ប្រទេសម៉ិកស៊ិក ៖ មនុស្សយ៉ាងតិច២៤នាក់ស្លាប់ និង៤៩នាក់រងរបួស ក្នុងនោះទាំងបណ្ដាអ្នកពន្លត់ភ្លើង និងប៉ូលិស ដោយសារការផ្ទុះជាច្រើនកាលពីថ្ងៃទី៥ កក្កដា ២០១៨ ស្ថិតក្នុងឃ្លាំងផ្ទុកកាំជ្រួចភ្លើងនានា នៅទីក្រុងTULTEPERជាទីក្រុងមួយនៅភាគខាងជើងក្រុងម៉ិកស៊ីកូ ហើយជិតពាក់កណ្ដាលនៃជនរងគ្រោះជាអ្នកជួយសង្គ្រោះ។
ក្នុងសេចក្ដីប្រកាសមួយរបស់អយ្យការមូលដ្ឋាន បានគូសបញ្ជាក់ថា យើងរាប់ឃើញអ្នកស្លាប់២៤នាក់ គឺ១៧នាក់ស្លាប់នៅនឹងកន្លែង ហើយ៧នាក់ទៀតស្លាប់នៅមន្ទីរពេទ្យ។ ក្រៅពីអ្នកស្លាប់អ្នករបួស៤៩នាក់ ត្រូវបានបញ្ជូនទៅកាន់មន្ទីរពេទ្យផ្សេងៗ។
ចំណែករដ្ឋមន្ត្រីសន្តិសុខសាធារណៈនៃរដ្ឋម៉ិកស៊ីកូលោក MARIBEL CERVANTES និយាយថា ក្នុងចំណោមអ្នកស្លាប់មានអ្នកពន្លត់ភ្លើង៤នាក់ ប៉ូលិសក្រុង៤នាក់ និងប៉ូលិសរដ្ឋម្នាក់។ ហើយទីក្រុងTULTEPER ជាទីក្រុងល្បីមានផ្សារកាំជ្រួចភ្លើងធំៗរបស់ប្រទេស ហើយតែងជួបប្រទះរឿងប្រហែលគ្នានោះជាច្រើន រួចគ្រោះថ្នាក់មានមនុស្សស្លាប់ជាច្រើនកើតមានកាលពីឆ្នាំ២០១៦ បណ្ដាលឲ្យស្លាប់មនុស្សដល់៤២នាក់។
កាកបាទក្រហមរដ្ឋម៉ិកស៊ីកូ ដែលមានក្រុងTULTEPER និយាយថា យើងមានការស្រងាកចិត្តយ៉ាងខ្លាំងចំពោះការស្លាប់មនុស្សច្រើននាក់នាព្រឹកនេះនៅទីក្រុង TULTEPER ក្នុងនោះមានបណ្ដាអ្នកពន្លត់ភ្លើង និងប៉ូលិសរបស់យើងពេលជួយសង្គ្រោះអ្នកដទៃ។
ការផ្ទុះលើកដំបូងកើតមាននាវេលាម៉ោង៩និង៣០នាទីព្រឹក ហើយខណៈពួកអ្នកពន្លត់ភ្លើង និងប៉ូលិសលើកគ្នាទៅដល់ ហើយចាប់ផ្ដើមជួយបណ្ដាជនរងគ្រោះ ភ្លើងក៏ឆេះរាលដាលដល់ឃ្លាំងឯទៀតៗ បណ្ដាលឲ្យមានការផ្ទុះថ្មីៗ។ ប៉ុន្មានម៉ោងក្រោយសោកនាដកម្មនេះ កងទាហាន ប៉ូលិស និងពួកអ្នកពន្លត់ភ្លើងត្រូវបានដាក់ពង្រាយនៅជុំវិញអគារទាំងឡាយដែលមានភ្លើងឆេះនៅឡើយ៕
ចែករំលែកព័តមាននេះ