រាជធានីភ្នំពេញ ៖ ការប្រើប្រាស់ប្រព័ន្ធ អុីនធើរណេត ពិតជាបានផ្ដល់ផលវិជ្ជមានច្រើនដល់ខ្លួនឯង និងសង្គមជាតិ ក៏ប៉ុន្តែវាក៏នឹងអាចនាំទុក្ខដាក់ខ្លួន ឬធ្វើឲ្យសង្គមវឹកវរបានដែរ បើសិនជាអ្នកប្រើប្រាស់ខ្វះការពិចារណា និងពុំបានឈ្វេងយល់ស៊ីជម្រៅពីបច្ចេកវិទ្យានេះ ។ ម្យ៉ាងទៀត កុមារដែលប្រើប្រាស់ទូរស័ព្ទទំនើប ដែលមានភ្ជាប់ប្រព័ន្ធអុីនធើរណេត ក៏ប្រឈមនឹងហានិភ័យខ្ពស់ផងដែរ ចំពោះសតិអារម្មណ៍ ក្នុងករណីពួកគេប្រើប្រាស់ហួសកំណត់ ដូចជានៅលេងទូរស័ព្ទរាប់ម៉ោង ដោយមិនរវល់នឹងរឿងផ្សេងទៀត ។
បើតាមរបាយការណ៍របស់អង្គការសកម្មភាពដើម្បីកុមារ ដែលបាននិងកំពុងធ្វើសកម្មភាពនេះបានបញ្ជាក់ថា អ្នកប្រើប្រាស់ទូរស័ព្ទទំនើបនៅកម្ពុជា ជាពិសេសកុមារ អាចក្លាយជាជនរងគ្រោះនៃការរំលោភបំពានតាមប្រព័ន្ធ Internet ខណៈដែលការយល់ដឹងរបស់ពួកគេនៅមានកម្រិត ។
បើតាមការលើកឡើងរបស់លោក សំលៀង សីលា នាយកអង្គការសកម្មភាពដើម្បីកុមារហៅកាត់ថា APLE បានឲ្យដឹងថា ស្របពេលដែលបច្ចេកវិទ្យាកាន់តែមានភាពរីកចម្រើន និងការប្រើប្រាស់ទូរស័ព្ទដៃទំនើបកំពុងមានការពេញនិយមនោះ អំពើកេងប្រវ័ញ្ចផ្លូវភេទលើកុមារតាមប្រព័ន្ធInternetបាននិងកំពុងក្លាយជាក្តីបារម្ភថ្មីមួយទៀតនៅក្នុងយុគសម័យទំនើបនេះ។ នៅមានមនុស្សជាច្រើនមិនទាន់បានដឹងពីទំហំនៃហានិភ័យពីការរំលោភបំពានតាមប្រព័ន្ធអុីនធើរណេតនោះទេ ។
លោកបន្តថា ចាប់តាំងពីចុងឆ្នាំ២០១៥ អង្គការបានទទួលការរាយការណ៍ពីសាធារណជនពីការរំលោភបំពានតាមប្រព័ន្ធអុីនធើរណេតចំនួន២៥១ករណី ក្នុងនោះការបញ្ជូនរូបភាពអាសអាភាសកុមារមានប្រមាណ៣០% ។ លោកបញ្ជាក់ថា ក្នុងចំណោមករណីទាំងនេះ ក៏មានបទល្មើសជំរិតយកប្រាក់តាមរយៈរូបភាពអាសអាភាសទាំងនេះដែរ ។
សូមបញ្ជាក់ផងដែរថា ចំពោះកុមារតូចៗ ដែលប្រើប្រាស់ប្រព័ន្ធទូរស័ព្ទ ទាំងខ្លួននៅវ័យមិនអនុញ្ញាតឲ្យប្រើប្រាស់ ក៏មានផលប៉ះពាល់ខ្លាំងដែរទៅលើប្រព័ន្ធភ្នែករបស់ពួកគេ និងធ្វើឲ្យសតិអារម្មណ៍ពួកគេខុសប្រក្រតី ។ មានការព្រមានមួយបានលើកឡើងថា បើមិនចង់ឲ្យកូនមិនចេះនិយាយ សូមកុំបណ្ដោយឲ្យកូនលេងទូរស័ព្ទច្រើនពេក បើកាលណាពួកគេបានទូរស័ព្ទលេង ឬមើលអ្វីដែលគេចង់មើលនោះ គឺគេនឹងលែងនិយាយអ្វីទាំងអស់ ហើយអារម្មណ៍ និងស្មារតីគេផ្ដោតតែលើទូរស័ព្ទមួយប៉ុណ្ណោះ ដូចនេះហើយ វាប្រឈមនឹងហានិភ័យខ្ពស់ចំពោះមាតាបិតា ។
មួយវិញទៀត បច្ចុប្បន្ននេះ គេសង្កេតឃើញថា មានកុមារតូចៗត្រូវប្រើវ៉ែនតាជំនួយភ្នែកបាត់ទៅហើយ ពីព្រោះតែពួកគេត្រូវសម្លឹងមើលឧបករណ៍អេឡិចត្រូនិកហួសកម្រិត ដែលធ្វើឲ្យពន្លឺចេញពីឧបករណ៍អេឡិចត្រូនិកនោះ ទៅបំផ្លាញភាពច្បាស់របស់ភ្នែក ធ្វើឲ្យពួកគេស្រវឹង និងទាមទារឲ្យមានជំនួយពីវ៉ែនតា ។
គួរបញ្ជាក់ថា យោងតាមរបាយការណ៍របស់និយ័តករទូរគមនាគមន៍កម្ពុជា គិតត្រឹមខែមេសា ឆ្នាំ២០១៨ ចំនួនអ្នកប្រើប្រាស់អុីនធើរណេតនៅប្រទេសកម្ពុជា បានកើនឡើងដល់ជិត១១លាននាក់ កើនឡើងជិត៥០% បើធៀបទៅនឹងឆ្នាំ២០១៤ ។ ក្នុងនោះកុមារអាយុពី១៣ ដល់១៧ឆ្នាំ ដែលប្រើប្រាស់អុីនធើរណេត មានចំនួនជាង៦សែននាក់ ៕
ចែករំលែកព័តមាននេះ