ខេត្តបាត់ដំបង ៖ វេលារសៀលថ្ងៃទី០៦ ខែកក្កដា ឆ្នាំ២០១៨នេះ នៅក្នុងបរិវេណវត្តបាឡាត់ ឃុំនរា ស្រុកសង្កែ បានប្រារព្ធពិធីសំណេះសំណាលជាមួយសមាជិកគណបក្សប្រជាជនកម្ពុជាចំនួន២១៤៤នាក់ មកពី៤ភូមិ…
ខេត្តបាត់ដំបង ៖ វេលារសៀលថ្ងៃទី០៦ ខែកក្កដា ឆ្នាំ២០១៨នេះ នៅក្នុងបរិវេណវត្តបាឡាត់ ឃុំនរា ស្រុកសង្កែ បានប្រារព្ធពិធីសំណេះសំណាលជាមួយសមាជិកគណបក្សប្រជាជនកម្ពុជាចំនួន២១៤៤នាក់ មកពី៤ភូមិ ក្នុងឃុំនរា ស្រុកសង្កែ ខេត្តបាត់ដំបង ក្រោមអធិបតីភាពលោក ឡោក ហ៊ួរ សមាជិកគណៈកម្មធិការកណ្តាលគណបក្សប្រជាជនកម្ពុជា អ្នកតំណាងរាស្ត្រមណ្ឌលបាត់ដំបង និងប្រធានក្រុមការងារថ្នាក់កណ្តាលចុះជួយស្រុកសង្កែ ដោយមានការចូលរួមពីសមាជិកក្នុងខេត្ត-ស្រុក បានចូលរួមផងដែរ។
ថ្លែងក្នុងឱកាសនោះ លោកឡោក ហ៊ួរ បានបញ្ជាក់ថា ប្រទេសកម្ពុជាយើង អភ័ព្វណាស់ក្នុងប្រវត្តិសាស្ត្រនេះ ដែលបានបន្សល់ភាពរ៉ាំរ៉ៃនៃសង្គ្រាម ដណ្តើមអំណាចសូម្បីតែព្រះ មហាវិរក្សត្រសម្តេចឪ (សម្តេចព្រះនរោត្តមសីហនុ) កំពុងកសាងប្រទេសនៅសម័យឆ្នាំ១៩៦០ ក៏នៅមានពួកប្រឆាំងតាមលាបពណ៌ ញុះញង់ ដោយមានបរទេសនៅពីក្រោយខ្នង ដើម្បីបង្កបង្កើតជាសង្គ្រាមឡើង ហើយបក្សប្រឆាំងមួយចំនួនបានធ្វើរដ្ឋប្រហារទម្លាក់សម្តេចឪ នៅឆ្នាំ១៩៧០ ហើយឡើងកាន់អំណាចដោយលោក លន់ នល់ ដែលមានអាមេរិកនៅពីក្រោយខ្នង បានដឹកនាំបង្កសង្គ្រាមរហូតឲ្យមានជំពាក់ជឿគ្រឿងសព្វាវុធ ប្រមាណ៧លានតោន មកបង្កសង្គ្រាម ទម្លាក់គ្រាប់បែកនៅស្រុកខ្មែរ ហើយបន្តមកទៀតនៅឆ្នាំ១៩៧៥ របបខ្មែរក្រហមដែលដឹកនាំដោយ ប៉ុល ពត បានលាបពណ៌ចោទពីរបបសក្តិភូមិ លក់ទឹកដីឲ្យប្រទេសជិតខាង រំដោះតស៊ូវណ្ណៈ គ្មានអ្នកមាន គ្មានអ្នកក្រ រត់តស៊ូក្នុងព្រៃរហូតរំដោះបាននៅឆ្នាំ១៩៧៥ ហើយដឹកនាំតាមយុទ្ធសាស្ត្រ ដោយជន្លៀស ប្រជាជនចេញពីទីក្រុង ឲ្យទៅរស់នៅធ្វើស្រែដោយមានវណ្ណៈតែមួយ ហើយបំបាក់ស្មារតីដោយ មិនឲ្យប្រជាជនមានសិទ្ធតវ៉ា ដើរហើរទៅណាបានដោយសេរីឡើយ។
បើនៅតែហ៊ានត្រូវតែសម្លាប់ចោលទាំងអស់ និងបង្អត់អាហារមិនឲ្យមានការហូបចុកគ្រប់គ្រាន់ឡើយ ទោះបីមានស្រូវអង្ករហូរហៀរយ៉ាងណាក៏ដោយ នេះហើយជាលទ្ធផលដែលក្រុមប្រឆាំងម្ខាងៗ តែងតែលាបពណ៌ ចោទថាក្បត់ជាតិដោយសារអ្នកមានចំណេះដឹងត្រូវកម្ទេចចោលទាំងអស់។ ជាចុងក្រោយនេះកុំតែបានគុណគណបក្សប្រជាជនបាន បង្កើតរណៈសិរ្យសង្គ្រោះជាតិកម្ពុជា ២ធ្នូ ដែលមានឥស្សរជនកំពូលដឹកនាំកម្លាំង បានតស៊ូរំដោះជាតិ និងប្រជាពលរដ្ឋទាំងស្រុងនាថ្ងៃ៧ មករា ១៩៧៩ រួចផុតពីរបបកាប់សម្លាប់ ប៉ុល ពត ទេនោះ តើលោកតា លោកយាយ បងប្អូន បានរស់រាន មានជីវិត បន្តកូនចៅឲ្យបានរៀនសូត្រ បង្កើតកសាងគ្រប់ហេដ្ឋារចនាសម្ព័ន្ធ រីកចម្រើនលើគ្រប់វិស័យ ដល់សព្វថ្ងៃទេ។ ដូច្នេះប្រជាពលរដ្ឋខ្មែរយើងមិនត្រូវភ្លេចថ្ងៃ៧ មករា ១៩៧៩ ជាថ្ងៃប្រវត្តិសាស្ត្រខ្មែរ ដែលកូនខ្មែរត្រូវចងចាំជានិច្ច មិនដូចជនអគតិក្រុមប្រឆាំងនាំគ្នាបំភ្លេចថ្ងៃប្រវត្តិសាស្ត្រនេះ ខណៈដែលខ្លួនឯងធ្លាប់រស់នៅក្នុងរបបនេះផងដែរ។
ក្នុងឱកាសនោះ លោកតំណាងរាស្ត្រ បានជម្រាបជូនប្រជាពលរដ្ឋថា នៅសល់តែរយៈពេល២៣ថ្ងៃទៀតប៉ុណ្ណោះ ដល់ថ្ងៃបោះឆ្នោត ហើយសូមប្រជាពលរដ្ឋត្រៀមឯកសារឲ្យគ្រប់គ្រាន់ ដើម្បីទៅបោះឆ្នោតនៅថ្ងៃទី២៩ ខែកក្កដាខាងមុខនេះ គឺការបោះឆ្នោតជ្រើសតាំងតំណាងរាស្ត្រ នីតិកាលទី០៦ ពិសេសបោះឆ្នោតគណបក្សប្រជាជនកម្ពុជា ដែលមានលេខរៀងទី២០ នៅក្រោមគេ ដែលងាយចាំ ងាយគិត ងាយគូស និងមានរូបសញ្ញា ទេវតាបាចផ្កា ជាសម្គាល់ ដើម្បីទទួលបានជ័យជម្នះជូនសម្តេចតេជោ ហ៊ុន សែន បន្តធ្វើជានាយករដ្ឋមន្ត្រីនីតិកាលទី៦នេះ ដឹកនាំប្រទេសជាតិបម្រើប្រជាជន ការពារសន្តិភាព ជូនប្រទេសជាតិបានរស់នៅសុខសាន្តក្នុងប្រទេសដែលមានសុខសន្តិភាពពិតប្រាកដ និងការអភិវឌ្ឍជាបន្តទៅទៀត។ ដូច្នោះការបោះឆ្នោតលើកនេះដែលគាំទ្រសម្តេចតេជោដឹកនាំបន្តទៀត គឺជាការបោះឆ្នោតដោយខ្លួនឯងដើម្បីសេចក្តីសុខសម្រាប់យើងទាំងអស់គ្នា៕
ចែករំលែកព័តមាននេះ