ប្រទេសលីប៊ី ៖ អ្នកនាំពាក្យម្នាក់នៃកងម៉ារីនលីប៊ី គូសបញ្ជាក់ប្រាប់ AFP នាថ្ងៃទី៣ ខែកក្កដាថា ការលិចកាណូតថ្មីក្នុងដែនទឹកនៃឆ្នេរសមុទ្រលីប៊ី បណ្ដាលឲ្យមនុស្សយ៉ាងតិច៦៣នាក់បាត់ខ្លួន ដែលនោះជាសោកនាដកម្មថ្មី របស់ពួកអន្តោប្រវេសន៍លួចលាក់ក្នុងសមុទ្រមេឌីទែរ៉ាណេ។
អ្នកនាំពាក្យរូបនេះបញ្ជាក់ថា ជនអន្តោប្រវេសន៍៦៣នាក់បាត់ខ្លួន ក្រោយការលិចកាណូតកៅស៊ូរបស់ពួកគេ កាលពីថ្ងៃទី១ ខែកក្កដា ក្នុងដែនទឹកលីប៊ី។ យោងតាមអ្នកនាំពាក្យរូបនេះ លោកឧត្ដមសេនីយ៍ AYOUB KACERN ថា ជនអន្តោប្រវេសន៍៤១នាក់អាចជួយសង្គ្រោះបាន ព្រោះពួកគេពាក់អាវពោង។ ចំណែកកងឆ្មាំឆ្នេរសមុទ្រនៅពុំបានរកឃើញសាកសពមនុស្សនៅកន្លែងកាណូតលិចឡើយ។
បើតាមពួកអ្នកនៅរួចរស់រានមានជីវិតបាននិយាយថា មនុស្ស១០៤នាក់ជិះក្នុងកាណូតលិច ក្នុងដែនទឹកនៃទីក្រុង GARABOULLI ស្ថិតនៅចម្ងាយ៥០គីឡូម៉ែត្រខាងកើតក្រុងទ្រីប៉ូលី។ បន្ថែមលើអ្នកនៅរួចរស់រានមានជីវិត៤១នាក់ នាវា១គ្រឿងរបស់កងឆ្មាំឆ្នេរសមុទ្រលីប៊ី នាថ្ងៃទី២ ខែកក្កដា ឆ្នាំ២០១៨ បានមកចតនៅក្រុងទ្រីប៉ូលី ជាមួយជនអន្តោប្រវេសន៍២៣៥នាក់ទៀត ក្នុងនោះមានកុមារ៥៤នាក់ និងនារី២៩នាក់ ដែលជួយសង្គ្រោះក្នុងប្រតិបត្តិការ២ទៀតនាតំបន់ដដែលនោះ៕
ចែករំលែកព័តមាននេះ