ខេត្តព្រះសីហនុ ៖ កាលពីវេលាម៉ោង១២ថ្ងៃត្រង់ថ្ងៃទី២ កក្កដា ២០១៨ កម្លាំងសមត្ថកិច្ចនគរបាលក្រុងព្រះសីហនុបង្ក្រាបបទល្មើសជនជាតិចិនបង្ខាំងជនជាតិចិនដូចគ្នា ដើម្បីជំរិតទារប្រាក់ ដោយបានធ្វើការឃាត់ខ្លួនជនសង្ស័យចំនួន៥នាក់ ចំណែកជនសង្ស័យ៣នាក់ទៀតរត់គេចខ្លួនបាត់។
ជនសង្ស័យទាំង៥នាក់នោះរួមមាន ១-ឈ្មោះ Yang Jun ភេទប្រុស អាយុ៣៤ឆ្នាំ ជាអ្នកទេសចរណ៍ ២-ឈ្មោះ Hou Jian ភេទប្រុស អាយុ២៩ឆ្នាំ មុខរបរបុគ្គលិកកាស៊ីណូ Golden City ៣-ឈ្មោះ Jiu Fei Bin ភេទប្រុស អាយុ៣៣ឆ្នាំ មុខរបរបុគ្គលិកកាស៊ីណូ New Macau ៤-ឈ្មោះ Wo Luo Yang ភេទប្រុស អាយុ២៤ឆ្នាំ មុខរបរបុគ្គលិកកាស៊ីណូ ជីនប៉ី និង៥-ឈ្មោះ Huang Wan Ying ភេទប្រុស អាយុ២៥ឆ្នាំ ជាអ្នកទេសចរណ៍ ។ ចំណែកសម្ភារៈដកហូតបានរួមមាន ខ្នោះដៃចំនួន៥គូ ពិលឆក់ចំនួន២ ទូរស័ព្ទចំនួន៧គ្រឿង ។ ទាក់ទិននឹងករណីបង្ក្រាបក្រុមជនសង្ស័យបង្ខាំងមនុស្សជំរិតទារប្រាក់ទាំងនោះ ត្រូវបានលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុថ្លែងឲ្យដឹងថា នៅវេលាម៉ោងខាងលើ សមត្ថកិច្ចមូលដ្នានទទួលបានព័ត៌មានថា មានជនជាតិចិន១ក្រុមពពាក់ពពួនគ្នាចេញចូលផ្ទះជួលមួយកន្លែងស្ថិតនៅក្រុម៣៣ ភូមិ៥ សង្កាត់លេខ៤ ក្រុងព្រះសីហនុ អាចកំណត់បានជាក្រុមមានសមាសភាពមិនល្អ ។ ក្រោយពេលទទួលបានព័ត៌នោះភ្លាម ក្នុង នាមរូបលោកជាស្នងការ និងមានជំនាញព្រហ្មទណ្ឌច្រើនឆ្នាំផង បានប្រើប្រាស់កម្លាំងការិយាល័យជំនាញចុះទៅសហការជាមួយអធិការដ្ឋាននគរបាលក្រុងព្រះសីហនុ និងកម្លាំងប៉ុស្តិ៍រដ្ឋបាលសង្កាត់លេខ៤ ក្រោមការសម្របសម្រួលពីលោកស្រីព្រះរាជអាជ្ញានៃអយ្យការអមសាលាដំបូងខេត្ត បានចូលទៅធ្វើការឆែកឆេរផ្ទះជួល១កន្លែងនោះ និងបានឃាត់ខ្លួនជនសង្ស័យចំនួន៥នាក់ ដូចមានឈ្មោះខាងលើ ព្រមទាំងបានធ្វើការរំដោះជនរងគ្រោះជាជនជាតិចិន៥នាក់ដែលត្រូវជនសង្ស័យបានចាប់យកទៅបង្ខាំងទុកដើម្បីជម្រិតទារប្រាក់ផងដែរ ។
លោកស្នងការនគរបាលខេត្តបន្តថា បន្ទាប់ពីសមត្ថកិច្ចបានធ្វើការឃាត់ខ្លួនសង្ស័យទាំ៥នាក់នោះមក ពួកគេបានសារភាពគ្នាថា កាលពីថ្ងៃទី៣០ មិថុនា ២០១៨ ពួកគេ (ក្រុមជនជនសង្ស័យ) និងជនរងគ្រោះបានស្រុះស្រួលគ្នាចូលលេងល្បែងស៊ីសងនៅកាស៊ីណូមួយ ហើយជនរងគ្រោះ៥នាក់រួមមាន ១-ឈ្មោះ Chen Dong Qin ភេទប្រុស អាយុ២៣ឆ្នាំ ជាអ្នកទេសចរណ៍ ២-ឈ្មោះ Jian Liang ភេទប្រុស អាយុ២៩ឆ្នាំ ជាអ្នកទេសចរណ៍ ៣-ឈ្មោះ Zeng Zhi Quo ភេទប្រុស អាយុ២៧ឆ្នាំ មុខរបរបុគ្គលិកកាស៊ីណូ New Macau ៤-ឈ្មោះ Ling Yong Yong ភេទប្រុស អាយុ២៩ឆ្នាំ ជាអ្នកទេសចរណ៍ និង៥-ឈ្មោះ Shi Hao Bo ភេទប្រុស អាយុ៤៦ឆ្នាំ ជាអ្នកទេសចរណ៍ បានចាញ់ល្បែងអស់ប្រាក់ពីខ្លួន ហើយក៏បាននាំគ្នាខ្ចីប្រាក់ពីក្រុមជនសង្ស័យ ដើម្បីបានលេងបន្តទៀត ។ ខណៈក្រុមជនសង្ស័យក៏បានចាញ់អស់ប្រាក់ពីខ្លួនដែរ ពួកគេបានទាមទារប្រាក់ពីជនរងគ្រោះវិញ ប៉ុន្តែពេលនោះជនរងគ្រោះគ្មានប្រាក់សងទៅជនសង្ស័យទេ ព្រោះចាញ់អស់ដូចគ្នា ទើបបានក្រុមជនសង្ស័យកើតគំនិតចាប់បង្ខាំងជនរងគ្រោះ ទុកជំរិតទារប្រាក់ពីឪពុកម្តាយនៅឯប្រទេសចិន ដើម្បីឲ្យផ្ញើលុយមកសងពួកគេវិញ និង ដែលជាថ្នូរក្នុងការដោះលែងជនរងគ្រោះទាំង៥នាក់នោះ ។
ដោយយោងទៅលើករណីបង្ក្រាបជាក់ស្តែង និងស្តាប់ចម្លើយជនសង្ស័យទាំង៥នាក់ ពិតជាមានភាពស៊ី
សង្វាក់គ្នាក្នុងការប្រព្រឹត្តបទល្មើសបង្ខាំងជម្រិតទារប្រាក់មែន សមត្ថកិច្ចរៀបចំកសាងសំណុំរឿង បញ្ជូនជនសង្ស័យទៅកាន់សាលាដំបូងខេត្ត ដើម្បីចាត់ការតាមនីតិវិធី ៕
ចែករំលែកព័តមាននេះ