ខេត្តព្រៃវែង ៖ រថយន្តយីឌុបធំៗចំនួន៥គ្រឿង ដែលដឹកខ្សាច់ទន្លេពេញៗរថយន្ត ត្រូវបានមន្ត្រីជំនាញស្ថានីយថ្លឹងរថយន្តអ្នកលឿង ចាប់ថ្លឹងទម្ងន់ និងធ្វើការផាកពិន័យ បន្ទាប់ពីថ្លឹងឃើញដឹកលើសទម្ងន់ដែលច្បាប់បានអនុញ្ញាត។ សកម្មភាពចាប់ថ្លឹងរថយន្តខាងលើនេះ ធ្វើឡើងកាលពីវេលាម៉ោង៧ព្រឹក ថ្ងៃទី៣ កក្កដា នៅចំណុចរង្វង់មូលត្រីកោណ ផ្លូវឡើងស្ពានអ្នកលឿង ដែលស្ថិតក្នុងភូមិ១ ឃុំព្រែកខ្សាយ(ខ) ស្រុកពាមរក៍ ខេត្តព្រៃវែង។
ប្រភពពីមន្ត្រីមន្ទីរសាធារណៈការ ខេត្តព្រៃវែង បានឲ្យដឹងថា ការឃាត់រថយន្តទាំង៥គ្រឿងយកមកថ្លឹងទម្ងន់នេះ គឺបន្ទាប់ពីពិនិត្យឃើញថា រថយន្តទាំងនោះដឹកហៀរៗទ្រុងច្រើនហួសហេតុ ទើបឃាត់យកមកថ្លឹងទម្ងន់ ហើយក្រោយពីថ្លឹងរួចហើយ ឃើញថា រថយន្តទាំង៥គ្រឿងនោះសុទ្ធតែដឹកលើសទម្ងន់ទាំងអស់ ក្នុងចន្លោះពី៧តោនដល់ទៅ១៣តោន ទើបមន្ត្រីជំនាញធ្វើការផាកពិន័យទៅតាមផ្លូវច្បាប់តែម្តង។ ដោយភ្លាមៗក្រោយពីត្រូវចាប់ឃាត់ ម្ចាស់រថយន្តមួយគ្រឿងបានចូលខ្លួនមកបង់ការផាកពិន័យ ហើយមន្ត្រីជំនាញក៏អនុញ្ញាតឲ្យយករថយន្ត ត្រឡប់ទៅវិញ ដោយឡែករថយន្ត៤គ្រឿងទៀត កំពុងទំនាក់ទំនងហៅម្ចាស់ជាបណ្តើរៗ។
គួរបញ្ជាក់ផងដែរថា បើតាមច្បាប់ស្តីពីផ្លូវថ្នល់ ត្រង់ចំណុចមាត្រាទី៦០បានកំណត់ថា សម្រាប់រថយន្តយីឌុបប្រភេទភ្លៅ៥ គឺអនុញ្ញាតឲ្យផ្ទុកទម្ងន់ត្រឹមតែ៣៥តោនប៉ុណ្ណោះ គិតទាំងសម្បករថយន្ត រថយន្តភ្លៅ៤ អនុញ្ញាតិត្រឹម៣០តោន រថយន្តភ្លៅ៣ អនុញ្ញាតត្រឹម២៥តោន និងរថយន្តភ្លៅ២ អនុញ្ញាតត្រឹម១៦តោន។ ក្នុងករណីយានយន្តណាដែលដឹកលើសទម្ងន់ អនុញ្ញាតខាងលើនេះនឹងត្រូវមន្ត្រីជំនាញចាប់ផាកពិន័យ ទៅតាមការកំណត់នៅក្នុងច្បាប់ គឺបើលើសត្រឹមក្រោម៥% ត្រឹមធ្វើកិច្ចសន្យាជាលាយលក្ខណ៍អក្សរ បើលើសពី៥%ដល់១០% ពិន័យក្នុង១តោន១០ម៉ឺនរៀល បើលើសពី១០%ដល់២០% ពិន័យ១តោន២០ម៉ឺនរៀល ហើយបើដឹកលើសពី២០%ឡើងទៅ គឺពិន័យក្នុង១តោន៣០ម៉ឺនរៀល៕
ចែករំលែកព័តមាននេះ