ខេត្តរតនគិរី ៖ ជនសង្ស័យចំនួនពីរនាក់ត្រូវបានកម្លាំងនគរបាលព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តរតនគិរីសហការជាមួយកម្លាំងនគរបាលក្រុងបានលុងរួមជាមួយនឹងកម្លាំងនគរបាលប៉ុស្តិ៍សង្កាត់ឡាបានសៀក និងប៉ុស្តិ៍រដ្ឋបាលឃុំហាត់ប៉ក់ ស្រុកវ៉ើនសៃធ្វើការឃាត់ខ្លួនបានជាបន្តបន្ទាប់ក្រោមការសម្របសម្រួលនីតិវិធីដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី ។ ការបង្ក្រាបនេះបានធ្វើឡើងកាលពីថ្ងៃទី៣ ខែកក្កដា ឆ្នាំ២០១៨ នៅចំណុចភូមិ៧មករា សង្កាត់ឡាបានសៀក ក្រុងបានលុង ហើយកាលពីវេលាម៉ោង១០ព្រឹកថ្ងៃទី៤ ខែកក្កដា ឆ្នាំ២០១៨ កម្លាំងជំនាញអធិការដ្ឋានបានសហការជាមួយកម្លាំងប៉ុស្តិ៍ឃុំហាត់ប៉ក់ធ្វើការស្រាវជ្រាវឃាត់ខ្លួនជនសង្ស័យបានម្នាក់ទៀតនៅចំណុចស្រែសុងវ៉ា ស្ថិតក្នុងភូមិសាស្ត្រឃុំហាត់ប៉ក់ ស្រុកវើនសៃ។ ការឃាត់ខ្លួនជនសង្ស័យទាំង២នាក់នេះពីបទលួចព្រះបដិមានៅវត្តហាត់ប៉ក់ ឃុំហាត់ប៉ក់ កាលពីថ្ងៃទី១៧ ខែមិថុនា ឆ្នាំ២០១៨កន្លងទៅ ។
មន្ត្រីនគរបាលដែលចុះប្រតិបត្តិការបានឲ្យដឹងថា ជនសង្ស័យដែលឃាត់ខ្លួនបានទាំង២នាក់នោះ ម្នាក់ឈ្មោះឡៃ ស៊ីវន្ថា អាយុ៣៣ឆ្នាំ និងម្នាក់ទៀតឈ្មោះឃួន កា (ហៅគុយ) ភេទប្រុស អាយុ១៨ឆ្នាំ ជាជនជាតិឡាវសញ្ជាតិខ្មែរ ។ ជនសង្ស័យទាំង២នាក់នេះមានទីលំនៅភូមិហាត់ប៉ក់ ឃុំហាត់ប៉ក់ ស្រុកវើនសៃ។ ក្រោយការឆែកឆេរនៅបន្ទប់ជនសង្ស័យរួចមក កម្លាំងនគរបាលបានរកឃើញ និងដកហូតបានរួមមាន ៖ ព្រះប្រក់នាគក្បាល៧ចំនួន១អង្គធំ, រូបព្រះចំនួន២អង្គតូច, គងស្ពាន់តូច-ធំចំនួន៨, ចង្ក្រងស្ពាន់ចំនួន៦, រូបក្របីស្ពាន់១, ឆ្នាំងស្ពាន់១, កូនជញ្ជីងស្ពាន់២, រូបមាន់ស្ពាន់៣, តុំដាក់កំបោរស្ពាន់២, ផ្តិលស្ពាន់១, លោហៈធាតុប្រាក់២ផ្ទាំង, រូបព្រះថ្មកែវ១ និងម៉ូតូមួយគ្រឿងម៉ាក MSX ពណ៍ស ស៊េរីចាស់។
បច្ចុប្បន្នជនសង្ស័យ និងវត្ថុតាងត្រូវបានឃាត់ខ្លួនរក្សាទុកនៅការិល័យកំរិតស្រាលនៃស្នងការដ្ឋាននគរបាលខេត្ត ដើម្បីកសាងសំណុំរឿងបញ្ជូនទៅសាលាដំបូងខេត្តផ្តន្ទាទោសតាមច្បាប់៕
ចែករំលែកព័តមាននេះ