មិនសរសើរមិនបាន ជិះកង់ពីភ្នំពេញមកមើលម្តាយឈឺនៅពេទ្យស្រុកបាធាយ
- កំពង់ចាម
ខេត្តកំពង់ចាម ៖ រហូតមកដល់ព្រឹកថ្ងៃទី០៤ កក្កដា ២០១៨ ស្ត្រីឈ្មោះ បិន ហេន អាយុ៤៨ឆ្នាំ ដែលមានជីវភាពក្រីក្រ…
ខេត្តកំពង់ចាម ៖ រហូតមកដល់ព្រឹកថ្ងៃទី០៤ កក្កដា ២០១៨ ស្ត្រីឈ្មោះ បិន ហេន អាយុ៤៨ឆ្នាំ ដែលមានជីវភាពក្រីក្រ…
ខេត្តកំពង់ចាម ៖ រហូតមកដល់ព្រឹកថ្ងៃទី០៤ កក្កដា ២០១៨ ស្ត្រីឈ្មោះ បិន ហេន អាយុ៤៨ឆ្នាំ ដែលមានជីវភាពក្រីក្រ កើតជំងឺខ្វះគ្រាប់ឈាម និងហើមភ្នែកលឹបមួយចំហៀង បានធូរស្រាលបន្តិចហើយ
ដោយត្រូវបានក្រុមគ្រូពេទ្យជួយព្យាបាល នៅក្នុងមន្ទីរពេទ្យបង្អែកស្រុកបាធាយនោះ ហើយគាត់ថែម
ទាំងមានជីវភាពក្រីក្រថែមទៀតផង។ អន្ទិត គា ប្រុស អាយុ២១ឆ្នាំ មានទីលំនៅភូមិកំប៉ាល ឃុំសណ្តែក ស្រុកបាធាយ ជាកូនទី៤ក្នុងចំណោមបងប្អូន៥នាក់បានប្រាប់ឲ្យដឹងថា ក្រោយពីបានសឹកពីព្រះសង្ឃវិញ រូបគេបានទៅរៀនដេរពូក និងសាឡុងនៅរាជធានីភ្នំពេញ បានជាង២ខែហើយដែរ។
ជាមួយនោះក្រៅពី ទំនេរការងារក៏បានឆ្លៀតទៅរៀនភាសាអង់គ្លេស១ម៉ោងៗរួមនឹងរៀនកំព្យូទ័រនៅពេលល្ងាច ដើម្បីឲ្យមានចំណេះដឹងក្នុងខ្លួនព្រោះតែធ្លាប់មានអ្នកភូមិបានម៉ាក់ងាយថា« ឯងនេះ! រៀនមិនបានច្រើននោះទេ»។ អន្ទិត គា ប្រុស ប្រាប់បន្តថា កាលពីវេលាម៉ោង៤រសៀល ថ្ងៃទី២៩ មិថុនា ២០១៨ ប្អូនប្រុសបានទូរស័ព្ទប្រាប់ថា ម្តាយបានឈឺហើយកំពុងតែសម្រាកនៅមន្ទីរពេទ្យស្រុកបាធាយ ពេលដែលទទួលបានដំណឹងបែបនេះរូបគេក៏បានសុំមេជាងដើម្បីមកមើលម្តាយ។ ពេលនៅជាមួយនឹងគេនោះ មិនមានលុយដោយសារតែទើបនឹងរៀន ហើយនៅក្នុងហោប៉ៅក៏មិនមាន លុយ សូម្បីតែ១០០រៀល ដោយសុខចិត្តជិះកង់ចេញពីភ្នំពេញ ព្រមទាំងស្ពាយសាកាដូសម្រាប់ដាក់ ខោអាវនៅនឹងខ្នង។
ជើងទាំងទ្វេរប្រឹងធាក់កង់ដោយបានឆ្លងកាត់ស្ពានជ្រោយចង្វារ ឡើងមកផ្លូវជាតិលេខ៦ ចេះតែប្រឹងធាក់កង់នៅពេលណាដែលហត់ខ្លាំងត្រូវឈប់សម្រាកមួយសន្ទុះ ដើម្បីឲ្យមានកម្លាំងនឹងបន្តដំណើរទៅមុខទៀត។ ក្នុងចិត្តគិតថា ទោះបីជានៅខាងមុខមានឧបសគ្គ ធំយ៉ាងណាក្តី ក៏រូបគេមិនបានរាថយសំខាន់ចង់ឃើញមុខម្តាយព្រោះគាត់ជាអ្នកមានគុណ។ អន្ទិត គា ប្រុស បានរំលឹកថា នៅពេលបានធំដឹងក្តីក៏បានចូលរៀននៅសាលាបឋមសិក្សាក្នុងស្រុកភូមិ បានចំណេះដឹងរៀងគ្រាន់បន្តិច លុះដល់វ័យ១២ឆ្នាំ បានទៅបួសជាសង្ឃរៀនព្រះធម៌ នៅវត្តវេឡុឃរាជសីហារាម ឃុំឫស្រីស្រុក ស្រុកស្រីសន្ធរ ខេត្តកំពង់ចាម បានជាច្រើនវស្សា។ មានពេលមួយនោះដល់ពេលដែលត្រូវបង់លុយសាលាចំនួន៤០ដុល្លារ មិនមានបច្ច័យបង់ទេក៏ទូរស័ព្ទមកម្តាយនៅស្រុកបាធាយមិនទាមទារទេ គ្រាន់តែជម្រាបម្តាយឲ្យបានដឹង ២ថ្ងៃក្រោយមកម្តាយបានខ្ចីលុយគេយកផ្ញើឲ្យមានពេលខ្លះម្តាយមិនមានលុយទិញម្ហូប ថែមទាំងបានធ្លាប់ពិសារបាយជាមួយនឹងអំបិលក៏មាន។
ដោយសារតែមើលឃើញជីវភាពគ្រួសារខ្វះខាតពេក ក៏សម្រេចចិត្តសឹកបានជាង២ខែ ហើយទៅរៀនយក អាជីពជំនាញដេរពូក និងសាឡុងនៅរាជធានីភ្នំពេញ។ នៅពេលដែលទទួលដំណឹងម្តាយឈឺ ណាមួយទីទ័លក្រផងនោះ រូបគេបានសម្រេចចិត្តបង្ហោះតាមបណ្តាញសង្គមហ្វេសប៊ុក បង្ហាញពីទុក្ខលំបាករបស់រូបគេ ហើយនឹងសុំឲ្យសប្បុរសជនជួយជាថវិកាដល់ម្តាយរបស់ខ្លួនមានអ្នកនៅក្នុងស្រុក និងក្រៅស្រុក បានផ្ញើលុយក្នុងម្នាក់១០ដុល្លារខ្លះ២០ដុល្លារឲ្យមករូបគេតាមវីង…មានជាហូរហែរពិតជាមានក្តីរំភើប ធ្វើឲ្យរូបគេស្រក់ទឹកភ្នែកដោយមិនដឹងខ្លួន។ ទាំងនេះបានលើកកម្លាំងចិត្តដល់រូបគេ ដើម្បីប្រឹងមើលថែទាំម្តាយឲ្យជាសះស្បើយពីជំងឺទាំងរបួសភ្នែកដោយសារតែមែកឈើបុក ពេលចេញទៅរកឧសដាំបាយហើយជំងឺខ្វះគ្រាប់ឈាមនោះពេទ្យឲ្យម្តាយពិសារបង្អែមញឹកញាប់ទៅនឹងបាត់ហើយ។
ទឹកចិត្តរបស់បងប្អូននៅគ្រប់ទិសទីនេះ រូបគេគ្មានអ្វីថ្លែងនោះទេ មានតែម្រាមដៃដប់ និងការអរគុណនោះទេ ហើយក៏ប្រសិទ្ធពរជ័យដល់សប្បុរសជនឲ្យជួបតែសេចក្តីសុខគ្រប់ពេលវេលា។ សូមបញ្ជាក់ថា សព្វថ្ងៃនេះម្តាយឪពុកមិនមានដីស្រែសម្រាប់បង្កបង្កើនផលនឹងគេទេ គឺទិញតែអង្កគីឡូសម្រាប់ដាំបាយហូបតែប៉ុណ្ណោះ។ លោកវេជ្ជបណ្ឌិត ទូច ហួត ប្រធានមន្ទីរពេទ្យបង្អែកស្រុកបាធាយ មានប្រសាសន៍ឲ្យដឹងថា ស្ត្រីឈ្មោះ បិន ហេន ដែលមកសម្រាកនៅមន្ទីរពេទ្យនេះ រូបលោកបានលើកលែងមិនឲ្យបង់ថ្លៃសេវានោះទេ ហើយថែមទាំងបានជួយឧបត្ថម្ភថវិកាប្រចាំថ្ងៃក្នុង១ថ្ងៃចំនួន៥.០០០រៀលបន្ថែមទៀត។
ស្ថានភាពជំងឺនេះអាចមើលព្យាបាលបាន ក៏ប៉ុន្តែក្នុងករណីបើមិនបានធូរស្រាលនោះ នឹងត្រូវបញ្ជូនទៅកាន់មន្ទីរពេទ្យ ខេត្តបន្តទៀត។ ជាក់ស្តែងនៅព្រឹកថ្ងៃទី០៣ កក្កដា គ្រូពេទ្យនៅស្រុកបាធាយ និងពេទ្យខេត្តបាន
មកឧបត្ថម្ភនូវថវិកាមួយចំនួន ហើយនៅថ្ងៃទី០៤ កក្កដា ប្រធានមន្ទីរសុខាភិបាលខេត្តនឹងជួយឧបត្ថម្ភ
ថវិកាបន្ថែម២០ម៉ឺនរៀលទៀត ដើម្បីសម្រាលទុក្ខលំបាកបានមួយរយៈ ហើយភ្នែកហើមចេញខ្ទុះនោះ
ត្រូវបានគ្រូពេទ្យព្យាបាលបានធូរស្រាលហើយដែរ៕
https://www.youtube.com/watch?v=UZdWhc6FoEg
ចែករំលែកព័តមាននេះ