ខេត្តស្ទឹងត្រែង ៖ កម្លាំងនគរបាលចំនួនពីរខេត្តបានសហការបង្កាទប់ស្កាត់ និងបង្ក្រាបករណីជួញដូរថ្នាំញៀនដោយខុសច្បាប់ព្រមទាំងបានចាប់ខ្លួនជនសង្ស័យម្នាក់ក្នុងចំណោមបក្សពួកម្នាក់ទៀតនៅកន្លែងកើតហេតុ ហើយបញ្ជូនទៅស្នងការដ្ឋានគរបាលខេត្តក្រចេះ ដើម្បីសាកសួររកអត្តសញ្ញាណមេខ្លោងនៅពីក្រោយការបញ្ជា ។
មន្ត្រីនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែងបានឲ្យដឹងថា ការបង្ក្រាបករណីជួញដូរថ្នាំញៀនខាងលើកម្លាំងនគរបាលជំនាញខេត្តស្ទឹងត្រែងបានពន្លាតដែនដីដោយមានការចូលរួមសហការពីកម្លាំងនគរបាលប្រឆាំងគ្រឿងញៀនស្នងការដ្ឋាននគរបាលខេត្តក្រចេះបន្ទាប់ពីក្តាប់មុខសញ្ញាចរាចរណ៍គ្រឿងញៀនពីជនសង្ស័យម្នាក់ទៅកាន់មនុស្សម្នាក់ទៀត កាលពីវេលាម៉ោង១៧និង៤៥នាទីថ្ងៃទី៦ កក្កដា ២០១៨ ស្ថិតនៅលើកំណាត់ផ្លូវជាតិលេខ៧៣ ភូមិព្រែកតាអាំ ឃុំបុសលាវ ស្រុកចិត្របូរី ខេត្តក្រចេះ ។
ប្រភពដដែលបន្តថា កម្លាំងនគរបាលទាំងពីរខេត្តបានតាមដានឃ្លាំមើល និងលាក់ខ្លួនយ៉ាងសម្ងាត់ ដើម្បីចាប់ខ្លួនជនសង្ស័យ ។ ស្ថិតក្នុងសកម្មភាពក្រុមជនសង្ស័យបានណាត់គ្នា ដើម្បីដោះដូរដោយជនសង្ស័យឈ្មោះ ភីន ឃុនណារិទ្ធ ហៅ ភីន រិទ្ធ ភេទប្រុស អាយុ៤១ឆ្នាំ រស់នៅភូមិថ្មី ឃុំខ្សាច់អណ្តែត ស្រុកឆ្លូងខេត្តក្រចេះ ធ្វើដំណើរតាមម៉ូតូនាំថ្នាំញៀនមួយកញ្ចប់ធំមកប្រគល់ឲ្យជនសង្ស័យម្នាក់ទៀតជិះរថយន្ត ពណ៌ទឹកប្រាក់ ពាក់ស្លាកលេខភ្នំពេញ២AQ-៩០៨១ តែដោយសារការបង្ក្រាបមិនអំណោយផលជនសង្ស័យដែលរថយន្តមកទទួលថ្នាំញៀនបានរត់គេចខ្លួនបន្សល់រថយន្តមួយគ្រឿង និងចាប់ខ្លួនជនសង្ស័យម្នាក់រួមថ្នាំញៀនមួយកញ្ចប់ធំនាំទៅស្នងការដ្ឋាននគរបាលខេត្តក្រចេះក្រោមការសម្របសម្រួលពីលោក កែវ សុជាតិ ព្រះរាជអាជ្ញាអមសាលាដំបូងខេត្តក្រចេះ ។ ក្រោមបញ្ចប់នីតិវិធីនៅស្នងការដ្ឋាននគរបាលខេត្តក្រចេះកម្លាំងនគរបាលប្រឆាំងគ្រឿងញៀនខេត្តស្ទឹងត្រែងដែលជាម្ចាស់ករណីបានបញ្ជូនជនសង្ស័យរួមវត្ថុតាងចាប់យកនាំមកកាន់ស្នងការដ្ឋាននគរបាលខេត្តស្ទឹងត្រែងដើម្បីចំណាត់បន្ត ។ លុះព្រឹកថ្ងៃទី៧ កក្កដា ២០១៨ ទើបនគរបាលប្រឆាំងគ្រឿងញៀនស្នងការដ្ឋាននគរបាលខេត្តស្ទឹងត្រែងបន្តហែកកញ្ចប់ថ្នាំញៀនធ្វើតេស្តនៅចំពោះមុខជនសង្ស័យក្រោមការចូលរួមសម្របសម្រួលពីលោកគឹម ហុងសាន ព្រះរាជអាជ្ញាររងអមសាលាដំបូងខេត្តស្ទឹងត្រែង ចៅក្រមស៊ើបសួរសាលាដំបូងខេត្ត និងក្រឡាបញ្ជី ។
លោកវរៈសេនីយ៍ទោ ម៉ៃ ឥនឌូ នាយការិយាល័យប្រឆាំងគ្រឿងញៀនស្នងការដ្ឋាននគរបាលខេត្តស្ទឹងត្រែងឲ្យដឹងថា ជនសង្ស័យដែលបានចាប់ខ្លួនឈ្មោះ ភីន ឃុនណារិទ្ធ ហៅ ភីន រិទ្ធ ភេទប្រុស អាយុ៤១ឆ្នាំ រស់នៅភូមិថ្មី ត្រូវកម្លាំងនគរបាលចាប់ខ្លួនគ្រាកំពុងដោះដូរថ្នាំញៀនជាមួយជនសង្ស័យម្នាក់ទៀតដែលបានគេចខ្លួន ។ លោកបន្តថា បន្ទាប់ចាប់ខ្លួនជនសង្ស័យកម្លាំងជំនាញបានដកហូតថ្នាំញៀនមួយកញ្ចប់ធំ ទម្ងន់សរុបចំនួន១០៣២.៦ក្រាម ទូរស័ព្ទដៃមួយគ្រឿង និងរថយន្តមួយគ្រឿង ។
មន្ត្រីជាន់ខ្ពស់នៃការិយាល័យប្រឆាំងគ្រឿងញៀនស្នងការដ្ឋាននគរបាលខេត្តស្ទឹងត្រែងបាននិយាយថា ថ្នាំញៀនទាំងនេះគ្រាន់ជាបំណែកមួយដែលក្រុមឧក្រិដ្ឋជនបាននាំចេញពីប្រទេសឡាវឆ្លងកាត់ខេត្តស្ទឹងត្រែងទៅកាន់ភ្នំពេញ ហើយធ្វើការបង្វិលចែកចាយតាមបណ្តាខេត្តប៉ុណ្ណោះ តែចំនួនធំ គឺដឹកតាមកាប៉ាល់នាំចេញទៅប្រទេសទី៣បន្ត ។ បច្ចុប្បន្នជនសង្ស័យត្រូវបានកម្លាំងជំនាញនៃការិយាល័យប្រឆាំងគ្រឿងញៀនស្នងការដ្ឋាននគរបាលខេត្តស្ទឹងត្រែងកសាងសំណុំរឿងបញ្ជូនទៅអយ្យការអមសាលាដំបូងខេត្ត ដើម្បីបន្តនីតិវិធី ៕
ចែករំលែកព័តមាននេះ