អ្នកវិនិយោគផ្នែកទេសចរណ៍របស់សិង្ហបុរី មានគំរោងសង់កំពង់ផែទេសចរណ៍នៅលើកោះ ដ៏ធំមួយក្នុងដែនសមុទ្រវៀតណាម ដើម្បីអភិវឌ្ឍន៍ផ្នែកទេសចរណ៍នៅក្នុងតំបន់។ ក្រុមអ្នក វិនិយោគប្រទេសសិង្ហបុរីចំនួន១២នាក់ បានធ្វើដំណើរទៅប្រទេសវៀតណាម កាលពីថ្ងៃទី១ សីហា ត្រួតពិនិត្យមើលតំបន់នៅលើកោះត្រល់ ឬហ្វ៊ូគួច ក្នុងខេត្ដគៀនយ៉ាង និងកំពង់ផែទៀន សា ក្រុងដាណាង ដែលបច្ចុប្បន្នជាកំពង់ផែពាណិជ្ជកម្មដ៏ធំបំផុត នៅប៉ែកកណ្ដាល និងជាប្រភពទេសចរណ៍ដ៏សំខាន់នៃនាវាទេសចរណ៍ប្រទេសផ្សេងៗនៅទូទាំងពិភពលោក ។
គណៈប្រតិភូអ្នកវិនិយោគសិង្ហបុរីនឹងធ្វើដំណើរទៅតំបន់ជាច្រើនរួមទាំងតំបន់ញ៉ាចាង ក្រុងហូជីមិញ និងខេត្ដបារីយ៉ាវុងតាវ ។ នេះបើយោងតាមរបាយការណ៍របស់កាសែតសេដ្ឋកិច្ច វៀតណាម ។ លោកង្វៀន អាញធូន នាយកផែនការទេសចរណ៍វៀតណាម (VNAT) ឱ្យដឹងថា នឹងមានផែនការដ៏ច្បាស់លាស់មួយនៅក្នុងខែកញ្ញាខាងមុខ ទាក់ទិននឹងផែនការអភិវឌ្ឍ និងវិនិយោគទុនផ្សេងៗទៀត។
កាលពីឆ្នាំមុនក្រុមប្រតិភូវិនិយោគទុនសិង្ហបុរី បានធ្វើការត្រួតពិនិត្យដែនសមុទ្រនៅដាណាងក្នុងខេត្ដធួកធៀនហួ និងមានការយល់ឃើញជាដំបូងថា គួរសាងសង់កំពង់ផែទេសចរណ៍ខ្នាតធំនៅកំពង់ផែទៀនសា ដែលអាចទទួលនាវាទេសចរណ៍ខ្នាតធំបាន។ ប្រទេសសិង្ហបុរី ជាគោលដៅដ៏ធំមួយនៃនាវាទេសចរណ៍ នៅទូទាំងពិភពលោក ខណៈដែលក្រុងដាណាង និងហូជីមិញ កំពុងក្លាយជាគោលដៅមួយនៃនាវាទេសចរដែលដឹកនាំភ្ញៀវទេសចរណ៍ពីអាមេរិកខាងជើង និងអឺរ៉ុបឆៀងចូលទស្សនា។
តាមស្ថិតិផ្លូវការក្នុងរយៈពេល៧ខែដំបូង នៃឆ្នាំ២០១០ មានភ្ញៀវទេសចរតាមនាវាទេស ចរណ៍ចូលទៅវៀតណាម ចំនួន២៨.០០០នាក់ ដោយចំនួននេះមានការកើនឡើងខ្ពស់ជាង
រៀងរាល់ឆ្នាំ ។ ទោះបីជាយ៉ាងណាក៏ដោយរដ្ឋាភិបាលវៀតណាម នឹងពិចារណាផែនការវិនិយោគនៅលើ កោះត្រល់ ឱ្យមានភាពប្រាកដប្រជាសំរាប់រក្សាស្ថានភាពបរិស្ថានឱ្យមានលក្ខណៈល្អប្រសើរ និងមិនធ្វើឱ្យប៉ះពាល់ដល់សុខភាពប្រជាជន ។ តាមទីភ្នាក់ងារព័ត៌មានរបស់អាជ្ញាធរវៀតណាម ឱ្យដឹងថា នៅលើកោះហ្វ៊ូគួក ដែលខ្មែរគ្រប់រូបស្គាល់ថា ជាកោះត្រល់ ក្រៅពីមានឆ្នេរខ្សាច់ល្អ គឺទឹកមានលក្ខណៈថ្លា និងជាទីប្រជុំផ្កាថ្មដ៏ស្រស់ស្អាត ៕
ចែករំលែកព័តមាននេះ