រាជធានីភ្នំពេញ ៖ អ្នកប្រកបមុខរបរ បោះពុម្ពស្លាកសញ្ញាលើអាវយឺត មួក និងព្រីនផ្ទាំងប៉ាដា និងស្ទីគ័របិទនានា កំពុងតែមមាញឹកនឹងការងារអាជីវកម្មរបស់ពួកគេ ដោយសារតែអំឡុងពេលនេះ ជារដូវកាលឃោសនាបោះឆ្នោត…
រាជធានីភ្នំពេញ ៖ អ្នកប្រកបមុខរបរ បោះពុម្ពស្លាកសញ្ញាលើអាវយឺត មួក និងព្រីនផ្ទាំងប៉ាដា និងស្ទីគ័របិទនានា កំពុងតែមមាញឹកនឹងការងារអាជីវកម្មរបស់ពួកគេ ដោយសារតែអំឡុងពេលនេះ ជារដូវកាលឃោសនាបោះឆ្នោត ដែលមានការកុម្មង់ធ្វើស្លាក និងផ្ទាំងប៉ាដា ព្រមទាំងផលិតផលផ្សេងៗយ៉ាងច្រើន ។
អ្នកស្រី បូរី ជាម្ចាស់ហាងដៃឯក បោះពុម្ព និងប៉ាក់ ដែលមានទីតាំងនៅតាមបណ្តោយមហាវិថីព្រះនរោត្តម ក្នុងសង្កាត់បឹងកេងកង១ ខណ្ឌចំការមន បាននិយាយនៅព្រឹកថ្ងៃទី៤ កក្កដា ថា ចាប់ពីខែមិថុនាមក មុខរបរបោះពុម្ពស្លាកសញ្ញាលើអាវយឺតរបស់គាត់ទទួលបានការកុម្មង់ ធ្វើ និងទិញជាច្រើន ។ ក្នុង១ថ្ងៃៗអាចមានការកុម្មង់បោះពុម្ពលើអាវប្រមាណជា១ពាន់ ទៅ២ពាន់អាវ ហើយថ្ងៃខ្លះ អាចទទួលបានការកុម្មង់ទិញរហូតដល់៥ពាន់អាវទៀតផង ។
អ្នកស្រីបន្តថា ៖« ឲ្យតែដល់រដូវកាលបោះឆ្នោតម្តងៗ ការបោះពុម្ពនៅរោងពុម្ពរបស់ខ្ញុំមានភាពមមាញឹកខ្លាំង ដោយសារជារដូវកាលមានតម្រូវការខ្ពស់លើអាវយឺត មួក និងផលិតផលដទៃទៀត » ។ អ្នកស្រីបន្តថា ៖« ការបោះពុម្ពច្រើនបែបនេះ ក៏ទទួលបានការបញ្ចុះតម្លៃពិសេសពីហាងរបស់ខ្ញុំផងដែរ » ។
លើកឡើងដូចគ្នាផងដែរ អ្នកស្រី រតនា វង្ស ជាម្ចាស់ហាងវឌ្ឍនៈបោះពុម្ព និងប៉ាក់ ដែលមានទីតាំងនៅមហាវិថីព្រះនរោត្តម ក្នុងសង្កាត់បឹងកេងកង ខណ្ឌចំការមន ក្បែរវិមានឯករាជ្យ លើកឡើងថា មួយរយៈនេះ មុខរបររបស់គាត់ពិតជាល្អប្រសើរខ្លាំង ដោយមានការកុម្មង់ទិញពីអតិថិជន ប្រមាណជា១ពាន់អាវជារៀងរាល់ថ្ងៃ ។
អ្នកស្រីបន្ថែមថា ៖« ការបោះពុម្ពតែងតែកាក់កបក្នុងរដូវកាលបែបនេះ ហើយពេលបញ្ចប់រដូវកាល ការបោះពុម្ពក៏មានភាពស្ងប់ស្ងាត់ផងដែរ » ។
យុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៦ នឹងចាប់ផ្ដើមក្នុងរយៈពេល២១ថ្ងៃ ដោយចាប់ផ្ដើមពីថ្ងៃទី៧ ខែកក្កដា ដល់ថ្ងៃទី២៧ កក្កដា ឆ្នាំ២០១៨ខាងមុខនេះ ខណៈការបោះឆ្នោតនឹងចាប់ផ្ដើមនៅថ្ងៃអាទិត្យ ទី២៩ ខែកក្កដា ឆ្នាំ២០១៨ ដោយមានគណបក្សចំនួន២០ ចូលរួមប្រកួតប្រជែង ៕
ចែករំលែកព័តមាននេះ