ទីក្រុងញូវដែលី ៖ លោក Raghu Reddy ប្រធានផ្នែកលក់ទូរស័ព្ទស្មាតហ្វូនតាមអនឡាញរបស់ក្រុមហ៊ុន Xiaomi ប្រចាំប្រទេសឥណ្ឌា បានឲ្យដឹងថា ឥណ្ឌាអាចនឹងក្លាយជាប្រទេសលក់ស្មាតហ្វូនបានច្រើនជាងគេលេខ២លើពិភពលោក…
ទីក្រុងញូវដែលី ៖ លោក Raghu Reddy ប្រធានផ្នែកលក់ទូរស័ព្ទស្មាតហ្វូនតាមអនឡាញរបស់ក្រុមហ៊ុន Xiaomi ប្រចាំប្រទេសឥណ្ឌា បានឲ្យដឹងថា ឥណ្ឌាអាចនឹងក្លាយជាប្រទេសលក់ស្មាតហ្វូនបានច្រើនជាងគេលេខ២លើពិភពលោក ប្រសិនបើការលក់នៅតែបន្តកើនឡើងដូចពេលបច្ចុប្បន្ននេះ ។ កាលពីឆ្នាំ២០១៧ ការលក់ស្មាតហ្វូនក្នុងប្រទេសឥណ្ឌាបានកើនឡើងប្រមាណ១០% ។
លោក Raghu Reddy បានមានប្រសាសន៍ថា៖ « ប្រទេសឥណ្ឌានឹងអាចយកឈ្នះសហរដ្ឋអាមេរិក ហើយក្លាយជាទីផ្សារស្មាតហ្វូនធំជាងគេលេខ២លើពិភពលោក បន្ទាប់ពីប្រទេសចិន » ។ លោកបន្តថា តម្លៃស្មាតហ្វូននាពេលបច្ចុប្បន្ននេះ គឺ១គ្រឿងស្មើពី១៤៥ដុល្លារ ទៅ២៩០ដុល្លារអាមេរិក ។ ក្រុមហ៊ុនរបស់លោក គឺជាក្រុមហ៊ុនលក់ស្មាតហ្វូនធំជាងគេក្នុងប្រទេសឥណ្ឌា ដោយការលក់បានកើនឡើងជាង៣០០%ឯណោះកាលពីឆ្នាំ២០១៧ ហើយក្រុមហ៊ុនគ្រប់គ្រងទីផ្សារនេះបានជាង៣០% ។
លោក Raghu Reddy បន្ថែមទៀតថា ៖ «ពួកយើងគឺជាក្រុមហ៊ុនស្មាតហ្វូនធំមួយនៅក្នុងប្រទេសនេះ អស់រយៈពេល៣ត្រីមាសមកហើយ តាំងពីខែកញ្ញា ឆ្នាំ២០១៧មកម្ល៉េះ » ។ នាពេលថ្មីៗនេះ ក្រុមហ៊ុន Xiaomi បានបង្កើតរោងចក្រផលិតស្មាតហ្វូនរបស់ខ្លួននៅក្នុងប្រទេសឥណ្ឌាផងដែរ ។ បច្ចុប្បន្ន ក្រុមហ៊ុននេះមានរោងចក្រចំនួន៦កន្លែងនៅតំបន់ Andhra Pradesh, Tamil Nadu និង Uttar Pradesh ជាដើម ៕
ចែករំលែកព័តមាននេះ