រាជធានីភ្នំពេញ ៖ មុខរបរលក់ផ្កាឈូកនៅទីតាំងព្រះអង្គដងកើ ខាងមុខព្រះបរមរាជវាំង តាមបណ្តោយវិថីព្រះស៊ីសុវត្ថិ ស្ថិតក្នុងសង្កាត់ជ័យជំនះ ខណ្ឌដូនពេញ បានផ្ដល់ប្រាក់ចំណូលដល់ពលរដ្ឋដែលចាប់យកអាជីពនេះ ប្រមាណពី៥ម៉ឺន ទៅ១០ម៉ឺនរៀលក្នុង១ថ្ងៃ។ ចំណូលនេះបានធ្វើឲ្យជីវភាពរបស់ពួកគាត់កាន់តែប្រសើរឡើងពីមួយថ្ងៃទៅមួយថ្ងៃ ។
អ្នកស្រី ឡាយ លីន អាយុ៥៣ឆ្នាំ ជាអ្នកលក់ផ្កានៅជាប់របងសាលមហាស្របចតុមុខ ជាទីកន្លែងកំណត់ស្តង់លក់ផ្កា ដែលរៀបចំឡើងដោយសាលារាជធានីភ្នំពេញ បានរៀបរាប់ថា អ្នកស្រីប្រកបរបរនេះតាំងពីឆ្នាំ២០០០មក ហើយការលក់ផ្កាបានជួយឲ្យជីវភាពគ្រួសារអ្នកស្រីល្អប្រសើរជាងមុនផងដែរ ។
អ្នកស្រីបន្តថា ក្នុង១ថ្ងៃ អាចលក់ផ្កាឈូកបានចន្លោះពី២០០ទៅ៣០០ទង។ ថ្ងៃលក់ដាច់ជាងគេ គឺនៅថ្ងៃសីល និងថ្ងៃបុណ្យទានផ្សេងៗ ហើយផ្កាដែលលក់ដាច់ច្រើនគឺផ្កាឈូក។ ផ្កាឈូកទាំងនេះ អ្នកស្រីបានទិញពីអ្នកដាំនៅតំបន់ទំនប់កប់ស្រូវ ដែលយកមកបោះដុំឲ្យគាត់ គឺផ្កាឈូក១០០ដើមតម្លៃ២មុឺនរៀល ប៉ុន្តែបើនៅថ្ងៃបុណ្យទាន គឺថ្លៃជាងនេះ ។ សព្វថ្ងៃ គាត់មានកូន៥នាក់ ហើយពួកគេក៏ប្រកបមុខរបរលក់ផ្កាដែរ ។
អ្នកស្រីនិយាយថា ៖« ក្នុង១ខែ ខ្ញុំអាចរកប្រាក់បាន៣០០ដុល្លារ និងយកប្រាក់ទៅបង់ធនាគារ ព្រោះខ្ចីលុយធនាគារមកធ្វើផ្ទះ ក្រោយពីភ្លើងឆេះ ។ ខ្ញុំសូមថ្លែងអំណរគុណដល់សាលារាជធានីភ្នំពេញ ដែលបានសាងសង់ស្តង់លក់ផ្កាដ៏ស្រស់ស្អាត និងមានរបៀបរៀបរយ ងាយស្រួលដល់ភ្ញៀវចូលមកទិញផ្កា ដោយមិនយកថ្លៃឈ្នួលប្រចាំខែទេ គឺគ្រាន់តែយកលុយថ្លៃអនាម័យក្នុង១ថ្ងៃ ១ពាន់រៀលបុ៉ណ្ណោះ » ។
អ្នកស្រីបន្ថែមថា មុខរបរលក់ផ្កាឈូក ទៀន ធូបនេះ មិនអាចឲ្យអ្នកស្រីធ្វើជាអ្នកមានក៏ពិតមែន ប៉ុន្តែវាជាមុខរបរសុចរិតនិងថ្លៃថ្នូរ ដែលអាចឲ្យជីវភាពគ្រួសារគាត់ធូរធារ មិនខ្វះមុខ ខ្វះក្រោយទេ ហើយគាត់នឹងបន្តមុខរបរនេះតកូន តចៅផងដែរ ។
លោកយាយ សុខ យ៉ាត អាយុ៧៥ឆ្នាំ មានស្រុកកំណើតនៅស្រុកស្វាយអន្ទ ខេត្តព្រៃវែង ដែលបានមកលក់ផ្កាឈូកនៅទីនេះដែរ រៀបរាប់ថា គាត់បានចាកចេញពីស្រុកកំណើតមកចាប់មុខរបរលក់ផ្កាឈូកនៅមុខព្រះអង្គដងកើ អស់រយៈពេល៣ឆ្នាំហើយ។ ការលក់ដូរនេះម្យ៉ាងដែរសម្រាប់មនុស្សចាស់ដូចគាត់ វាមិនប្រើកម្លាំងធ្ងន់ទេ ។ ជារៀងរាល់ថ្ងៃ មានម៉ូយដឹកផ្កាឈូកពីតំបន់កប់ស្រូវ យកមកបោះដុំលក់ឲ្យគាត់ គឺ១០០ដើម តម្លៃ១៥.០០០រៀល។ ពេលគាត់លក់ចេញវិញ គឺផ្កាឈូក៥ដើម និងទៀនធូបផង តម្លៃ១ម៉ឺនរៀល ។ ក្នុង១ថ្ងៃ គាត់អាចលក់បានប្រាក់ពី១០ម៉ឺន ទៅ១៥ម៉ឺនរៀលដែរ ហើយលក់ដាច់ច្រើន គឺនៅថ្ងៃសីល និងបុណ្យទានតូចធំ ។
លោកយាយប្រាប់ថា ៖« ខ្ញុំមានកូនចៅនៅឯស្រុកកំណើតដែរ ពួកគេមិនឲ្យខ្ញុំមកលក់ផ្កានៅភ្នំពេញទេ តែដោយសារខ្ញុំមើលឃើញថា មុខរបរលក់ផ្កានៅមុខព្រះអង្គដងកើ មិនប្រើកម្លាំងធ្ងន់ ហើយទទួលចំណូលអាចសន្សំបានប្រាក់គ្រាន់នឹងទៅវត្តនៅចូលឆ្នាំខ្មែរ និងមិនបាច់សុំលុយកូនចៅ ។ ម្យ៉ាងទៀត ខ្ញុំមិនអាចដើរសុំទានគេឡើយ » ។
យុវជន យឹម វាសនា ដែលកំពុងតែឈរទិញផ្កាឈូកពីលោកយាយ សុខ យ៉ាត បាននិយាយថា ៖« ជារៀងរាល់ថ្ងៃសីល ខ្ញុំតែងមកជួយទិញផ្កាឈូករបស់លោកយាយ ព្រោះឃើញគាត់មានអាយុច្រើន សុខចិត្តអង្គុយលក់ក្រោមឆត្រ » ។
សូមបញ្ជាក់ថា សម្រាប់ពលរដ្ឋកម្ពុជា រួមទាំងទេសចរបរទេស ដែលបានមកទស្សនារមណីយដ្ឋាននានាក្នុងរាជធានីភ្នំពេញ ភាគច្រើនពួកគេទៅគោរពនៅខាងមុខព្រះអង្គដងកើ ដើម្បីសុំសេចក្ដីសុខចម្រើនទៅតាមជំនឿរៀងៗខ្លួន។
ពួកគេបានទិញធូប ទៀន និងផ្កាភ្ញីសម្រាប់ថ្វាយព្រះអង្គ ។ កត្តាទាំងនេះហើយបានផ្ដល់ប្រាក់ចំណូលដល់ពលរដ្ឋជាអ្នកលក់ផ្កានៅទីនេះជារៀងរាល់ថ្ងៃ ។ មុខរបរលក់ផ្ការបស់ពលរដ្ឋនៅមុខព្រះអង្គដងកើ គឺមានការរៀបចំយ៉ាងមានរបៀបរៀបរយ និងបែងចែកវេនគ្នាលក់នៅខាងមុខម្នាក់១ថ្ងៃ ដើម្បីឱ្យអ្នកលក់ផ្កានៅតំបន់នេះទទួលបានប្រាក់ចំណូលដូចៗគ្នា ៕
ចែករំលែកព័តមាននេះ