រាជធានីភ្នំពេញ ៖ មន្ត្រីនៃនាយកដ្ឋានសហប្រតិបត្តិការអន្តរជាតិ និងអាស៊ាន នៃក្រសួងទេសចរណ៍បានអះអាងថា កម្ពុជាអាចនឹងមានការហោះហើរត្រង់ដោយផ្ទាល់ពីប្រទេសឥណ្ឌូណេស៊ី នៅឆ្នាំ២០១៩ ខាងមុខនេះ ។
លោក ថុក សុខុម ប្រធាននាយកដ្ឋាន បានថ្លែងបែបនេះ បន្ទាប់ពីបញ្ចប់ជំនួបពិភាក្សាការងាររវាងលោក ថោង ខុន រដ្ឋមន្ត្រីក្រសួងទេសចរណ៍ និងលោក Sudrirman Haseng ឯកអគ្គរដ្ឋទូតឥណ្ឌូណេស៊ីថ្មី ប្រចាំនៅកម្ពុជា កាលពីរសៀលថ្ងៃទី២ ខែកក្កដា ឆ្នាំ២០១៨នេះ នៅទីស្តីការក្រសួងទេសចរណ៍ ។
ក្រោយជំនួបនោះ លោក ថុក សុខុម បានបញ្ជាក់ថា ៖« លោករដ្ឋមន្ត្រីបានពិភាក្សាគ្នា និងស្នើសុំទៅភាគីឥណ្ឌូណេស៊ី ឲ្យមានការហោះហើរត្រង់រវាងប្រទេសទាំងពីរ ហើយយើងអាចមានការហោះហើរត្រង់នៅក្នុងឆ្នាំ២០១៩ ដោយឡាយអិន អ៊ែរ » ។
ទន្ទឹមនឹងការជំរុញឲ្យមានការហោះហើរ ត្រង់នៅឆ្នាំ២០១៩នេះ លោក ថុក សុខុម បានឲ្យដឹងទៀតថា ភាគីទាំងពីរក៏បានពិភាក្សាគ្នា ដើម្បីរៀបចំពិធីបុណ្យប្រពៃណីបែបពុទ្ធសាសនាផងដែរ ។ លោកថា ៖« ការរៀបចំបុណ្យបែបប្រពៃណីពុទ្ធសាសនា យើងធ្លាប់បានរៀបចំនៅសៀមរាប កាលពីឆ្នាំ២០១៧ ហើយខាងឥណ្ឌូណេស៊ីប្រាប់ថា នឹងយកចំណុចនេះទៅពិភាក្សា ជាមួយក្រសួងទេសចរណ៍របស់ខ្លួន ហើយចំពោះកិច្ចសហប្រតិបត្តិការរវាងការតភ្ជាប់ដោយផ្ទាល់ពីកម្ពុជាទៅឥណ្ឌូណេស៊ី អាចនឹងមានការហោះហើរត្រង់នៅឆ្នាំ២០១៩ ដែលជាឆ្នាំប្រារព្ធខួបលើកទី៦០ នៃទំនាក់ទំនងការទូតកម្ពុជា និងឥណ្ឌូណេស៊ី » ។
បើតាមប្រធាននាយកដ្ឋានសហប្រតិបត្តិការអន្តរជាតិ និងអាស៊ានរូបនេះ អត្ថប្រយោជន៍ដែលទទួលបានពីការរៀបចំបុណ្យប្រពៃណី បែបពុទ្ធសាសនានេះរួមមាន យើងបានផ្សព្វផ្សាយគោលដៅទេសចរណ៍របស់យើង ។ យើងបានជំរុញឲ្យគេស្គាល់យើងបានកាន់តែច្រើន និងជំរុញឲ្យប្រជាពលរដ្ឋទាំងអស់កាន់តែមានជំនឿលើព្រះពុទ្ធសាសនា ព្រមទាំងប្រព្រឹត្តទង្វើមួយដែលល្អ ។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល លោក ស៊ិន ចាន់សិរីវុត្ថា បានថ្លែងថា ក្រុមហ៊ុន Lion Airlineរបស់ឥណ្ឌូណេស៊ី ពិតជាបានសិក្សាពីលទ្ធភាពហោះហើរត្រង់មកកម្ពុជា តាមរយៈការហោះហើរត្រង់ពីឥណ្ឌូណេស៊ីមកកាន់កម្ពុជា ឬបង្កើតក្រុមហ៊ុនអាកាសចរណ៍ថ្មីមួយនៅកម្ពុជា ដើម្បីប្រតិបត្តិការហោះហើរមែន ប៉ុន្តែលទ្ធផលនៃការសិក្សា និងការបញ្ជាក់ពីកាលបរិច្ឆេទពេលណា លោកមិនទាន់អាចបញ្ជាក់បាននៅឡើយទេ ។
ប្រធានសមាគមទេសចរណ៍អាស៊ីប៉ាស៊ីហ្វិកលោក ធួន ស៊ីណាន បានថ្លែងស្វាគមន៍ថា ៖
« យើងស្វាគមន៍រហូតដល់ដៃ៤ ប្រសិន ជាមានការហោះហើរត្រង់ពីឥណ្ឌូណេស៊ីមកកាន់កម្ពុជា ព្រោះវានឹងធ្វើឲ្យទេសចរឥណ្ឌូណេស៊ីមកទស្សនាកម្ពុជាច្រើន ដោយសារឥណ្ឌូណេស៊ីមានប្រជាជនច្រើន និងអ្នកមានជីវភាពល្អប្រសើរ ដែលអាចដើរកម្សាន្ដមានចំនួនច្រើន ។លោកបន្តថា ៖« ខ្ញុំគិតថាបើមានការភ្ជាប់ការហោះហើរមែន ខ្ញុំជឿថាទេសចរឥណ្ឌូណេស៊ីមកកម្ពុជា អាចជាប់លំដាប់Top Tenដោយសារប្រទេសទាំងពីរមានទំនាក់ទំនងល្អ ហើយវប្បធម៌រវាងប្រទេសទាំងពីរនៅតំបន់ខ្លះមានភាពស្រដៀងគ្នា »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ