ខេត្តស្វាយរៀង ៖ ស្របពេលមានការវិនិយោគថ្មីៗបន្ថែមនៅក្នុងខេត្តស្វាយរៀង ជាពិសេស នៅក្រុងបាវិត ដែលជាតំបន់មានសក្ដានុពលខ្ពស់ក្នុងវិស័យឧស្សាហកម្ម តម្រូវការធនធានមនុស្សសម្រាប់បម្រើឲ្យវិស័យនេះក៏មានខ្ពស់ដែរ ជាពិសេស កម្លាំងពលកម្មជំនាញកំពុងមានការខ្វះខាតនៅក្នុងបណ្ដារោងចក្រសហគ្រាសនានា ។…
ខេត្តស្វាយរៀង ៖ ស្របពេលមានការវិនិយោគថ្មីៗបន្ថែមនៅក្នុងខេត្តស្វាយរៀង ជាពិសេស នៅក្រុងបាវិត ដែលជាតំបន់មានសក្ដានុពលខ្ពស់ក្នុងវិស័យឧស្សាហកម្ម តម្រូវការធនធានមនុស្សសម្រាប់បម្រើឲ្យវិស័យនេះក៏មានខ្ពស់ដែរ ជាពិសេស កម្លាំងពលកម្មជំនាញកំពុងមានការខ្វះខាតនៅក្នុងបណ្ដារោងចក្រសហគ្រាសនានា ។
បើតាមលោក ម៉ែន វិបុល អភិបាលខេត្តស្វាយរៀង បានមានប្រសាសន៍ថា កាលពីមុន ប្រជាពលរដ្ឋក្នុងខេត្តស្វាយរៀងមួយភាគធំ ឬស្ទើរតែទាំងអស់ទៅហើយ គឺប្រកបរបរកសិកម្ម ធ្វើតែស្រែ និងមានការជួញដូរតិចតួច ។ ការប្រកបរបរកសិកម្មមិនបានធ្វើឲ្យជីវភាពរបស់ពលរដ្ឋក្នុងខេត្តមានភាពល្អប្រសើរនោះទេ ព្រោះការធ្វើស្រែទៅតាមរដូវកាល ។ ដូចនេះ នៅពេលចប់ការងារកសិកម្ម ពលរដ្ឋក៏ទំនេរ មិនមានការងារណាផ្សេងទេ តែក្រោយមក នៅពេលរាជរដ្ឋាភិបាលសម្រេចអនុញ្ញាតឲ្យបង្កើតតំបន់សេដ្ឋកិច្ចនៅក្រុង
បាវិត បានធ្វើឲ្យប្រជាពលរដ្ឋដែលមានសមាជិកពេញកម្លាំងបំពេញការងារ ទៅធ្វើការនៅតាមបណ្ដារោងចក្រសហគ្រាស និងអាចរកចំណូលបានខ្ពស់ជាងមុន ។
លោកបន្តថា ដោយសារតែពីមួយឆ្នាំទៅមួយឆ្នាំ សក្ដានុពលវិនិយោគនៅក្នុងខេត្តស្វាយរៀង ជាពិសេស នៅក្រុងបាវិតកាន់តែមានច្រើន តម្រូវការកម្លាំងពលកម្មក៏កាន់តែច្រើន រហូតធ្វើឲ្យវិបត្តិកង្វះកម្លាំងពលកម្មកើតមានឡើង ក្នុងកម្លាំងពលកម្មជំនាញកំពុងតែត្រូវការខ្លាំង និងទាមទារឲ្យសិស្ស-និស្សិតត្រូវរៀនជំនាញឲ្យចំនឹងទីផ្សារការងារនាពេលបច្ចុប្បន្ន។ លោកថា ៖« កង្វះកម្លាំងពលកម្មដើម្បីបម្រើការងារនៅក្នុងរោងចក្រសហគ្រាសក្នុងខេត្តស្វាយរៀង បានស្រូបទាញកម្លាំងពលកម្មពីខេត្តជិតៗមកធ្វើការនៅក្នុងខេត្តស្វាយរៀង ហើយពលរដ្ឋក្នុងខេត្តស្វាយរៀង ក៏លែងមានអ្នកចំណាកស្រុកច្រើនដូចកាលពីមុនដែរ » ។
បើតាមលោក ហាស់ ប៊ុនធី ប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង បានឲ្យដឹងផងដែរថា បើនិយាយពីកម្លាំងពលកម្មមិនមានជំនាញ មិនសូវខ្វះទេ តែបើកម្លាំងពលកម្មជំនាញ បច្ចេកទេស ជំនាញគ្រប់គ្រង រដ្ឋបាល និងធនធានមនុស្ស វាពិតជាខ្វះខាតមែន។ លោកថា ៖« សព្វថ្ងៃនេះ ជំនាញទាំងអស់នេះ ភាគច្រើនត្រូវបានជ្រើសរើសមកពីខេត្តផ្សេង ឬមកពីភ្នំពេញ ជាដើម ។ ដូចនេះ ក្នុងនាមជាមន្ទីរការងារ និងបណ្ដុះបណ្ដាលវិជ្ជាជីវៈខេត្ត សូមអំពាវនាវឲ្យប្អូនៗសិស្ស-និស្សិតចាប់យកជំនាញណាដែលប្រទេសកម្ពុជាកំពុងត្រូវការវិញ » ។
លោកបន្តថា ចាប់តាំងពីរាជរដ្ឋាភិបាលបានបង្កើតឲ្យមានតំបន់សេដ្ឋកិច្ចពិសេសនៅក្នុងស្វាយរៀង បានស្រូបទាញកម្លាំងពលកម្មជាច្រើនជូនបងប្អូនប្រជាពលរដ្ឋក្នុងខេត្ត ។ បច្ចុប្បន្ននេះ នៅក្នុងខេត្តស្វាយរៀងទាំងមូលមានតំបន់សេដ្ឋកិច្ចពិសេសចំនួន១១ ហើយក្នុងនោះមានតំបន់សេដ្ឋកិច្ចពិសេសចំនួន៨ កំពុងដំណើរការ។ លោកថា ៖« នៅក្នុងខេត្តស្វាយរៀង មានសហគ្រាសដែលបានចុះបញ្ជី និងដំណើរការមានចំនួន១៧៥សហគ្រាស និងមានកម្មករកំពុងបម្រើការចំនួន៦១.០៤៣នាក់ ។ ក្នុងចំណោមកម្មករកំពុងបម្រើការនេះដែរ អាចស្រូបយកប្រាក់ចំណូលសរុបបានប្រមាណ១៤៥លានដុល្លារក្នុង១ឆ្នាំ » ។
គួរបញ្ជាក់ថា ខេត្តស្វាយរៀងចាប់ផ្ដើមបង្កើតតំបន់សេដ្ឋកិច្ចពិសេសដំបូងនៅឆ្នាំ២០០៥ ហើយកាលណោះ មានកម្មករតែចំនួន២.៩៨៣នាក់ប៉ុណ្ណោះ ហើយចំនួននេះក៏បានកើនឡើងជាបន្តបន្ទាប់ នៅពេលមានរោងចក្រសហគ្រាសថ្មីៗចូលទៅវិនិយោគនៅតំបន់នោះ និងបានធ្វើឲ្យខេត្តមួយនេះកំពុងជួបប្រទះវិបត្តិខ្វះកម្លាំងពលកម្ម តែមិនទាន់ធ្ងន់ធ្ងរទេ ៕
ចែករំលែកព័តមាននេះ