ខេត្តស្ទឹងត្រែង ៖ សេចក្ដីរាយការណ៍មួយបានឱ្យដឹងថា នគរបាលក្រុងស្ទឹងត្រែង កាលពីថ្ងៃទី៤ ខែកក្កដាកន្លងទៅ បានឃាត់ខ្លួនយុវជនម្នាក់ ពាក់ព័ន្ធនឹងបណ្តឹងរបស់អាណាព្យាបាលក្មេងស្រីជាអនីតិជនម្នាក់ពីបទរំលោភសេពសន្ថវៈ ។
ជនសង្ស័យឈ្មោះ ឌៀប ផុង អាយុ២២ឆ្នាំ ជាកម្មករធ្វើឡឥដ្ឋ ស្នាក់នៅក្នុងសង្កាត់ស្ទឹងត្រែង ក្រុងស្ទឹងត្រែង ។ តាមពាក្យបណ្តឹងរបស់ឪពុកក្មេងស្រីថា កាលពីវេលាម៉ោង២និង១០នាទីរសៀលថ្ងៃទី២៩ ខែមិថុនាកន្លងទៅ ជនសង្ស័យបានលួងលោមកូនស្រីគាត់ដែលមានអាយុ៧ឆ្នាំចូលក្នុងរោងកម្មករស្នាក់នៅឡឥដ្ឋ ហើយធ្វើសកម្មភាពរំលោភសេពសន្ថវៈ ។
ព័ត៌មានបឋមបានបញ្ជាក់ ជនសង្ស័យក៏បានសារភាពដែរថា ខ្លួនពិតជាបានរួមភេទជាមួយក្មេងស្រីអាយុ៧ឆ្នាំនោះប្រាកដមែន ប៉ុន្តែមិនបានសុីជម្រៅទេ ។ បើទោះជាយ៉ាងណាក្តី យោងតាមពាក្យបណ្តឹងនិងចម្លើយគ្រប់គ្រាន់លើធាតុផ្សំបទល្មើស សមត្ថកិច្ចបានកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តតាមនីតិវិធី ពីបទអំពើរួមភេទជាមួយអនីតិជនអាយុក្រោម១៥ឆ្នាំ តាមមាត្រា៤២នៃច្បាប់ស្តីពីការបង្ក្រាបអំពើជួញដូរមនុស្សនិងអំពើធ្វើអាជីវកម្មផ្លូវភេទ ៕
ចែករំលែកព័តមាននេះ