រាជធានីភ្នំពេញ ៖ នៅព្រឹកថ្ងៃទី០៤ ខែកក្កដា ឆ្នាំ២០១៨ នេះចៅក្រមតុលាការកំពូលលោក គង់ ស្រ៊ីម ប្រធានក្រុមប្រឹក្សាជំនុំជម្រះបានបើកសវនាការលើបណ្តឹងប្តឹងសារទុករបស់លោក សំ សុគង់ មេធាវីការពារឲ្យលោក សម រង្ស៊ី នឹងជំនួយការ២នាក់របស់លោក សម រង្ស៊ីដែលជាប់ពាក់ពន្ធនឹងបទសមគំនិតក្លែងឯកសារសាធារណៈ ការប្រើប្រាស់ ឯកសារសាធារណៈក្លែង និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ។
នៅពេលសវនាការលោក សំ សុគង់ មេធាវីការពារឲ្យលោក សម រង្ស៊ីនឹងជំនួយការ២នាក់ បានដាក់សារណាការពាររួចរាល់ហើយ តែសុំពន្យល់តែអង្គច្បាប់មួយចំនួនតែប៉ុណ្ណោះ ។ ចំណែកតំណាងមហាអយ្យការបានសន្និដ្ឋាននៅតែតម្កល់បទចោទលើជនត្រូវចោទទាំង៣នាក់ឲ្យនៅដដែល ។ ចំពោះរឿងក្តីនេះលោកចៅក្រមបានសម្រេចលើកពេលទៅប្រកាសសាដីកានៅព្រឹកថ្ងៃទី០៩ ខែកក្កដា ឆ្នាំ២០១៨ខាងមុខនេះ ។
គួររំលឹកផងដែលថា ទាំងសាលាដំបូងរាជធានីភ្នំពេញនឹងសាលាឧទ្ធរណ៍បានសម្រេចដូចគ្នា គឺផ្តន្ទាទោសជនជាប់ចោទឈ្មោះ សម រង្ស៊ី ដាក់ពន្ធនាគារកំណត់៥ឆ្នាំ ចំណែក អ៊ឹង ជុងលាង ហៅ ម៉ាប់ នឹងឈ្មោះ សត្យាសម្បត្តិ ដាក់ពន្ធនាគារ៥ឆ្នាំ ដូចគ្នាតែអនុវត្តទោស៣ឆ្នាំ សល់ពីរឆ្នាំទៀតព្យួរធម្មតាជាប់ពាក់ពន្ធបទល្មើសសមគំនិតក្លែងឯកសារសាធារណៈ ការប្រើប្រាស់ ឯកសារសាធារណៈក្លែងបន្លំ និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម តាមមាត្រា១០៧ ១០៨ ៤២៩ ៤៣០ ៤៩៥ និង មាត្រា ២៩ នៃក្រមព្រហ្មទណ្ឌពាក់ព័ន្ធនឹងការ បង្ហោះឯកសាររឿងសន្ធិសញ្ញាព្រំដែន កម្ពុជា-វៀតណាម កាលពីថ្ងៃទី១២និង១៣ ខែសីហា ឆ្នាំ២០១៥ ។
សូមបញ្ជាក់ថា សាលក្រមរបស់សាលាដំបូងរាជធានីភ្នំពេញក៏បានបង្គាប់ឱ្យចាប់នឹងឃុំខ្លួន ជនជាប់ចោទឈ្មោះ សម រង្ស៊ី , អ៊ឹង ជុងលាង ហៅម៉ាប់ ឈ្មោះ សត្យា សម្បត្តិ យកមកអនុវត្តទោសតាមអំណាចសាលក្រមនេះផងដែរ ៕
ចែករំលែកព័តមាននេះ