ខេត្តបន្ទាយមានជ័យ ៖ តាមសេចក្តីរាយការណ៍ព័ត៌មានបឋមបានឱ្យដឹងថា រថយន្តយីឌុបមួយគ្រឿងបានក្រឡាប់សង្កត់ម៉ូតូក្នុងទិសដៅស្របគ្នា បណ្តាលឱ្យស្ត្រីម្នាក់បានស្លាប់ក្រោមរថយន្ត និងរបួសធ្ងន់ស្រាលជាច្រើននាក់ កាលពីវេលាម៉ោងជិត១១ព្រឹកថ្ងៃទី៦ កក្កដា ឆ្នាំ២០១៨ លើដងផ្លូវជាតិលេខ៥៨…
ខេត្តបន្ទាយមានជ័យ ៖ តាមសេចក្តីរាយការណ៍ព័ត៌មានបឋមបានឱ្យដឹងថា រថយន្តយីឌុបមួយគ្រឿងបានក្រឡាប់សង្កត់ម៉ូតូក្នុងទិសដៅស្របគ្នា បណ្តាលឱ្យស្ត្រីម្នាក់បានស្លាប់ក្រោមរថយន្ត និងរបួសធ្ងន់ស្រាលជាច្រើននាក់ កាលពីវេលាម៉ោងជិត១១ព្រឹកថ្ងៃទី៦ កក្កដា ឆ្នាំ២០១៨ លើដងផ្លូវជាតិលេខ៥៨ នៅភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ។
ជនរងគ្រោះក្នុងហេតុការណ៍នេះរួមមាន អ្នកបើកបរម៉ូតូឈ្មោះម៉ោញ ណា ភេទស្រី អាយុ៣៧ឆ្នាំ ជាប្រពន្ធយោធា បានស្លាប់ ចំណែកអ្នករងរបួស២នាក់ទៀតជាអ្នករួមដំណើរ ក្នុងនោះម្នាក់ឈ្មោះវិញ សារូ ភេទស្រី អាយុ៤៩ឆ្នាំ និងម្នាក់ទៀតឈ្មោះពេក សីហា ភេទប្រុស អាយុ៣ឆ្នាំ ។ ជនរងគ្រោះទាំង៣នាក់រស់ភូមិដំណាក់កកោះ ឃុំស្វាយចេក ស្រុកស្វាយចេក ខេត្តបន្ទាយមានជ័យ។
តាមប្រភពបានឱ្យដឹងថា កម្មករលើរថយន្តបង្កក៏មានរបួស៤ទៅ៥នាក់ផងដែរ បានទៅរកពេទ្យដើម្បីព្យាបាលដោយខ្លួនឯង ចំណែករថយន្តបង្កម៉ាកយីឌុប មានដឹកស៊ីម៉ង់ត៍ ពាក់ស្លាកលេខ ភ្នំពេញ ៣B-៨៣៥៨ មិនស្គាល់អត្តសញ្ញាណអ្នកបើកបរព្រោះរត់គេចខ្លួនបាត់ ។
អ្នកឃើញហេតុការណ៍បាននិយាយថា មុនពេលកើតហេតុ ម៉ូតូរងគ្រោះ និងរថយន្តបង្កធ្វើដំណើរស្របទិសគ្នាក្នុងទិសដៅពីជើងទៅត្បូង លុះមកដល់កន្លែងកើតហេតុ រថយន្តបានបួងចង្កូតជ្រុលទៅខាងកើត សង្ស័យភ័យខ្លាចធ្លាក់ស្នាមភ្លោះ ក៏បួងចង្កូតមកខាងស្តាំដៃវិញទាំងល្បឿនលឿនក៏បកក្បាលទៅទិសខាងជើងវិញ ហើយបានក្រឡាប់រថយន្តសង្កត់លើម៉ូតូជនរងគ្រោះដែលកំពុងបើកបរ បណ្តាលឱ្យស្លាប់អ្នកបើកបរម៉ូតូ ចំណែកអ្នករួមដំណើរ២នាក់ទៀតបានរងរបួស រីឯអ្នកបើកបររថយន្តរត់គេចខ្លួនបាត់ ។ ព័ត៌មានលម្អិតនឹងមានផ្សាយលើទំព័រកាសែតកោះសន្តិភាព ៕
ចែករំលែកព័តមាននេះ