រាជធានីភ្នំពេញ ៖ មន្ត្រីក្រសួងសាធារណការ និងដឹកជញ្ជូនបានឲ្យដឹងថា ពេលនេះ ក្រុមហ៊ុនចិនកំពុងសិក្សាពីការសាងសង់ខ្សែរថភ្លើង ល្បឿនលឿនពីរាជធានីភ្នំពេញឆ្ពោះទៅកាន់ខេត្តសៀមរាប និងតភ្ជាប់ទៅកាន់ក្រុងប៉ោយប៉ែត ខេត្តបន្ទាយមានជ័យ ជាគម្រោងស្ថិតនៅក្នុងផែនការមេដែលបានសិក្សាដោយទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ ហៅកាត់ថា KOICA ។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ និងដឹកជញ្ជូន បានមានប្រសាសន៍តាមទូរស័ព្ទកាលពីថ្ងៃទី៣ កក្កដា ថា នៅក្នុងផែនការមេរបស់ទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ (KOICA) បានសិក្សាពីគម្រោងនេះរួចហើយ ហើយពេលនេះ ក្រុមហ៊ុនចិនបាននិងកំពុងសិក្សាពីលទ្ធភាព ដើម្បីវិនិយោគសាងសង់ផ្លូវរថភ្លើងល្បឿនលឿនទៅកាន់ខេត្តសៀមរាប និងក្រុងប៉ោយប៉ែតផងដែរ ។
ទោះជាយ៉ាងណា លោកថា ៖« ខ្ញុំមិនទាន់អាចបញ្ជាក់បានថា ការសិក្សារបស់ក្រុមហ៊ុនចិនទាំងនោះនឹងបញ្ចប់នៅពេលណាទេ ហើយការសាងសង់នឹងចាប់ផ្តើមនៅពេលណាជាក់លាក់នៅឡើយទេ » ។ លោកថា ៖« ប្រទេសយើងបានឈានដល់ដំណាក់កាលថ្មីមួយក្នុងការអភិវឌ្ឍសេដ្ឋកិច្ចសង្គមរបស់ខ្លួន តាមរយៈការសាងសង់ហេដ្ឋារចនាសម្ព័ន្ធថែមទៀត ដើម្បីជំរុញកំណើនសេដ្ឋកិច្ចជាតិ » ។
លោក វ៉ាស៊ឹម សុរិយា បានបន្តថា បើចង់អភិវឌ្ឍន៍សេដ្ឋកិច្ចរបស់យើងទៅកាន់លំដាប់ថ្មី កម្ពុជាត្រូវការវិនិយោគលើហេដ្ឋារចនាសម្ព័ន្ធទាំងនោះ ប៉ុន្តែវាត្រូវការការវិនិយោគលើទឹកប្រាក់ដ៏ច្រើន ដើម្បីដំណើរការហេដ្ឋារចនាសម្ព័ន្ធចាំបាច់ ក្នុងការធ្វើសមាហរណកម្មផ្ទៃក្នុងប្រទេស និងជាមួយបណ្តាប្រទេសក្នុងតំបន់ ។
លោកបណ្ឌិត វ៉ាន់ វ៉ាត អ្នកឯកទេសផ្នែកនគរូបនីយកម្ម បានថ្លែងថា ការវិនិយោគលើបណ្តាញផ្លូវដែក ឬហេដ្ឋារចនាសម្ព័ន្ធដទៃទៀត ពិតជារឿងប្រសើរ ដែលជួយសម្រួលចរាចរណ៍ ការតភ្ជាប់ការដឹកជញ្ជូន ការកាត់បន្ថយពេលវេលាក្នុងការធ្វើដំណើរ ដែលជាការផ្តល់ជម្រើសថ្មីដល់ប្រជាពលរដ្ឋក្នុងការធ្វើដំណើរ ក៏ដូចជាចូលរួមកាត់បន្ថយអត្រាគ្រោះថ្នាក់ចរាចរណ៍ផងដែរ ។
លោកបន្តថា ៖« បើសិនជាសិក្សាបញ្ចប់ ផ្លូវរថភ្លើងល្បឿនលឿននេះ នឹងជាគម្រោងដែលមានការចំណាយច្រើនលើសលប់មួយ ដែលត្រូវមានការវិនិយោគពីវិស័យឯកជន ទើបគម្រោងក្នុងសុបិននេះអាចដំណើរការបាន » ។
បើតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងប្រាប់អ្នកសារព័ត៌មានកន្លងមកថា ៖«សព្វថ្ងៃនេះ មានផ្នែកឯកជនចង់សិក្សាពីផ្លូវដែកល្បឿនលឿនពីភ្នំពេញទៅសៀមរាប, ពីសៀមរាបទៅប៉ោយប៉ែត និងពីភ្នំពេញទៅបាវិត ។ អីចឹង យើងកំពុងតែពិភាក្សាគ្នា បើផ្នែកឯកជនចង់វិនិយោគជាប្រភេទBOT (Build Operate Transfter ) ខ្ញុំអនុញ្ញាតឲ្យសិក្សា និងឲ្យវិនិយោគលើផ្លូវដែកនេះ ។ មិនថាវិនិយោគិនមកពីប្រទេសណានោះទេ ឲ្យតែមកវិនិយោគ ហើយគោរពច្បាប់របស់ព្រះរាជាណាចក្រកម្ពុជា យើងស្វាគមន៍ទាំងអស់ ហើយរាជរដ្ឋាភិបាលគាំទ្រ១០០% » ។
លោកទេសរដ្ឋមន្ត្រីបញ្ជាក់ថា ៖« យើងធ្វើការសិក្សាផែនការមេផ្លូវដែករបស់កម្ពុជាបានចប់សព្វគ្រប់អស់ហើយ ដោយសហការជាមួយទីភ្នាក់ងារសហប្រតិបត្តិការអន្តរជាតិនៃប្រទេសកូរ៉េ (KOICA) ប៉ុន្ដែយើងរង់ចាំតែអ្នកវិនិយោគឲ្យគេមកបណ្ដាក់ទុនប៉ុណ្ណោះ » ៕
ចែករំលែកព័តមាននេះ