រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី០៤ កក្កដា បានសម្រេចចេញដីកាឃុំខ្លួនឧក្រិដ្ឋជនជួញដូរគ្រឿងញៀនម្នាក់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ រក្សាទុក និងជួញដូរនូវសារធាតុញៀនដោយខុសច្បាប់។ គួរបញ្ជាក់ថា…
រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីល្ងាចថ្ងៃទី០៤ កក្កដា បានសម្រេចចេញដីកាឃុំខ្លួនឧក្រិដ្ឋជនជួញដូរគ្រឿងញៀនម្នាក់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ រក្សាទុក និងជួញដូរនូវសារធាតុញៀនដោយខុសច្បាប់។ គួរបញ្ជាក់ថា កាលពីរសៀលថ្ងៃទី០១ កក្កដា ២០១៨ កម្លាំងសមត្ថកិច្ចការិយាល័យទី៦ នៃមន្ទីរប្រឆាំងគ្រឿងញៀន ក្រសួងមហាផ្ទៃ បានធ្វើការចាប់ខ្លួនឧក្រិដ្ឋជនជួញដូរគ្រឿងដោយខុសច្បាប់ម្នាក់ និង ដកហូតវត្ថុតាងថ្នាំញៀនប្រមាណជាង១៦គីឡូក្រាម នៅកណ្តាលរាជធានីភ្នំពេញ។
ឧក្រិដ្ឋជនមានឈ្មោះ ម៉េង រតនា ហៅខ្វៃ ភេទប្រុស អាយុ៤១ឆ្នាំ ជនជាតិខ្មែរ មុខរបរ និងស្នាក់នៅមិនពិតប្រាកដ។ ទាក់ទិន និងការចាប់ខ្លួនជនសង្ស័យជួញដូរគ្រឿងញៀនខាងលើនេះ លោកឧត្តមសេនីយ៍ឯក ឡឹក វណ្ណៈ នាយកមន្ទីប្រឆាំងគ្រឿងញៀនក្រសួងមហាផ្ទៃ បានបង្ហើបឲ្យដឹងថា មុននឹងឈានដល់ការចាប់ខ្លួន ឈ្មួញគ្រឿងញៀន និងថ្នាំញៀនជាង១៦គីឡូក្រាមនេះ កម្លាំងជំនាញនៃការិយាល័យទី៦ ដែលដឹកនាំដោយលោកឧត្តមសេនីយ៍ត្រី ហម គន្ធី នាយករងមន្ទីរប្រឆាំងគ្រឿងញៀន បានបើកការស្រាវជ្រាវ និងស៊ើបអង្កេតរាប់ថ្ងៃខែទម្រាំកំណាត់បានមុខសញ្ញាជួញដូរគ្រឿងញៀន ដ៏ធំមួយនេះ។
លោក ឡឹក វណ្ណៈ បន្តថា ក្រោយពីកំណត់មុខសញ្ញបានច្បាស់លាស់ហើយ លោកនាយឧត្តមសេនីយ៍ ម៉ក់ ជីតូ អគ្គស្នងការរង ទទួលបន្ទុកការងារប្រយុទ្ធប្រឆាំងគ្រឿងញៀន បានអនុញ្ញាតឲ្យលោក ឡឹក វណ្ណៈ រៀបចំកម្លាំងជំនាញបំពាក់ដោយអាវុធការពារខ្លួន ចេញបង្ក្រាបបទជួញដូរគ្រឿងញៀននោះឲ្យខាងតែបាន។ ជាក់ស្តែងនាវេលាម៉ោងប្រមាណ៣ និង ៣០នាទីរសៀល ថ្ងៃទី០១ កក្កដា កម្លាំងសមត្ថកិច្ចដែលដឹកនាំដោយលោកឧត្តមសេនីយ៍ ហម គន្ធី បានធ្វើការស្ទាក់ចាប់ឃាត់ខ្លួនជនសង្ស័យម្នាក់ ដែលកំពុងធ្វើដំណើតាមរថយន្ត នៅចំណុចលើដងផ្លូវមួយជិតស្ថានទូតចិន ក្នុងសង្កាត់ទួលទំពូងទី២ ខណ្ឌចម្ការមន រាជធានីភ្នំពេញ រួមទាំងដកហូតថ្នាំញៀន ប្រភេទមេតំហ្វេតាមីន(ICE)ប្រមាណ១៥គីឡូ៨១២ក្រាម និងហេរ៉ូអ៊ីនចំនួន ២បន្ទះ ស្មើ៧ខាំ៨៩៤ ក្រាម។
ក្រោយពីចាប់ខ្លួនជនសង្ស័យជាឧក្រិដ្ឋជនជួញដូរគ្រឿងញៀនរូបនេះ បានសារភាញថា ខ្លួនមានការទំនាក់ទំនងជាមួយជនជាតិចិនម្នាក់ តាំងពីឆ្នាំ១៩៩៣ រហូតដល់ឆ្នាំ២០១៦ ដោយរកស៊ី និងជួយរក្សាទុក ចែកចាយគ្រឿងញៀនខុសច្បាប់ជាបន្តបន្ទាប់។ ជនសង្ស័យបន្តថា រហូតមកដល់ថ្ងៃទី២៦ មិថុនា ២០១៨ ជនជាតិចិនម្នាក់នោះ បានឲ្យខ្លួនទៅទទួលគ្រឿងញៀនមួយសាក់កាដូ និងមួយដុំមានចំនួន២៨កញ្ចប់តូច នៅចំណុចខាងក្រោយណាហ្គាវើល និងឲ្យខ្លួនយកទៅរក្សាទុក និងចែកចាយបន្ត។ លុះដល់វេលារសៀលថ្ងៃទី០១ កក្កដា ២០១៨ ក៏ត្រូវសមត្ថកិច្ចមន្ទីរប្រឆាំគ្រឿងញៀនចាប់ខ្លួនតែម្តងទៅ៕
https://youtu.be/Rpam-a9se_U
ចែករំលែកព័តមាននេះ