ខេត្តព្រៃវែង ៖ សេចក្តីរាយការណ៍ឱ្យដឹងថា យុវជនម្នាក់ត្រូវគូបក្សដិបក្សចាក់មួយកាំបិត បណ្តាលឱ្យធ្លាយពោះវៀនចេញមកក្រៅទាំងទ្រេល ហើយត្រូវបានក្រុមគ្រួសារដឹកយកទៅសង្គ្រោះភ្លាមៗ កើតឡើងកាលពីវេលាម៉ោង៦ និង៣០នាទីល្ងាចថ្ងៃទី៥ កក្តដា នៅចំណុចលើកំណាត់ផ្លូវលេខ៣១២ ខាងជើងផ្សារទ្រាចំងាយ១០០ម៉ែត្រ ក្នុងភូមិព្រៃមាស ឃុំអង្គររាជ្យ ស្រុកព្រះស្តេច ខេត្តព្រៃវែង ។
សេចក្តីរាយការណ៍បន្តថា ជនរងគ្រោះឈ្មោះ ទឹម ភីរ៉ា ភេទប្រុស អាយុ១៨ឆ្នាំ មានទីលំនៅក្នុងភូមិបឹងកំពត ឃុំបន្ទាយចក្រី ស្រុកព្រះស្តេច ត្រូវជនបង្កចាក់ត្រូវមួយកាំបិតចំពោះធ្លាយពោះវៀនចេញមកក្រៅមួយទ្រេល។ ចំណែកជនបង្កឈ្មោះ ឈួន សុភី ភេទប្រុស អាយុ២៣ឆ្នាំ មានទីលំនៅក្នុងភូមិក្រសាំងទង ឃុំអង្គររាជ្យ ស្រុកព្រះស្តេច បានរត់គេចខ្លួនបាត់ក្រោយពីកើតហេតុ។
ប្រភពពីសមត្ថកិច្ចបានបញ្ជាក់ថា យុវជនរងគ្រោះនិងជនបង្ក គឺជាគូជម្លោះ ហើយកន្លងមកធ្លាប់វ៉ៃគ្នា ទើបបង្កើតទៅជាការចងគំនុំគុំគួន ។ មកដល់ថ្ងៃកើតហេតុ ពេលជួបប្រទះគ្នាដោយចៃដន្យ នៅកណ្តាលផ្លូវទើបមានការប្រទូស្តរ៉ាយគ្នាកើតឡើង ប៉ុន្តែដោយខាងជនបង្កមានកូនកាំបិតចុងស្រួចនៅក្នុងដៃ ក៏បានចាក់ទៅលើយុវជនរងគ្រោះ បណ្តាលឱ្យរងរបួសធ្លាយពោះវៀនចេញមកក្រៅភ្លាមៗតែម្តង។
ចែករំលែកព័តមាននេះ