រាជធានីភ្នំពេញ ៖ ប្រជាពលរដ្ឋមកពី១៦គ្រួសារបាន ស្នើសុំអន្តរាគមន៍រកយុត្តិធម៌ពីលោកជំទាវ ម៉ែន សំអន ឧបកនាយករដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា អធិការកិច្ច ពាក់ព័ន្ធនឹងការរំលោភដីរបស់ខ្លួន។ លោកស្រី យឺន សុខន តំណាងរាប្រជាពលរដ្ឋ១៦គ្រួសារ ដែលរស់នៅក្នុងភូមិតាជោ និងភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល បាននាំគ្នាមកដាក់ពាក្យបណ្តឹងសុំអន្តរាគមន៍ពីលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីទំនាក់ទំនង រដ្ឋសភា ព្រឹទ្ធសភានិងអធិការកិច្ច ដើម្បីឱ្យលុបចោលបណ្តឹងលោក ខៀវ វិសេស ដែលបានក្លែងឯកសារប្តឹងពួកគាត់ទាំង១៦គ្រួសារថារំលោភយកដីរបស់ខ្លួន។
លោកស្រី យឺន សុខន បានឲ្យដឹងថា នៅមុនពេលចូលដាក់ពាក្យបណ្តឹងកាលពីព្រឹកថ្ងៃទី០២ ខែកក្កដា ឆ្នាំ២០១៨នេះថា ការដាក់ពាក្យបណ្តឹងច្រានចោលនេះ ធ្វើឡើងបន្ទាប់ពីលោក ខៀវ វិសេស បានប្តឹងពួកគាត់មកលោកជំទាវ ម៉ែន សំអន កាលពីពេលថ្មីៗ ដោយបាន ក្លែងឯកសារចោទប្រកាន់ថារំលោភយកដីរបស់ខ្លួនទំហំ៣២ហិកតា ក្នុងចំណោម៥៥ ហិកតា។ លោកស្រីបញ្ជាក់ថា ដីកសិកម្មចំណុចឫស្សីជ្រោយ ចំណុចកោះតាអោ និងច្រករោងគោ ក្នុងភូមិលើ ឃុំស្វាយជ្រុំ ស្រុកខ្សាច់កណ្តាល ត្រូវបានពួកគាត់កាន់កាប់អាស្រ័យផលតាំងពី ឆ្នាំ១៩៩៥មក តាមរយៈការឆ្ការព្រៃប្រឈមនឹងគ្រាប់យុទ្ធភណ្ឌមិនទាន់ផ្ទុះ និងសត្វសាហាវ ថែមទៀត។ រហូតដល់ឆ្នាំ២០០៧ ក្រុមហ៊ុនស៊ិនដាយ បានដាក់គ្រឿងចក្រឈូសឆាយព័ទ្ធ ជាទំនប់រំលោភលើដីពួកគាត់ និងពលរដ្ឋច្រើនរយគ្រួសារផ្សេងៗទៀតបង្កឱ្យផ្ទុះការតវ៉ាជា បន្តបន្ទាប់។
ក្រោយពីការតវ៉ាសម្តេចអគ្គមហាសេនាបតីតេជោ ហ៊ុន សែន នាយករដ្ឋម ន្ត្រីនៃព្រះរាជាណាចក្រកម្ពុជា បានកាត់ដីប៉ះពាល់នេះចេញពីក្រុមហ៊ុនស៊ិនដាយ ហើយបានប្រ គល់មកឱ្យពលរដ្ឋវិញតាមរយៈលិខិតលេខ ៥៦៣ សេចក្តីជូនដំណឹង(ស.ជ.ណ) ចុះថ្ងៃទី២៨ មេសា ឆ្នាំ២០០៨ ចេញដោយទីស្តីការគណៈរដ្ឋមន្ត្រី។ ក្រោយពីមានអន្តរាគមន៍ពី សម្តេចនាយករដ្ឋមន្ត្រី ពួកគាត់បានចូលកាន់កាប់វិញធម្មតា លុះរហូតមកដល់ឆ្នាំ២០១៥ ឈ្មោះ ខៀវ វិសេស បានមកចរចាសុំទិញដីរបស់ពួកគាត់ចំនួនពីរលើក តែពួកគាត់មិនអាចលក់បាន ដោយសារដីនោះបានលក់ទៅឱ្យលោក លុយ ស៊ីលីញ រួចបាត់ទៅហើយ។
ក្រោយមកស្រាប់តែឈ្មោះ ខៀវ វិសេស ប្តឹងពួកគាត់ជាបន្តបន្ទាប់ ហើយមកទល់ពេលនេះបែរជាប្តឹងមកលោកជំទាវថា ពួកគាត់រំលោភយកដីរបស់ខ្លួនចំនួន៣ ២ហិកតា ដោយគ្មានហេតុផលច្បាស់លាស់ទៅវិញ។ លោកស្រីបញ្ជាក់ដូច្នេះថា «បញ្ជីឈ្មោះក្នុងលិខិតស.ជ.ណ លេខ ៥៦៣នោះ មានតែឈ្មោះពួកយើងខ្ញុំទាំង១៦គ្រួសារ និងប្រជាពលរដ្ឋដទៃប៉ុណ្ណោះ មិនមានឈ្មោះម្ចាស់ដីដែលលោ ក ខៀវ វិសេស បានទិញនោះទេ ដូច្នេះសូមឱ្យលោក ខៀវ វិសេស ទៅយកដីពីឈ្មោះអ្នកដែលបានលក់នោះចុះ»។ ចំពោះការដាក់ពាក្យបណ្តឹងនេះត្រូវក្រសួងទំនាក់ទំនងជាមួយរដ្ឋសភា ព្រឹទ្ធសភា អធិការកិច្ចទទួលយករួចហើយ ហើយបានសួរពួកគាត់ហើយដែរអំពីប្រវត្តិកាន់កាប់ ហើយឱ្យ រង់ចាំការដោះស្រាយតាមក្រោយ។
គួររំលឹកថា កន្លងមកសាលាខេត្តក៏បានច្រានចោល ពាក្យបណ្តឹងរបស់លោក ខៀវ វិសេស ដោយសារឯកសារទិញលក់មិនប្រក្រតី ហើយរដ្ឋបាលសាលាខេត្ត ក៏កំពុងដំណើរការនីតិវិធី ចុះបញ្ជីជូនប្រជាពលរដ្ឋដែលទទួល បានដីតាមរយៈស.ជ.ណ ៥៦៣ខាងលើ។ ជាចុងក្រោយប្រជាពករដ្ឋទាំង១៦គ្រួសារនោះ ក៏បានលើកដៃសំពះស្នើសុំលោកជំទាវ ម៉ែន សំអន ពិនិត្យឯកសារ និងប្រវត្តិកាន់កាប់ដីរបស់ ពួកគាត់ ហើយស្នើសុំលុបចោលទាំងស្រុងនូវបណ្តឹងឈ្មោះ ខៀវ វិសេស និងជួយអន្តរាគមន៍ អនុញ្ញាតដល់រដ្ឋបាលខេត្ត ដើម្បីចុះបញ្ជីប័ណ្ណកម្មសិទ្ធដីធ្លីជូនភាគីស្របច្បាប់៕
ចែករំលែកព័តមាននេះ