រាជធានីភ្នំពេញ ៖ ក្រោមអនុសាសន៍ដ៏មឺុងមា៉ត់រាល់អង្គប្រជុំប្រចាំខែរបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ ដែលផ្តោតសំខាន់លើការទប់ស្កាត់ និងបង្ក្រាបគ្រឿងញៀន កាលពីរសៀលថ្ងៃទី១ ខែកក្កដាកន្លងទៅ កម្លាំងការិយាល័យទី៦នៃមន្ទីរប្រឆាំងគ្រឿងញៀន ក្រសួងមហាផ្ទៃ បានធ្វើការចាប់ខ្លួនឧក្រិដ្ឋជនជួញដូរគ្រឿងម្នាក់ និងដកហូតវត្ថុតាងគ្រឿងញៀនជាង១៦គីឡូក្រាម នៅកណ្តាលរាជធានីភ្នំពេញ ។ ជនដែលត្រូវបានចាប់ខ្លួននេះឈ្មោះ ម៉េង រតនា ហៅខ្វៃ ភេទប្រុស អាយុ៤១ឆ្នាំ មុខរបរ និងកន្លែងស្នាក់នៅមិនពិតប្រាកដ ។
លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន បានឲ្យដឹងថា មុន នឹងឈានដល់ការចាប់ខ្លួនឈ្មួញគ្រឿងញៀន និងថ្នាំញៀនជាង១៦គីឡូក្រាមនេះ កម្លាំងការិយាល័យទី៦ដឹកនាំដោយលោកឧត្តមសេនីយ៍ត្រី ហម គន្ធី នាយករងមន្ទីរប្រឆាំគ្រឿងញៀន បានធ្វើការស្រាវជ្រាវនិងសើុបអង្កេត ទម្រាំកំណត់បានមុខសញ្ញាជួញដូរគ្រឿងញៀនដ៏ធំមួយនេះ ។
លោកឧត្តមសេនីយ៍ឯក ឡឹក វណ្ណៈ បន្តថា ក្រោយពីកំណត់មុខសញ្ញបានច្បាស់លាស់ហើយលោកនាយឧត្តមសេនីយ៍ ម៉ក់ ជីតូ អគ្គស្នងការរងទទួលបន្ទុកការងារប្រយុទ្ធប្រឆាំងគ្រឿងញៀន បានឲ្យរូបលោករៀបចំកម្លាំងជំនាញបំពាក់ដោយអាវុធការពារខ្លួន ចេញបង្ក្រាបបទល្មើសជួញដូរគ្រឿងញៀននោះឲ្យខាងតែបាន ។
នាវេលាម៉ោងប្រមាណ៣និង៣០នាទីរសៀលថ្ងៃទី១ ខែកក្កដា កម្លាំងសមត្ថកិច្ចដឹកនាំដោយលោកឧត្តមសេនីយ៍ត្រី ហម គន្ធី បានធ្វើការស្ទាក់ចាប់ឃាត់ខ្លួនជនសង្ស័យម្នាក់ ដែលកំពុងធ្វើដំណើតាមរថយន្តនៅលើដងផ្លូវមួយជិតស្ថានទូតចិន ក្នុងសង្កាត់ទួលទំពូងទី២ ខណ្ឌចំការមន រួមទាំងដកហូតថ្នាំញៀនប្រភេទមេតំហ្វេតាមីន(ICE)ហៅម៉ាទឹកកកប្រមាណ១៥គីឡូក្រាម និង៨១២ក្រាម និងហេរ៉ូអុីនចំនួន២បន្ទះ ស្មើនឹងជាង៧ខាំ ។
ក្រោយពីត្រូវចាប់ខ្លួន ជនសង្ស័យជាឧក្រិដ្ឋជនជួញដូរគ្រឿងញៀនរូបនេះសារភាពថា ខ្លួនមានទំនាក់ទំនងជាមួយជនជាតិចិនម្នាក់តាំងពីឆ្នាំ១៩៩៣ រហូតដល់ឆ្នាំ២០១៦ ដោយរកសុីនិងជួយរក្សាទុកចែកចាយគ្រឿងញៀនជាបន្តបន្ទាប់ ។ នៅថ្ងៃទី២៦ ខែមិថុនា ឆ្នាំ២០១៨ ជនជាតិចិនម្នាក់នោះ បានឲ្យខ្លួនទៅទទួលគ្រឿងញៀនមួយសាក់កាដូ និងមួយដុំមានចំនួន២៨កញ្ចប់តូច នៅខាងក្រោយណាហ្គាវើល ហើយឲ្យខ្លួនយកទៅរក្សាទុកនិង ចែកចាយបន្ត លុះនៅរសៀលថ្ងៃទី១ ខេកក្កដា ក៏ត្រូវសមត្ថកិច្ចចាប់ខ្លួនតែម្តង ។
ជាការកត់សម្គាល់ កាលពីចុងខែមិថុនាកន្លងទៅថ្មីៗនេះ ការបង្ក្រាបជំនួញគ្រឿងញៀនបានលេចធ្លោ ក្រោយពេលមានការចាប់បាននៅច្រកទ្វារព្រំដែនអន្តរជាតិត្រពាំងក្រៀល ខេត្តស្ទឹងត្រែង ដោយរឹបអូសបានគ្រឿងញៀនប្រមាណ១២០គីឡូក្រាម ដែលចំនួននេះគឺច្រើនលើសលប់មិនធ្លាប់មានកន្លងមក ។ បន្ទាប់ពីនោះគ្រឿងញៀន៣គីឡូក្រាមផ្សេងទៀត ត្រូវចាប់បាននៅខេត្តរតនគិរី និងជាង១គីឡូក្រាមចាប់បាននៅក្រុងប៉ោយប៉ែត ។
តាមទំហំនៃការបង្ក្រាបក្នុងចំនួនដ៏ច្រើននេះបង្ហាញថា ក្តីបារម្ភសម្រាប់សង្គមកម្ពុជាដែលកំពុងធ្លាក់ចូលក្នុងជំនួញគ្រឿងញៀនកាន់តែធ្ងន់ធ្ងរផងដែរ ព្រោះថាប្រសិនបើចំនួនអ្នកត្រូវការតិចតួចនោះក្រុមរត់ពន្ធគ្រឿងញៀនប្រហែលមិនប្រថុយស្បែកលួចលាក់នាំចូលរាប់គីឡូក្រាមបែបនេះទេ ៕
ចែករំលែកព័តមាននេះ