រាជធានីភ្នំពេញ ៖ អតីតារាចម្រៀងវ័យក្មេងស្រស់សោភានាង ពេជ្រ សូលីកា បានបង្ហាញខ្លួនក្នុងពិភពសិល្បៈជាថ្មី ដោយចូលរួមសម្តែងក្នុងខ្សែភាពយន្តភាគរបស់ស្ថានីយទូរទស្សន៍ហង្សមាស បន្ទាប់ពីនាងបាត់មុខរយៈពេលយូរកន្លងមក ។
ខ្សែភាពយន្តភាគដែលពេជ្រ សូលីកា សម្តែងនេះមានចំណងជើងថា «អាពាហ៍ពិពាហ៍ចៃដន្យ» ដោយនាងសម្តែងជាតួឯកជាមួយនឹងដៃគូចាស់របស់នាង គឺលោក នីកូ ។
តាមរយៈ Poster ដែលបានបង្ហោះតាមហ្វេសប៊ុកកាលពីពេលថ្មីៗកន្លងមកបានបង្ហាញថា រឿងអាពាហ៍ពិពាហ៍ចៃដន្យ ដែលនឹងត្រៀមចាក់ផ្សាយនាពេលខាងមុខនេះ ក្រៅពីតួអង្គទាំងពីរនោះ ក៏មានវត្តមានលោក Step អ្នកនាងខាត់ សុឃីម អ្នកស្រីឌី សាវ៉េត ព្រមទាំងតារាជាច្រើននាក់ទៀត ។ ចាត់ទុកថានេះ ជាស្នាដៃទីមួយរបស់ពេជ្រ សូលីកា ក្នុងវិស័យសិល្បៈភាពយន្ត ខណៈនាងជាតារាចម្រៀង ។
ពេជ្រ សូលីកា មិនអាចសុំការបកស្រាយបានឡើយជុំវិញការចូលរួមសម្តែងក្នុងខ្សែវីដេអូភាគឲ្យស្ថានីយទូរទស្សន៍នោះទេ តែកាលពីពេល ថ្មីៗកន្លង នាងទើបតែបង្ហាញវត្តមានក្នុងបទចម្រៀងថ្មីជាមួយលោកនីកូ ។ តាមរយៈខ្សែភាពយន្តដែលនាងចូលរួមសម្តែងនេះ គេរំពឹងថា ពេជ្រ សូលីកា នឹងមានឈ្មោះបោះសំឡេងឡើងវិញក្នុងពិភពសិល្បៈ បន្ទាប់ពីនាងបាត់មុខជាច្រើនឆ្នាំ ។
ពេជ្រ សូលីកា បានដើរចេញពីវិស័យសិល្បៈក្រោមព័ត៌មានថា នាងបានសម្រេចចិត្តរួមរស់ជាមួយបុរសអ្នកមានមួយរូប ស្របពេលដែលនាងបានបង្ហាញភាពហ៊ឺហា និងក្លាយជាថៅកែស្រីកាន់កាប់ហាងមួយ ។
កន្លងមកតារាចម្រៀងមុខស្រស់រូបនេះធ្លាប់អះអាងតាមកញ្ចក់ទូរទស្សន៍នៅក្នុងស្រុកមួយថា នាងនឹងផ្អាកអាជីពសិល្បៈមួយរយៈ ដើម្បីបន្តការសិក្សា ប៉ុន្តែមួយរយៈក្រោយពេលដែលនាងបានប្រកាសនេះ ពេជ្រ សូលីកា ត្រូវគេដឹងថា នៅតែលឹបលម្តងម្កាលនៅក្នុងអាជីពសិល្បៈដដែល គ្រាន់តែនាងហាក់មិនសូវចេញមុខឱ្យបានពេញលេញដូចមុនប៉ុណ្ណោះ ។
សកម្មភាពនេះត្រូវគេសង្ស័យថា ពេជ្រ សូលីកា នៅតែស្រឡាញ់សិល្បៈដដែល ហើយការលាឈប់ពីសិល្បៈរបស់នាងដោយសារតែមូលហេតុបន្តការសិក្សានោះ ទំនងគ្រាន់ជាលេសរបស់នាងប៉ុណ្ណោះ ព្រោះខ្សែជីវិតរបស់នាងកំពុងតែមានភាពត្រចះត្រចង់ ដោយសារតែនាងបានភ្ជាប់និស្ស័យស្នេហ៍ជាមួយបុរសម្នាក់ដែលគេអះអាងថាជាមន្ត្រីធំ ទើបនាងមិនអាចវិលចូលសិល្បៈវិញបាន ។
ជុំវិញបញ្ហានេះពេជ្រ សូលីកា មិនដែលចេញមុខបកស្រាយឱ្យបានច្បាស់លាស់ឡើយ ផ្ទុយទៅវិញក្នុងរយៈពេលចុងក្រោយនេះ គេតែងឧស្សាហ៍ឃើញតារាចម្រៀងរូបនេះបានបង្ហាញសកម្មភាពផ្សេងៗ ដោយភាគច្រើនគេសង្កេតឃើញនាងផ្ញើសារទៅក្រុមអ្នកគាំទ្រតាមរយៈហ្វេសប៊ុកដោយសារតែពេលនេះ នាងបានឃ្លាតឆ្ងាយពីកញ្ចក់ទូរទស្សន៍ ពិបាកក្នុងការប្រាស្រ័យទាក់ទងជាមួយអ្នកគាំទ្រ ទើបនាងសម្រេចចិត្តប្រើវិធីនេះផ្តល់ព័ត៌មានឱ្យអ្នកគាំទ្រ៕
ចែករំលែកព័តមាននេះ