ការណែនាំថ្មីរបស់ពេទ្យកុមារបានឱ្យដឹងថា ការក្តៅខ្លួនអាចមានប្រយោជន៍សម្រាប់ប្រឆាំងនឹងការឆ្លង ។ ការណែនាំថ្មីពីបណ្ឌិតសភារោគកុមារអាមេរិក(American Academy of Pediatrics) ជំរុញឱ្យអាណាព្យាបាលទទួលស្គាល់ថា ការក្តៅខ្លួនគឺជាសញ្ញាដែលបង្ហាញថារាងកាយកំពុងប្រឆាំងនឹងការឆ្លងមេរោគ ។ វាមិនមែនជាអ្វីដែលគួរភ័យខ្លាចទេ ។
ពួកគេនិយាយថាប្រការល្អបំផុតក្នុងការព្យាបាលរោគក្តៅខ្លួនរបស់កុមារគឺការមើលថែពួកគេឱ្យល្អក្នុងពេលដែលរកមើលសញ្ញានៃជំងឺធ្ងន់ ជាជាងការយកចិត្តទុកដាក់លើការបន្ថយកម្តៅពួកគេឱ្យស្ថិតក្នុងកម្រិតធម្មតា ។
គ្រូពេទ្យ Henry Bernstein នៅ សហរដ្ឋអាមេរិក និយាយថា «ការក្តៅខ្លួនធ្វើឱ្យអាណាព្យាបាលជា ច្រើនធ្វើឲ្យ អ្វីៗគ្រប់យ៉ាងដែលអាចធ្វើឱ្យកូនរបស់ពួកគាត់មានកម្តៅធម្មតាវិញ ។ ការក្តៅខ្លួនមិនមានគ្រោះថ្នាក់នោះទេ ។ វាច្រើនតែជាគុណប្រយោជន៍ ។ អាណាព្យាបាលត្រូវដឹងថាការក្តៅខ្លួនមិនមែនជាអ្វីដែលអ្នកគួរខ្លាចនោះទេ ។ វាបង្ហាញថារាងកាយកំពុងប្រឆាំងនឹងការឆ្លងមេរោគ» ។
តើថ្នាំបន្ថយក្តៅខ្លួនណាខ្លះដែលមានប្រសិទ្ធភាព ? អ្នកស្រាវជ្រាវនិយាយថា ភស្តុតាងបានបង្ហាញថា មិនមានភាពខុសគ្នានៃសុវត្ថិភាព និងប្រសិទ្ធភាពរវាងថ្នាំបន្ថយកម្តៅ acetaminophen (Tylenol) និង ibuprofen (Advil, Motrin) ក្នុងការព្យាបាលការក្តៅខ្លួនចំពោះកុមារដែលមានសុខភាពល្អអាយុពី៦ខែទៅ១២ឆ្នាំ នោះទេ ។
ទោះជាការសិក្សាមួយចំនួនណែនាំថា ការផ្លាស់ប្តូរថ្នាំដោយម្តងប្រើ ibuprofen និងម្តងប្រើ acetaminophen អាចនឹងមានប្រសិទ្ធភាពក្នុងការបន្ថយកម្តៅ ប៉ុន្តែអ្នកស្រាវជ្រាវនិយាយថា នៅមានសំនួរទៅនឹងសុវត្ថិភាពនៃការប្រើប្រាស់នេះនិងប្រសិទ្ធភាពនៃការកើនឡើងភាពមិនស្រួលខ្លួន ។
អ្នកស្រាវជ្រាវនិយាយថា acetaminophen គឺជាថ្នាំដែលដែលធ្វើឱ្យកុមារចូលព្យាបាលសង្គ្រោះបន្ទាន់ច្រើនជាងគេដោយសារការប្រើប្រាស់ថ្នាំលើសចំណុះ ។ កុមារច្រើនជាង៨០ភាគរយ ដែលការប្រើប្រាស់ថ្នាំលើសចំណុះគឺបណ្តាលមកពីក្មេងលេបថ្នាំដោយគ្មានការត្រួតពិនិត្យ ។
ដូច្នេះហើយការទុកដាក់ថ្នាំឱ្យបានត្រឹមត្រូវ, ការឱ្យថ្នាំ និងការប្រើប្រាស់ថ្នាំបន្ថយកម្តៅគឺមានសារសំខាន់ណាស់ ។ គ្រូពេទ្យ Bernstein និយាយថា «យើងត្រូវប្រើវាក្នុងកម្រិតដែលត្រឹមត្រូវទៅតាមទម្ងន់ អាយុ និងសុខភាពទូទៅរបស់កុមារ»។
របៀបព្យាបាលកុមារក្តៅខ្លួន ៖ អ្នកស្រាវជ្រាវនិយាយថា ពេលកុមារក្តៅខ្លួន, អាណាព្យាបាល និងអ្នកមើលថែរ គួរយកចិត្តទុកដាក់លើស្ថានភាពទូទៅរបស់កុមារ និងមើលលើការប្រែប្រួលនៃសកម្មភាពឬអាកប្បកិរិយា និងអារម្មណ៍ដែលអាចជាសញ្ញានៃជំងឺធ្ងន់ ។
ការណែនាំសម្រាប់ព្យាបាលកុមារក្តៅខ្លួន មានដូចជា៖
១-ឱ្យកុមារញ៉ាំទឹកឱ្យបានច្រើន (ទឹកដោះ, ទឹកដោះគោ, ទឹក …) ដើម្បីចៀសវាងការខ្សោះជាតិទឹក ។
២–ជាទូទៅការប្រើ Acetaminophen ឬ ibuprofen ក្នុងកម្រិតត្រឹមត្រូវទៅតាមទម្ងន់របស់កុមារ គឺមានសុវត្ថិភាព និងប្រសិទ្ធភាពក្នុងការគ្រប់គ្រងរោគសញ្ញានៃកុមាក្តៅខ្លួន។
៣-ហាមដាស់កុមារដែលកំពុងគេងដើម្បីឱ្យគេញ៉ាំថ្នាំបន្ថយកម្តៅ ។
៤-មិនគួរឱ្យកុមារញ៉ាំថ្នាំក្អក និងថ្នាំត្រជាក់ដែលមានផ្ទុក Acetaminophen ឬ ibuprofen ទេ ។ ឪពុកម្តាយអាចនឹងឱ្យកុមារញ៉ាំថ្នាំ Acetaminophen ឬ ibuprofen និងថ្នាំក្អកនិងថ្នាំត្រជាក់ដែលមានផ្ទុកជាតិបន្ថយកម្តៅដូចគ្នាក្នុងពេលដំណាលគ្នា ។
៥-គួរប្រើប្រភេទថ្នាំតែមួយមុខ ចំពោះកុមារដែលត្រូវការថ្នាំទឹក ។
៦-ថ្នាំបន្ថយកម្តៅគ្រប់ប្រភេទត្រូវទុកឱ្យផុតពីដៃកុមារ ហើយត្រូវកំណត់ថ្នាំឱ្យបានត្រឹមត្រូវពេលឱ្យកុមារញ៉ាំថ្នាំ ដើម្បីចៀសវាងការប្រើប្រាស់លើសចំណុះ ៕ ស្រង់ពីគេហទំព័រសុខភាព
ចែករំលែកព័តមាននេះ