ខេត្តកំពង់ស្ពឺ ៖ យុវជន២នាក់ត្រូវបានរថយន្តកិនស្លាប់មួយរំពេច បន្ទាប់ពីអ្នកទាំង២បានជិះម៉ូតូមួយគ្រឿងយ៉ាងលឿនហើយរអិលដួលចូលក្រោមរថយន្ត ។ ហេតុការណ៍គ្រោះថ្នាក់ចរាចរណ៍គួរឱ្យរន្ធត់នេះបានកើតឡើងកាលពីវេលាម៉ោង៦និង២០នាទីយប់ថ្ងៃទី៥ កក្កដា ឆ្នាំ២០១៨ ស្ថិតនៅលើផ្លូវជាតិលេខ៤ ចន្លោះគីឡូម៉ែត្រលេខ៥២-៥៣ ត្រង់ចំណុចភូមិបុស្សតានៃ ឃុំកាហែង ស្រុកសំរោងទង ខេត្តកំពង់ស្ពឺ។ជនរងគ្រោះទាំង២នាក់ដែលស្លាប់រួមមាន ឈ្មោះ ប៊ុន សុខុម ភេទប្រុស អាយុ២២ឆ្នាំ ជាអ្នកបើកបរ និងឈ្មោះ អ៊ុន សីហា ភេទប្រុស អាយុ២៤ឆ្នាំ ជាអ្នករួមដំណើរ ។ ទាំងពីរនាក់រស់នៅភូមិសំរិត ឃុំតាំងក្រូច ស្រុកសំរោងទង ខេត្តកំពង់ស្ពឺ។ ចំណែកម៉ូតូមួយគ្រឿងរបស់ជនរងគ្រោះម៉ាក EXCITER ពណ៍ខ្មៅ គ្មានផ្លាកលេខ ។ រីឯភាគីខាងរថយន្តម៉ាក FUSO ពណ៌ខៀវ ពាក់ផ្លាកលេខតាកែវ ៣A-១៧៧២ មានសណ្ដោងរ៉ឺម៉ក ។ អ្នកបើកបររថយន្តមិនត្រូវបានគេស្គាល់អត្តសញ្ញាណនោះទេ ហើយបានរត់គេចខ្លួនបាត់ ។ប្រភពព័ត៌មានពីសមត្ថកិច្ចបានអោយដឹងថា យោងតាមការសាកសួរសាក្សីដែលឃើញហេតុការណ៍បានអោយដឹងថា មុនពេលកើតហេតុ គេឃើញបុរស២នាក់ជិះម៉ូតូមួយគ្រឿង ម៉ាកEXCITER ពណ៍ខ្មៅ គ្មានស្លកលេខ បើកចេញពីរោងចក្រមួយកន្លែងដែលនៅខាងត្បូងផ្លូវសំដៅឡើងទៅផ្លូវជាតិលេខ៤ ក្នុងទិសដៅពីត្បូងទៅជើង ពេលនោះមានរថយន្តមួយគ្រឿងម៉ាក FUSO មានសណ្តោងរ៉ឺម៉ក បើកបរមកពីទិសខាង
លិច (អែបស្តាំដៃ) ហើយអ្នកបើកម៉ូតូនោះក៏បានជាន់ហ្វ្រាំងរួចហើយក៏រអិលដួលចូលក្រោមរថយន្ដត្រូវរថយន្តកិនស្លាប់ទាំង២នាក់តែម្តង ចំណែកអ្នកបើកបររថយន្តបានរត់គេចខ្លួនបាត់ ។
ក្រោយកើតហេតុ អ្នកឃើញហេតុការណ៍បានរាយការណ៍មកសមត្ថកិច្ចដើម្បីចុះទៅធ្វើកំណត់ហេតុវាស់វែង និងបាននាំយករថយន្ត និងម៉ូតូមករក្សានៅការិយាល័យនគរបាលចរាចរណ៍ ដើម្បីចាត់ការតាមនីតិវិធី ។ រីឯសពជនរងគ្រោះទាំង២នាក់ត្រូវបានសមត្ថកិច្ចប្រគល់អោយសាច់ញាតិដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ