រាជធានីភ្នំពេញ ៖ សម្តេចតេជោនាយករដ្ឋមន្ត្រី ហុ៊ន សែន បានប្រកាសតាមបណ្តាញសង្គម នាព្រឹកថ្ងៃទី៣ កក្កដា ថា សម្តេចមិនបានផ្តល់សិទ្ធិវិនិយោគបឹងធម្មជាតិដល់ក្រុមហ៊ុនណាមួយទេ ទោះបីជាក្រុមហ៊ុននោះមកពីប្រទេសណាក៏ដោយ ។
ការប្រកាសបែបនេះ របស់ប្រមុខរាជរដ្ឋាភិបាលកម្ពុជា គឺបន្ទាប់ពីសារព័ត៌មានរស្មីកម្ពុជាបានចុះផ្សាយថា រាជរដ្ឋាលនឹងដាក់បឹងយក្សឡោមឲ្យទៅក្រុមហ៊ុនចិនវិនិយោគរយៈពេល៧៥ឆ្នាំ ។ សម្តេចតេជោ បានសរសេរលើបណ្តាញសង្គមរបស់សម្តេចផ្ទាល់ នៅថ្ងៃទី៣ ខែកក្កដា ឆ្នាំ២០១៨ថា «ព្រឹកនេះ ខ្ញុំបានមើលសារព័ត៌មានរស្មីកម្ពុជា ដែលបានសរសេរថា រដ្ឋាភិបាលនឹងដាក់បឹងយក្សឡោមទៅឱ្យក្រុមហ៊ុនចិនវិនិយោគរយៈពេល៧៥ឆ្នាំ ។ តើអ្នកណាបង្កើតរឿងបែបនេះ ឡើងដើម្បីអ្វី ក្នុងឋានៈជាប្រមុខរាជរដ្ឋាភិបាល ខ្ញុំសុំទាត់ចោលទាំងស្រុង នូវការវិនិយោគឯកជនណាមួយមកលើបឹងធម្មជាតិដ៏សំខាន់នេះ ទោះក្រុមហ៊ុននោះមកពីប្រទេសណាក៏ដោយ» ។
នៅថ្ងៃដដែលនោះ សម្តេចតេជោក៏បានលើកឡើងថា គណបក្សប្រជាជនកម្ពុជាលេខរៀងទី២០ នាំលាភនាំជ័យ នាំសិរីសួស្តីដល់កម្ពុជា យើងទាំងអស់គ្នាមានមោទនភាពក្រៃលែង ចំពោះការរីកចម្រើនរបស់ប្រទេសជាតិសព្វថ្ងៃ ។ ប្រសិនបើគិតពីភាពខ្ទេចខ្ទាំដោយសារសង្គ្រាមស៊ីវិល និងរបបវិនាសកម្មប្រល័យពូជសាសន៍ ប៉ុលពត កន្លងមកនេះ គឺយើងមិននឹកស្មានថា កម្ពុជាបានឈានមកដល់ដំណាក់កាលនេះឡើយ ព្រោះពេលនេះកម្ពុជាមានអ្វីៗគ្រប់យ៉ាងជាមួយនឹងកំណើនសេដ្ឋកិច្ចរឹងមាំ ហើយបានងើបឈរស្មើមុខស្មើមាត់ជាមួយប្រទេសលើពិភពលោក ។
សម្តេចតេជោបានគូសបញ្ជាក់យ៉ាងដូច្នេះថា «យើងមិនឈប់នៅត្រឹមនេះទេ គឺយើងបន្តពួតដៃគ្នាអភិវឌ្ឍន៍កម្ពុជាឱ្យក្លាយទៅជាប្រទេសមានប្រាក់ចំណូលខ្ពស់ និងកាន់តែរីកចម្រើន ហើយខ្ញុំនឹងនៅរួមសុខរួមទុក្ខជាមួយបងប្អូនជាច្រើនឆ្នាំទៀត ។ យើងដើរទៅមុខទាំងអស់គ្នាដោយមិនឱ្យកម្ពុជាវិលទៅរកសង្គ្រាម និងវិនាសកម្មសាជាថ្មីបានឡើយ ។
ជាមួយគ្នានេះ សម្តេចតេជោ ក៏បានសូមបងប្អូនជនរួមជាតិបោះឆ្នោតឱ្យ «គណបក្សប្រជាជនកម្ពុជា» លេខរៀងទី២០ ដើម្បីកម្ពុជាយើងឈ្នះទាំងអស់គ្នា កម្ពុជាកាន់តែរីកចម្រើនរុងរឿងទៅមុខផងដែរ ៕
ចែករំលែកព័តមាននេះ