រាជធានីភ្នំពេញ ៖ នៅលើសង្វៀនស្ថានីយទូរទស្សន៍ប៉ុស្ដិ៍លេខ៥នាថ្ងៃអាទិត្យ ទី១៧ មីនា ស្អែកនេះ ឆាកប្រយុទ្ធរវាងកីឡាករ ធី តុងហ៊ី មកពីក្លិបសាលវ័ន្តកីឡា និងកីឡាករ ឈិន ក្វាន់ង៉ុយ មកពីក្លិបកម្ពុជរាជសីហ៍ នឹងកើតឡើងជាថ្មីទៀត បើទោះជាកីឡាករទាំងពីរធ្លាប់ចាញ់ឈ្នះគ្នារហូតពីរលើករួចមកហើយក៏ដោយ ។ ម្នាក់ៗកំពុងនិយាយថា ឈិន ក្វាន់ង៉ុយ ពិតជាមិនរាងនឹងធី តុងហ៊ី មែន ទើបចាញ់
រាជធានីភ្នំពេញ ៖ នៅលើសង្វៀនស្ថានីយទូរទស្សន៍ប៉ុស្ដិ៍លេខ៥នាថ្ងៃអាទិត្យ ទី១៧ មីនា ស្អែកនេះ ឆាកប្រយុទ្ធរវាងកីឡាករ ធី តុងហ៊ី មកពីក្លិបសាលវ័ន្តកីឡា និងកីឡាករ ឈិន ក្វាន់ង៉ុយ មកពីក្លិបកម្ពុជរាជសីហ៍ នឹងកើតឡើងជាថ្មីទៀត បើទោះជាកីឡាករទាំងពីរធ្លាប់ចាញ់ឈ្នះគ្នារហូតពីរលើករួចមកហើយក៏ដោយ ។ ម្នាក់ៗកំពុងនិយាយថា ឈិន ក្វាន់ង៉ុយ ពិតជាមិនរាងនឹងធី តុងហ៊ី មែន ទើបចាញ់រហូតដល់ទៅ២លើករួចមកហើយ នៅតែសឿងមកឡើងប្រកួតជាមួយដៃគូចាស់ដដែលនេះជាថ្មីទៀត ។
បើទោះជាថ្ងៃអាទិត្យស្អែក អ្នកស្នេហាកីឡាប្រដាល់ភាគច្រើននឹងផ្ដោតការតាមដានការប្រកួតដណ្ដើមខ្សែក្រវាត់ស្រាបៀរកម្ពុជាឆ្នាំ២០១៣ រវាងកីឡាករ ឯម ខ្លឹមខ្មៅ (ក្លិបគ្រុឌមានជ័យ) និងកីឡាករ ផល សោភ័ណ្ឌ(ក្លិបតាឡីដំរីមានឫទ្ធិ) នៅសង្វៀនបាយ័នបឹងស្នោ ក្នុងសន្ទស្សន៍ច្រើនយ៉ាងណាក៏ដោយក៏នៅសង្វៀន Beeline ជ្រោយចង្វារបស់ស្ថានីយទូរទស្សន៍ប៉ុស្ដិ៍លេខ៥ ឯណេះវិញក៏នៅតែមានការចាប់អារម្មណ៍តាមដានពីការប្រកួតសាជាថ្មី របស់កីឡាករ ឈិន ក្វាន់ង៉ុយ និង ធី តុងហ៊ី ។ គូប្រកួតទាំងពីរធ្លាប់ជួបគ្នាពីរលើករួចមកហើយ ដោយកីឡាករ ឈិន ក្វាន់ង៉ុយ ជាអ្នកចាញ់ធី តុងហ៊ី ទាំងពីរលើកនាពេលកន្លងមក ។ យ៉ាងណាមិញ គេនៅចាំបានថា គ្រប់លើកដែលកីឡាករ ឈិន ក្វាន់ង៉ុយ ទទួលបរាជ័យ គឺបានបំបាក់កីឡាករធី តុងហ៊ី ឲ្យទក់សាច់សម្បើមណាស់ ទើបគេនៅតែពិបាកស្មានថា តើកីឡាករធី តុងហ៊ី នឹងអាចស៊ូរួច ហើយឈ្នះទៀតសម្រាប់ថ្ងៃអាទិត្យ ស្អែក ឬយ៉ាងណា? អ្នកគាំទ្រភាគច្រើន យល់ថា ឈិន ក្វាន់ង៉ុយ មិនអាចចាញ់ការប្រកួតសម្រាប់ថ្ងៃស្អែកទេ ដោយសារតែលទ្ធផលនោះ គឺមិនអាចទទួលយកបានទាំងលោកខ្លួនឯង ទាំងមហាជន និងទាំងគ្រូបង្វឹកដោយផ្ទាល់របស់លោក ។ ការប្រកួតសងសឹករបស់លោក គឺត្រូវការលទ្ធផលស្ដារមុខមាត់តែមួយគត់ ដើម្បីកុំឲ្យជាប់ឈ្មោះថា ឲ្យតែជួបកីឡាករ ធី តុងហ៊ី គឺរមែងបាក់រទេះនោះ ។ ឈិន ក្វាន់ង៉ុយ និយាយថា មួយរយៈនេះ លោកប្រឹងប្រែងចូលក្លិបហ្វឹកហាត់សម្បើមណាស់ ដោយសារតែចង់សម្រេចគោលដៅសងសឹកកីឡាករធី តុងហ៊ី ឲ្យបាន១០០% ក្នុងជំនួបប្រកួតគ្នាជាលើកទី៣នេះ ។
កីឡាករធី តុងហ៊ី ឯណេះវិញ ក៏មានការតាំងចិត្តមិនធម្មតានោះដែរ បន្ទាប់ពីលោកមានទឹកមាត់លេបរួចមកហើយ តាមរយៈការឡើងរេញជាមួយឈិន ក្វាន់ង៉ុយ ពីរលើក ហើយឈ្នះទាំងពីរលើក ។ លោកបញ្ជាក់បែបឌឺទៅកាន់គូប្រកួតថា មុនពេលឡើងរេញសម្រាប់ថ្ងៃស្អែកនេះ លោកក៏បានហ្វឹកហាត់ និងមានការប្រយ័ត្នប្រយែងចំពោះល្បិចស្នៀតក្នុងការឡើងរេញផងដែរ ទើបមានទំនុកចិត្តរាងខ្ពស់គួរសមថា លោកពិតជាមិនចាញ់ ឈិន ក្វាន់ង៉ុយ ក្នុងជំនួបលើកទី៣ ។ លោកនៅតែនិយាយថា មិនខ្លាចឈិន ក្វាន់ង៉ុយ គ្រប់មាត់ បើទោះជាឮឡើងពេញត្រចៀកច្បាស់ទៅហើយថា ឈិន ក្វាន់ង៉ុយ ប្ដេជ្ញាសងសឹកឲ្យបានដាច់ខាតសម្រាប់ល្ងាចស្អែក ។ តាមរយៈការជឿជាក់ និងការត្រៀមខ្លួនប្រកបដោយទំនុកចិត្តរបស់ពួកគេ អ្នកទស្សនាដូចៗគ្នា យល់ឃើញថា គូប្រកួតទាំងពីរគឺពិតជាឡើងរេញដោយញេញធ្មេញដាក់គ្នា ហើយបើកឆាកប្រយុទ្ធស៊ីសាច់ហុតឈាមគ្នាយ៉ាងអស់ពីដៃពីជើងបំផុត ដើម្បីសម្រេចគោលដៅដែលពួកគេត្រូវការនៅវគ្គចុងក្រោយ ។ គ្មានអ្នកណាអាចកំណត់បានឡើយថា អ្នកធ្លាប់ចាញ់គេ២លើក នឹងចាញ់ជាលើកទី៣ សម្រាប់ថ្ងៃស្អែក ។ អញ្ចឹងហើយ ទើបការប្រកួតរវាងគូនេះ ត្រូវគេមើលឃើញថា មានភាពទាក់ទាញ បើទោះជាការសងសឹករបស់ពួកគេត្រូវចំថ្ងៃកីឡាករ ជ័យ កុសល និងកែវ រំចង់ ឡើងរេញប្រកួតគ្នា និងត្រូវចំថ្ងៃកីឡាករ ឯម ខ្លឹមខ្មៅ និង ផល សោភ័ណ្ឌ ឡើងដណ្ដើមខ្សែក្រវាត់គ្នានៅសង្វៀនបឹងស្នោនោះក៏ដោយ ។ ចាំមើលៗតើរេញប៉ុស្ដិ៍លេខ៥សប្ដាហ៍នេះ ជាសំណាងរបស់កីឡាកររូបណា ប៉ុន្តែបើ ឈិន ក្វាន់ង៉ុយ ភ្លាត់ចាញ់ជាលើកទី៣ទៀតគឺពិតជាបាក់មុខហើបលែងរួចហើយក្នុងស្រទាប់អ្នកស្នេហាកីឡាប្រដាល់ និងនៅចំពោះមុខកីឡាករ ធី តុងហ៊ី ដោយផ្ទាល់មិនខាន ៕
ចែករំលែកព័តមាននេះ