រាជធានីភ្នំពេញ ៖ ប្រទេសចិននឹងបន្តជួយទិញអង្ករកម្ពុជាក្នុងឆ្នាំ២០១៨នេះ កើនដល់៣០ម៉ឺនតោន និងជំរុញទំហំពាណិជ្ជកម្មទ្វេភាគីឲ្យកើនដល់៦ពាន់លានដុល្លារអាមេរិកនៅឆ្នាំ២០២០ ។ នេះបើតាមការអះអាងរបស់មន្ត្រីជាន់ខ្ពស់ក្រសួងការបរទេសកម្ពុជា ។ លោក អ៊ុង…
រាជធានីភ្នំពេញ ៖ ប្រទេសចិននឹងបន្តជួយទិញអង្ករកម្ពុជាក្នុងឆ្នាំ២០១៨នេះ កើនដល់៣០ម៉ឺនតោន និងជំរុញទំហំពាណិជ្ជកម្មទ្វេភាគីឲ្យកើនដល់៦ពាន់លានដុល្លារអាមេរិកនៅឆ្នាំ២០២០ ។ នេះបើតាមការអះអាងរបស់មន្ត្រីជាន់ខ្ពស់ក្រសួងការបរទេសកម្ពុជា ។
លោក អ៊ុង រចនា អគ្គនាយកនៃអគ្គនាយកដ្ឋានអាស៊ីប៉ាស៊ីហ្វិក នៃក្រសួងការបរទេស និងសហប្រតិបត្តិការអន្តរជាតិ បានលើកឡើងក្នុងពិធីផ្សព្វផ្សាយ «ខ្សែក្រវាត់មួយ ផ្លូវមួយ » កាលពីថ្ងៃទី៣០ មិថុនា នៅសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ថា ចិនគឺជាប្រទេសដែលបានជួយកម្ពុជាសម្រាប់ការអភិវឌ្ឍយ៉ាងច្រើន ហើយទំហំពាណិជ្ជកម្មចិនមកកម្ពុជា បានជាប់ចំណាត់ថ្នាក់លេខ១ ។
លោកបានបន្តថា បើសរុបជំនួយរបស់ចិនមកកម្ពុជា គឺបានសាងសង់ស្ពានចំនួន៧, កសាងផ្លូវថ្នល់បានជាង២ពាន់គីឡូម៉ែត្រ ហើយកំពុងពង្រីកការសាងសង់ជាបន្តបន្ទាប់ដូចជា ផ្លូវពីស្វាយអន្ទរមកព្រៃវែង (ផ្លូវជាតិលេខ១១) និងធ្វើទំនប់វារីអគ្គិសនីចំនួន៧ មានទំហំទឹកប្រាក់រហូតដល់១ពាន់លានដុល្លារអាមេរិក ចែកចាយថាមពលអគ្គិសនីដល់ប្រជាពលរដ្ឋប្រើប្រាស់នៅតាមបណ្តាខេត្ត/ក្រុង ។
លោកបានបន្ថែមថា ចំពោះទំហំពាណិជ្ជកម្មរដ្ឋាភិបាលនៃប្រទេសទាំងពីរបានឯកភាពគ្នាថា នឹងខិតខំឱ្យបានដល់៦ពាន់លានដុល្លារនៅឆ្នាំ២០២០ តាមរយៈការទាក់ទាញវិនិយោគិនចិនឱ្យបានច្រើនមកស្រុកខ្មែរ ហើយខេត្តព្រះសីហនុ ជាតំបន់សេដ្ឋកិច្ចពិសេស ដែលជាគោលដៅវិនិយោគដ៏ធំរបស់វិនិយោគិនចិន ។
លោកបានឲ្យដឹងទៀតថា ចាប់ពីឆ្នាំ២០១៥ដល់២០១៧ ចិនទិញអង្ករពីកម្ពុជាចំនួន២សែនតោនមកហើយ ហើយក្នុងឆ្នាំ២០១៨នេះ ចិនគ្រោងទិញអង្ករពីកម្ពុជាចំនួន៣០ម៉ឺនតោន ដើម្បីជួយកម្ពុជាដែលពិបាករកទីផ្សារ។ ដោយឡែកចំពោះកសិផលផ្សេងៗដូចជា ដំឡូងមី និងគ្រាប់ស្វាយចន្ទីវិញ ក្រសួងកសិកម្មកម្ពុជាកំពុងចរចាបំពេញលក្ខខណ្ឌជាមួយចិន ដើម្បីនាំចេញកសិផលទៅប្រទេសចិន នាពេលខាងមុខ ។
លោកបញ្ជាក់ថា ៖« ការសាងសង់គម្រោងធំអីចឹងសួរថាតើប៉ុន្មានឆ្នាំ គេអាចទទួលផលមកវិញ? ទីផ្សារយើងមានប្រជាជនតិច ការធ្វើចរាចរពីភ្នំពេញទៅខេត្តព្រះសីហនុ ទោះបីមមាញឹកប៉ុនណា រថយន្ដច្រើនប៉ុនណា ក៏ទុនវិនិយោគរបស់គេរាប់ពាន់លានដុល្លារដែរ អីចឹង គេពិបាកក្នុងការវិនិយោគ ហើយគម្រោងធំមួយទៀត គឺជាគម្រោងនៅក្នុងក្របខ័ណ្ឌផ្លូវសូត្រសមុទ្រ » ។
ជាមួយគ្នានោះដែរ លោកក៏បានលើកឡើងពីវិស័យទេសចរណ៍ចិនមកកម្ពុជាថា ចិនឈរនៅលំដាប់លេខ១ ដោយសារទេសចរចិនមកកម្ពុជាក្នុងឆ្នាំ២០១៧ មានចំនួន១លាន២សែននាក់ ដែលជួយឱ្យប្រជាពលរដ្ឋកម្ពុជាមានការងារធ្វើក៏ច្រើនផងដែរ ជាពិសេស នៅប្រាសាទអង្គរវត្ត និងតាមបណ្តាខេត្តមួយចំនួន ។ រីឯវិស័យអាកាសចរណ៍ ចិនមានក្រុមហ៊ុនអាកាសចរណ៍១៥ បាននិងកំពុងបើកប្រតិបត្តិការហោះហើរនៅស្រុកខ្មែរ ដោយក្នុង១សប្តាហ៍មាន១៥០ជើង ហើយរាជរដ្ឋាភិបាលកម្ពុជាកំពុងខិតខំប្រឹងប្រែងរកវិនិយោគទុនមកពង្រីកព្រលានយន្តហោះថ្មីនៅសៀមរាបទៀត ក្នុងទិសដៅទទួលទេសចរមកស្រុកខ្មែរឱ្យបានច្រើនទៀតនាពេលខាងមុខ ហើយចាប់ពីខែមករា ដល់ខែមេសា ដើមឆ្នាំ២០១៨នេះ យើងបានទទួលទេសចរអន្តរជាតិជាង៦សែននាក់ ។ ទិសដៅរបស់រាជរដ្ឋាភិបាល ក៏ដូចជាក្រសួងទេសចរណ៍ដែរ ធ្វើម៉េចទាក់ទាញទេសចរចិនឱ្យបាន២លាននាក់នៅឆ្នាំ២០២០ ។ លោកថា ៖« យើងបានបង្កើតទីក្រុងសម្ព័ន្ធភាពកម្ពុជា-ចិន មានខណ្ឌ-ខេត្តសម្ព័ន្ធមេត្រីភាពកម្ពុជា-ចិន ដើម្បីផ្លាស់ប្តូរទៅវិញទៅមកធ្វើឲ្យយើងស្គាល់គ្នាកាន់តែជិតស្និទ្ធ កាន់តែស៊ីជម្រៅ យល់គ្នាកាន់តែច្រើន ដែលទាំងនេះជាចំណុចសំខាន់ » ។
លោក នាក់ ចិន្ថារិទ្ធិ ប្រធានមជ្ឈមណ្ឌលកម្ពុជា សម្រាប់ការស្រាវជ្រាវសូត្រសមុទ្រសតវត្សរ៍ទី២១ នៃសាកលវិទ្យាល័យភូមិន្ទភ្នំពេញ បានលើកឡើងថា ការធ្វើពាណិជ្ជកម្មកម្ពុជា-ចិននេះ ដើម្បីធ្វើការកាត់បន្ថយ ឬលុបបំបាត់រនាំងពាណិជ្ជកម្ម និងវិនិយោគ ,ផ្លាស់ប្តូរព័ត៌មាន និងទិន្នន័យពាណិជ្ជកម្ម, គោរពនិងលើកស្ទួយការអនុវត្តច្បាប់ និងបទដ្ឋានគតិយុត្តទៅវិញទៅមក។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ធ្លាប់បានឲ្យដឹងថា កាលពីឆ្នាំ២០១៧ ការនាំចេញទំនិញរបស់កម្ពុជា ទៅកាន់ប្រទេសជាដៃគូនៅក្រោមប្រព័ន្ធអនុគ្រោះពន្ធ សម្រេចបានទឹកប្រាក់៥,៩ប៊ីលានដុល្លារ ពោលគឺបានកើនឡើង២០% បើធៀបនឹងឆ្នាំ២០១៦។ លោកបន្ថែមថា តាមរយៈតួលេខនេះ នៅក្នុងឆ្នាំ២០១៧ ទំហំពាណិជ្ជកម្មប្រទេសកម្ពុជាទាំងអស់ សម្រេចបាន៥,៨ប៊ីលានដុល្លារ ក្នុងនោះការនាំចេញរបស់កម្ពុជាមានចំនួន១ប៊ីលានដុល្លារ និងនាំចូលជាង៤,៧ប៊ីលានដុល្លារ។ ប្រទេសចិន គឺជាដៃគូវិនិយោគដ៏ធំនៅកម្ពុជា ដែលចូលរួមចំណែកឲ្យកម្ពុជាមានការអភិវឌ្ឍរីកចម្រើននាពេលនេះ ៕
ចែករំលែកព័តមាននេះ