ទីក្រុងប៉េកាំង ៖ ក្រសួងហិរញ្ញវត្ថុចិនបាននិយាយកាលពីថ្ងៃពុធថា ប្រទេសចិននឹងមិនបាញ់គ្រាប់ដំបូងជាដាច់ខាតនៅក្នុងសង្គ្រាមពាណិជ្ជកម្មជាមួយសហរដ្ឋអាមេរិក ហើយក៏នឹងមិនដាក់ពន្ធដំបូងដែរ ។
តាមប្រភពមួយថា ការគំរាមកំហែងរបស់ប្រទេសចិនថា នឹងដាក់ពន្ធលើផលិតផលអាមេរិកប្រមាណ៣៤ប៊ីលានដុល្លារ នឹងអនុម័តចាប់ពីថ្ងៃសុក្រនេះទៅ ឬមុនសហរដ្ឋអាមេរិក១២ម៉ោង ។
ប៉ុន្តែក្រសួងនេះបានចេញមុខបកស្រាយវិញថា ៖« គោលជំហររបស់រដ្ឋាភិបាលចិនបានលើកឡើងជាច្រើនដងមកហើយ ។ ពួកយើងនឹងមិនបាញ់គ្រាប់ដំបូងជាដាច់ខាតក្នុងសង្គ្រាមពាណិជ្ជកម្ម ហើយយើងនឹងមិនអនុម័តពន្ធមុនសហរដ្ឋអាមេរិកទេ » ។
ទីក្រុងវ៉ាស៊ីនតោនបាននិយាយថា ពួកគេនឹងអនុវត្តពន្ធលើផលិតផលចិនប្រមាណ៣៤ប៊ីលានដុល្លារនៅថ្ងៃទី៦ ខែកក្កដានេះ ខណៈប្រទេសចិនសន្យាថា នឹងដាក់ពន្ធឆ្លើយតបវិញនៅថ្ងៃតែមួយ ។
អ្នកនាំពាក្យក្រសួងការបរទេសចិន លោក Lu Kang ធ្លាប់បាននិយាយថា ប្រទេសចិនបានត្រៀមខ្លួនរួចជាស្រេចក្នុងការចេញសកម្មភាពឆ្លើយតបវិញ ប៉ុន្តែលោកមិនបានបញ្ជាក់ពីកាលបរិច្ឆេទនៃការអនុវត្តពន្ធនេះទេ ។
កាលពីថ្ងៃពុធនេះ តម្លៃប្រាក់យាន់របស់ប្រទេសចិនបានកើនឡើងយ៉ាងខ្លាំង បើធៀបនឹងប្រាក់ដុល្លារ ។ ធនាគារជាតិធានាថា ទីផ្សារនឹងរក្សារូបិយប័ណ្ណឲ្យនៅហ្នឹង បើទោះជាមានការព្រួយបារម្ភពីជម្លោះពាណិជ្ជកម្មក៏ដោយ ។ ទោះជាយ៉ាងណា តម្លៃភាគហ៊ុនចិនបានធ្លាក់ចុះ ។
សារព័ត៌មានចិនបានបន្តរិះគន់សហរដ្ឋអាមេរិកកាលពីថ្ងៃទី៤ កក្កដា ថា សហរដ្ឋអាមេរិកមានគោលបំណងទប់ស្កាត់ចិន មិនឲ្យអភិវឌ្ឍន៍ ដើម្បីចៀសវាងមិនឲ្យចិនប្រជែងជាមួយតួនាទីរបស់សហរដ្ឋអាមេរិកក្នុងសេដ្ឋកិច្ចពិភពលោក ៕
ចែករំលែកព័តមាននេះ