ខេត្តបាត់ដំបង ៖ នាព្រឹកថ្ងៃទី០៧ កក្កដា ឆ្នាំ២០១៨នេះ គណបក្សប្រជាជនកម្ពុជាបានបើកយុទ្ធនាការឃោសនាដង្ហែក្បួនយ៉ាងធំនៅក្រុងបាត់ដំបង ដោយផ្តើមចេញពីសួននាគបាញ់ទឹកឆ្ពោះទៅគ្រប់ទិសទីក្នុងក្រុងដែលមានសមាជិកគណបក្សប្រជាជនជាង១ម៉ឺននាក់ បានមកចូលរួម ក្រោមអធិបតីភាពសម្តេចក្រឡាហោម ស ខេង អនុប្រធាននៃគណកម្មធិការគណបក្សប្រជាជននៃប្រទេសកម្ពុជា ដោយបានបង្ហាញតំណាងរាស្ត្រដែលសកម្មការងារឈរឈ្មោះជាប់ជាច្រើនអាណត្តិមកនោះនៅក្នុងកម្មវិធីនោះផងដែរ ។
ក្រោយពីបានស្តាប់ប្រសាសន៍របស់សម្តេចតេជោហ៊ុន សែន ប្រធានគណបក្សប្រជាជនកម្ពុជា បានថ្លែងការណ៍ក្នុងឱកាសបើកយុទ្ធនាការឃោសនាផ្សាយបន្តផ្ទាល់ពីកោះពេជ្រទីក្រុងភ្នំពេញរួចមក សម្តេចក្រឡាហោម ស ខេង បានបញ្ជាក់ថា សូមសមាជិកគ្រប់គណបក្សទាំងអស់ត្រូវគោរពទៅតាមនីតិវិធីច្បាប់នៃការបោះឆ្នោតឲ្យបានត្រឹមត្រូវ ហើយពេលចេញក្បួនដង្ហែត្រូវរក្សាសន្តិសុខសណ្តាប់ធ្នាប់ចៀសវាងការអួតអាងរបស់បក្សនីមួយៗ ដែលនាំឲ្យប៉ះពាល់ជួបគ្នាម្តងៗ កើតមាននូវអំពើហិង្សា ហើយត្រូវគោរពទៅតាមការកំណត់ដែលសល់ពេល២១ថ្ងៃទៀត ។
គឺក្បួនដង្ហែឃោសនាត្រូវធ្វើបានរយៈពេល៤ដងក្នុង២១ថ្ងៃនេះ ហើយក្នុងពេលដង្ហែបានម្តងត្រូវរាប់ចាត់ទុកពីមានឡាន២គ្រឿង ម៉ូតូ២០គ្រឿង មនុស្ស២០នាក់យ៉ាងតិច ដូច្នោះសូមសមាជិកទាំងអស់គោរពច្បាប់ និងបែងចែកពេលវេលាឲ្យបានច្បាស់លាស់ព្រោះមានអ្នកសង្កេតការណ៍កំពុងឃ្លាំចាំមើលរាល់កើតមានកំហុស គឺត្រូវប្តឹងទៅគណៈកម្មការរៀបចំការបោះឆ្នោតដែលបានចេញច្បាប់មកឲ្យគ្រប់គណបក្សនយោបាយគោរពតាម ឲ្យមានប្រសិទ្ធិភាពបំផុត ៕
ចែករំលែកព័តមាននេះ