ខេត្តដាក់ឡាក់ ៖ លោកឧត្តមសេនីយ៍ទោ ឡោ សុខា ស្នងការនគរបាលខេត្តមណ្ឌលគិរី រួមទាំងលោកស្នងការរង និងមន្ត្រីក្រោមឱវាទបានអញ្ជើញចុះសួរសុខទុក្ខលោកវរសេនីយ៍ត្រី តាត់ យ៉េន អធិការនគរបាលស្រុកពេជ្រាដានាថ្ងៃទី០៣ ខែកក្កដា ឆ្នាំ២០១៨នេះដែលកំពុងសម្រាកព្យាបាលនៅមន្ទីរពេទ្យខេត្តដាក់ឡាក់នៃសាធារណៈរដ្ឋសង្គមនិយមវៀតណាម គ្រាដែលលោកបានរងរបួសដៃស្តាំ ពេលឆ្មក់ចូលបង្ក្រាបការជួញដូរគ្រឿងញៀននៅមូលដ្ឋានរបស់លោកផ្ទាល់កាលពីថ្ងៃទី២៦ ខែមិថុនា ឆ្នាំ២០១៨ ។
លោកស្នងការនគរបាលខេត្តបានពាំនាំការសួរសុខទុក្ខពីសំណាក់ឯកឧត្តមអភិបាលខេត្តមណ្ឌលគិរី និងមន្ត្រីនគរបាលទាំងអស់ ។ លោកស្នងការបានលើកទឹកចិត្តដល់លោកអធិការស្រុកពេជ្រាដាត្រូវថែទាំសុខភាព និងត្រូវពិសាថ្នាំឲ្យបានទៀងទាត់ តាមវេជ្ជបញ្ជាពេទ្យជាពិសេសក៏សូមជូនពរឲ្យលោកអធិការ និងលោកនាយការិយាល័យប្រឆាំងភេវកម្ម និងឧក្រិដ្ឋកម្មឆ្លងដែនឆាប់ជាសះស្បើយ ដើម្បីវិលត្រឡប់ទៅបម្រើការងារនៅក្នុងអង្គភាពវិញ ។
នាឱកាសនោះដែរ លោកស្នងការនគរបាលខេត្តបាននាំយកថវិកាឯកឧត្តម ស្វាយ សំអ៊ាង អភិបាលខេត្តចំនួន២លានរៀលរួមទាំងថវិកាលោកស្នងការផ្ទាល់ចំនួន៥០០ដុល្លារក៏ដូចជា មន្ត្រីក្រោមឱវាទចំនួន២៥០ដុល្លារ និង៦៥០០០ម៉ឺនរៀលផ្តល់ជូនលោកវរសេនីយ៍ត្រី តាត់ យ៉េន អធិការនគរបាលស្រុកពេជ្រាដា និងលោកវរសេនីយ៍ទោ បឹង ដែង នាយការិយាល័យប្រឆាំងភេវកម្ម និងឧក្រិដ្ឋកម្មឆ្លងដែនដែលកំពុងសម្រាកព្យាបាលនៅខេត្តប្រទេសវៀតណាម ។
សូមបញ្ជាក់ថា លោកអធិការនគរបាលស្រុកពេជ្រាដាបានចូលទៅបង្ក្រាបឈ្មួញទុច្ចរិតជួញដូរគ្រឿងញៀនក្នុងមូលដ្ឋានរបស់លោកនៅវេលាម៉ោង៩យប់ថ្ងៃទី២៦ មិថុនា ២០១៨ ភូមិពូលុ ឃុំប៊ូស្រា ស្រុកពេជ្រាដា ខេត្តមណ្ឌលគិរី ។ ហើយត្រូវបានជនសង្ស័យតដៃបណ្តាលឲ្យលោកអធិការស្រុកពេជ្រារងរបួសដៃខាងស្តាំ ចំណែកជនសង្ស័យម្នាក់ត្រូវសមត្ថកិច្ចបាញ់បាក់ភ្លៅម្ខាងផងដែរ ៕
ចែករំលែកព័តមាននេះ