រាជធានីភ្នំពេញ ៖ មនុស្សជំនិតលោក កឹម សុខា អតីតប្រធានគណបក្សសង្គ្រោះជាតិ លោក មុត ចន្ថា បានសម្តែងប្រតិកម្មច្រានចោលចំពោះលិខិតរបស់ក្រុមសមាជិក អតីតគណបក្សសង្គ្រោះជាតិមួយក្រុមដែលសរសេលិខិតថ្វាយព្រះមហាក្សក្រដើម្បីស្នើសុំព្រះរាជអន្តរាគមន៍តុលាការកំពូលបើកជំនុំជម្រះឡើងវិញ ក្នុងសំណុំរឿងរំលាយគណបក្សដែលហាមឃាត់មនុស្ស១១៨នាក់មិនឲ្យធ្វើនយោបាយរយៈពេល៥ឆ្នាំ ។
ការសម្តែងប្រតិបតិ្តកនេះបន្ទាប់ពីក្រុមអតីតសមាជិកជាន់ខ្ពស់គណបក្សសង្គ្រោះជាតិមានលោកស្រី ជូឡុង ស៊ីម៉ូរ៉ា, លោក ជុំ ស៊ីរ៉ាត, លោក ម៉ែន សុថាវរិន្ទ, លោក អ៊ុច សេរីយុទ្ធ, លោក អ៊ុង សុវណ្ណា, លោកឡុង ប៊ុត្ថា និងលោក ហ៊ីង សុក្ខុំម កាលពីថ្ងៃទី៣ ខែកក្កដា ឆ្នាំ២០១៨ បានចុះហត្ថលេខាធិការក្នុងលិខិតមួយច្បាប់ថ្វាយទៅព្រះមហាក្សត្រសម្តេចព្រះបាទ បរមនាថ សីហមុនី ដើម្បីស្នើសុំព្រះរាជអន្តរាគមន៍ឲ្យតុលាការកំពូលបើកសវនាការលើសំណុំរឿងរំលាយគណបក្សសង្គ្រោះជាតិឡើងវិញ ។
ក្នុងខ្លឹមសារលិខិតលោកត្រូវបានលោក មុត ចន្ថា អ្នកជំនិតលោក កឹម សុខា និងជាជំនួយការលោកបានលើកឡើងដោយបញ្ជាក់ថា «ជំរាបម្ចាស់ហត្ថលេខាលិខិតនេះថា អស់លោក លោកស្រី មិនអាចតាំងខ្លួនជាតំណាងរបស់ខ្ញុំឡើយដោយហេតុថា ៖ ទី១-អស់លោក លោកស្រី មិនបានពិគ្រោះយោបល់ ឬសុំការយល់ព្រមពីខ្ញុំជាមុនឡើយ ។ ទី២-ខ្ញុំមិនត្រូវការសុំឲ្យជំនុំជម្រះឡើងវិញអំពីបំរាមធ្វើនយោបាយដែរ ពីព្រោះបើទោះលើកបំរាមនៅពេលនេះក៏ខ្ញុំពុំអាចចូលរួមនៅក្នុងការបោះឆ្នោតដែលនៅសល់ពេលមិនដល់មួយខែនោះដែរ ។ ទី៣-បើគង់តែមិនអាចចូលរួមបោះឆ្នោតនៅពេលនេះដដែលដូច្នេះការរង់ចាំដល់ឆ្នាំ២០២២ ក៏មិនអីដែរ ។ ទី៤-ទោះបីបំរាមត្រូវបានលើកក៏ដោយ ប៉ុន្តែគណបក្សសង្គ្រោះជាតិ មិនរស់ឡើងវិញក៏វាគ្មានន័យអ្វីនោះដែរ» ។
លោក មុត ចន្ថា គូសបញ្ជាក់ទៀតថា អស់លោក លោកស្រី មានសិទ្ធិ ប៉ុន្តែក៏ត្រូវតែគោរពសិទ្ធិរបស់អ្នកដទៃផងដែរ ។ អស់លោក លោកស្រី គ្មានសិទ្ធិមកសម្រេចជំនួសខ្ញុំឡើយ ។ តើគណៈកម្មការចំពោះកិច្ចរបស់បក្សមានបានសម្រេចដែរទេ? កុំតាំងខ្លួនជាអធិរាជតែម្នាក់ឯង ពីព្រោះគណបក្សសង្គ្រោះជាតិ មិនមែនរបស់បុគ្គលម្នាក់ ឬមួយក្រុមណាឡើយ ៕
ចែករំលែកព័តមាននេះ