រៃ ពីព្រោះវាមិនល្អដល់បេះដូង និងសម្ពាធឈាមទេ។ បរិភោគរបបអាហារដែលមានសុខភាពល្អដែលរួមមានប្រូតេអ៊ីនគ្មានខ្លាញ់ ដូចជាត្រី សណ្តែក ផ្លែឈើ បន្លែ និងធញ្ញជាតិ ។
៨- គ្រប់គ្រងភាពតានតឹង ៖ កាត់បន្ថយភាពតានតឹងក្នុងសកម្មភាពប្រចាំថ្ងៃរបស់អ្នក។ ពិនិត្យមើលទម្លាប់នៃបំពេញការងាររបស់អ្នក និងរកវិធីដែលមានសុខភាពល្អដើម្បីកាត់បន្ថយ ឬដោះស្រាយជាមួយនឹងព្រឹត្តិការណ៍ស្ត្រេសនៅក្នុងជីវិតរបស់អ្នក។
វេជ្ជបណ្ឌិត ថេង យូដាលីន ឯកទេសជំងឺបេះដូងនៃមន្ទីរពេទ្យកាល់ម៉ែត មានប្រសាសន៍ឲ្យដឹងថា សំនួរពាក់ព័ន្ធនឹងរបៀបរស់នៅដើម្បីឲ្យសុខភាពបេះដូងល្អ គឺជាជាសំនួរមានសារសំខាន់ណាស់សម្រាប់ប្រជាជនខ្មែរយើង ។ ដូចយើងដឹងស្រាប់ទៅហើយ ប្រជាជនខ្មែរយើងមួយចំនួនធំ គឺកម្រថា សុខៗគាត់មក Check-up សុខភាពជាមួយនឹងគ្រូពេទ្យណាស់ លុះត្រាតែគាត់ឈឺធ្ងន់ ។ បើសិនជាកំរិតគាត់នៅឈឺតិចតួច ក៏គាត់ទៅកន្លែងផ្សំថ្នាំតិចតួចដោយគ្មានវេជ្ជបញ្ជារលេបដែរ ។
ហើយនៅពេលណាដែលឈឺធ្ងន់ គឺគាត់ទើបមកជួបឯកទេសនៅមន្ទីរពេទ្យធំៗជាដើម ហើយនៅក្នុងនោះដែរ អ្វីដែលសំខាន់នោះ គឺការការពារ ប្រសើរជាងការព្យាបាល ព្រោះ ទី១ ៖ គឺយើងកាត់បន្ថយនៃការចំណាយជាច្រើនដែលបណ្តាលមកពីជំងឺខ្សោយបេះដូងដែលធំជាងគេ ។ មួយវិញទៀតគឺយើងផ្តល់ការយល់ដឹងដល់ប្រជាជនយើងអំពីការថែរក្សាសុខភាពរបស់គាត់ ។ ដោយសារសព្វថ្ងៃនេះការយល់ដឹងរបស់ប្រជាជនយើងទាក់ទងនឹងជំងឺលើសឈាម ជំងឺបេះដូង ជំងឺទឹកនោមផ្អែម មហារីក និងជំងឺធ្ងន់ធ្ងរផ្សេងៗទៀត គឺគាត់មានការយល់ដឹងទាប ដោយសារការផ្សព្វផ្សាយយើងនៅមានកំរិតនៅឡើយ ដូច្នេះហើយទាមទារធ្វើម៉េច គឺការអប់រំ ធ្វើយុទ្ធនាការពន្យល់តាមរយៈសារព័ត៌មាន តាមរយៈវិទ្យុ ឬមួយបណ្តាញសង្គមជាដើម ។
វេជ្ជបណ្ឌិត ថេង យូដាលីន មានប្រសាសន៍ផ្តាំផ្ញើថា៖ «ចំពោះប្រជាជនយើងដែលឥតទាន់មានជំងឺអ្វីទាំងអស់ បើសិនជាគាត់ (មនុស្សប្រុស) មានអាយុចាប់ពី ៥៥ ឆ្នាំឡើងទៅ និងចំពោះមនុស្សស្រីចាប់ពីអាយុ ៤៥ ឆ្នាំឡើង គួរមកពិនិត្យសុខភាព (Check-up) យ៉ាងហោចណាស់ម្តងក្នុងមួយឆ្នាំ ។ បើសិនជាអ្នកជំងឺមានបញ្ហាធាត់ ទឹកនោមផ្អែម សូមជួបគ្រូពេទ្យឯកទេសដើម្បីតាមដាន និងពិនិត្យព្យាបាលឲ្យបានត្រឹមត្រូវ ។ ចំពោះអ្នកជំងឺមានជំងឺបេះដូងត្រូវជួបជាមួយគ្រូពេទ្យជំនាញឲ្យបានទៀងទាត់ និងទទួលទានថ្នាំតាមវេជ្ជបញ្ជារឲ្យបានទៀតទាត់ ជាពិសេសការជួបជាមួយនឹងគ្រូពេទ្យជំនាញទៀងទាត់ បើសិនជាករណីជាយថាហេតុត្រូវឈប់ទទួលទានថ្នាំ ដើម្បីធ្វើការវះកាត់ គឺអាចជួយអ្នកជំងឺបាន»៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ