តាមប្រភពពី Bangkok Post បានឱ្យដឹងថា ក្រុមអ្នកស្ម័គ្រចិត្តជួយសង្គ្រោះមួយក្រុម ដែលមិនបានចុះឈ្មោះត្រឹមត្រូវ បានបូមទឹកចេញពីរូងភ្នំខុសបច្ចេកទេស ដែលធ្វើឱ្យទឹកហូរត្រឡប់ចូលទៅក្នុងរូងភ្នំថាំហ្លួង Tham Luang វិញ ។
មេបញ្ជាការក្រុមជួយសង្គ្រោះ លោក Narongsak Osotthanakorn និយាយកាលពីថ្ងៃព្រហស្បត្តិ៍ថា ក្រុមអ្នកជួយសង្គ្រោះខ្លះ ដែលមិនបានមកចុះឈ្មោះត្រឹមត្រូវ ក៏បានមកចូលរួមបូមទឹកចេញពីរូងភ្នំដែរ ។ ពួកគេមិនបានដឹងពីរបៀបច្បាស់ ហើយក៏បណ្តាលឱ្យទឹកដែលបូមចេញនោះ ហូរត្រឡប់ទៅកាន់រូងភ្នំវិញដដែល ។
លោកបានមានប្រសាសន៍ថា «ពួកគេជឿជាក់ថា វិធីដែលគេប្រើមានប្រសិទ្ធភាពខ្ពស់ ។ តែពួកគេមិនបានមកពិគ្រោះយោបល់ជាមួយនឹងពួកយើងសិនទេ» ។ លោកបន្តថា «ពួកយើងបារម្ភរឿងភ្លៀងជាងគេ ។ ពួកយើងកំពុងតែប្រឹងប្រជែងនឹងភ្លៀងហើយ ។ ទឹកបានកំពុងតែហូរចូលក្នុងរូងភ្នំ កាន់តែច្រើនឡើងៗ បើទោះបីជាយើងខំប្រឹងបិទផ្លូវយ៉ាងណាក៏ដោយ» ។
គួរបញ្ជាក់ថា ដោយសារតែការព្រួយបារម្ភពីបញ្ហាភ្លៀង ក្រុមអ្នកជួយសង្គ្រោះកំពុងតែរកវិធីថ្មីត្រៀមទុកពេលមានការប្រែប្រួល ។ ពួកគេកំពុងតែរកផ្លូវចោះពីលើ ដើម្បីជួយសម្រួលដល់ការចាកចេញពីរូងភ្នំរបស់ក្មេងៗ កុំឱ្យពិបាកមុជទឹកចេញមកក្រៅ ៕
ចែករំលែកព័តមាននេះ