ខេត្តសៀមរាប ៖ នារសៀលថ្ងៃ០៣ ខែកក្កដា ឆ្នាំ២០១៨ សមត្ថកិច្ចចម្រុះដឹកនាំដោយលោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យនគរបាលបង្ការពន្លត់អគ្គីភ័យ និងសង្គ្រោះក្នុងនោះមាន…
ខេត្តសៀមរាប ៖ នារសៀលថ្ងៃ០៣ ខែកក្កដា ឆ្នាំ២០១៨ សមត្ថកិច្ចចម្រុះដឹកនាំដោយលោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យនគរបាលបង្ការពន្លត់អគ្គីភ័យ និងសង្គ្រោះក្នុងនោះមាន កម្លាំងនគរបាលការិយាល័យបង្ការ ពន្លត់អគ្គីភ័យ និងសង្គ្រោះ នៃស្នងការដ្ឋាននគរបាលខេត្តសៀមរាប និងកម្លាំងសន្តិសុខអគ្គិភ័យភូមិវប្បធម៌កម្ពុជា បានសហការគ្នាបើកការធ្វើសមយុទ្ធ លំហាត់របៀបអន្តរាគមន៍ពេលមានអគ្គីភ័យកើតឡើងដោយមានការចល័តរថយន្តពន្លត់អគ្គិភ័យសរុបចំនួន០៨គ្រឿង ។
ក្នុងឱកាសនាពេលនោះដែរលោកឧត្តមសេនីយ៍ត្រី ភឹង សម្បត្តិ ស្នងការរងទទួលការិយាល័យ នគរបាលបង្ការពន្លត់អគ្គីភ័យ និងសង្គ្រោះបានដឹកនាំបើកយុទ្ធនាការសមយុទ្ធលំហាត់របៀបអន្តរាគមន៍ដោយធ្វើការចល័តរថយន្តអគ្គីភ័យចំនួន៨គ្រឿងចេញពីគោលដៅមន្ទីរទេចរណ៍ចាស់កាត់តាមដងវិថីនានាក្នុងក្រុងសៀមរាបឆ្ពោះចូលទៅកាន់ភូមិសាស្ត្របុរីទេសចរណ៍ ( អតីតបុរី សុខ លាភ ) ស្ថិតនៅភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ។ នៅក្នុងភូមិសាស្ត្របុរីទេសចរណ៍ (អតីតបុរី សុខ លាភ ) ក៏មានការដុតកង់ឡានចំនួន៣០ គ្រាប់ធ្វើជាករណីអគ្គីភ័យសិប្បនិមិត្តផងដែរ ។
លោកបានបញ្ជាក់ថា ការធ្វើលំហាត់របៀបអន្តរាគមន៍ពេលមានអគ្គីភ័យកើតឡើងនេះគឺធ្វើឡើងដើម្បីបង្កើនសមត្ថភាពបន្ថែមដល់កងកម្លាំងដើម្បីត្រៀមឆ្លើយតបលើបញ្ហាគ្រោះអគ្គីភ័យ ដែលកើតឡើងជាយថាហេតុ និងដើម្បីធ្វើការត្រួតពិនិត្យឧបករណ៍សម្ភារបច្ចេកទេសផងដែរ ។
សូមបញ្ជាក់ផងដែរថា ការធ្វើសមយុទ្ធនាពេលនេះមានរថយន្តចំនួន៨គ្រឿងក្នុងនោះរួមមានរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តសៀមរាបចំនួន០៧គ្រឿង និងរថយន្តពន្លត់អគ្គីភ័យរបស់ភូមិវប្បធម៌កម្ពុជាចំនួន១គ្រឿងផងដែរ ៕
ចែករំលែកព័តមាននេះ