រាជធានីភ្នំពេញ ៖ យុវជនវ័យ២២ឆ្នាំម្នាក់បានស្លាប់ក្នុងមន្ទីរពេទ្យកាល់ម៉ែត កាលពីវេលាម៉ោង៣និង៣០នាទីទៀបភ្លឺថ្ងៃទី១០ មីនា២០១១ ក្រោយពីយុវជននោះត្រូវក្រុមក្មេងស្ទាវចាក់មួយកាំបិត ខណៈកើតទំនាស់ពាក្យសម្តីពេលរាំធុងបាស់ ក្នុងពិធីមង្គលការរបស់បងប្រុសបង្កើតនៅភូមិកណ្តាល ឃុំសាឡុង ស្រុកខ្សាច់កណ្តាល ខេត្តកណ្តាល ។
សាច់ញាតិយុវជនរងគ្រោះបាននិយាយឱ្យដឹងថា យុវជនរងគ្រោះដែលត្រូវក្រុមក្មេងស្ទាវនៅឃុំសាឡុង ចាក់ស្លាប់មានឈ្មោះអ៊ិន សំណាង អាយុ២២ឆ្នាំ ទីលំនៅក្នុងភូមិម្រះព្រៅ ឃុំត្រពាំងស្តៅ ស្រុករមាសហែក ខេត្តស្វាយរៀង។ នៅថ្ងៃកើតហេតុ ជនរងគ្រោះដែលជាកូនពៅ និងសាច់ញាតិបានមកចូលរួមពិធីមង្គលការរបស់បងប្រុសបង្កើតក្នុងភូមិកណ្តាល ឃុំសាឡុង ស្រុកខ្សាច់កណ្តាល ខេត្តកណ្តាល ពេលនោះភាពសប្បាយរីករាយ និងអបអរសាទរគូស្វាមីភរិយាថ្មី បានដំណើរការយ៉ាងរលូន ។ លុះយប់ឡើងមានចាក់រាំធុងបាស់ ដើម្បីកំដររោងការ និងកិច្ចស្វាគមន៍ដល់មិត្តភក្តិដែលចូលរួមបទញាក់កន្ទ្រាក់ពេញនិយមរបស់យុវវ័យពីមួយបទទៅមួយបទយ៉ាងសប្បាយ ដោយមានកូនកម្លោះ កូនក្រមុំឡើងរាំ ដើម្បីបើកពិធីសប្បាយភាពជូនញាតិមិត្តផងដែរ ។
នៅវេលាម៉ោងជាង១១យប់នាថ្ងៃដដែល យុវជនរងគ្រោះឈ្មោះអ៊ិន សំណាង បានឡើងរាំជាមួយមិត្តភក្តិ ហើយពេលនោះមានយុវជនមួយក្រុមទៀតដែលគេស្គាល់ជាក្រុមស្ទាវប្រចាំឃុំសាឡុង ចូលរាំបទញាក់ និងជាន់ជើងភាគីជនរងគ្រោះក៏កើតទំនាស់ពាក្យសម្តីដាក់គ្នាទៅវិញទៅមក ភ្លាមនោះម្ចាស់រោងការសុំឱ្យបញ្ឈប់ទំនាស់ និងបន្តការរាំទៀត ។ ក្រោយមកយុវជនរងគ្រោះឈប់រាំហើយដើរទៅផ្ទះស្នាក់នៅ លុះចេញផុតពីរោងការបន្តិចស្រាប់តែមានក្មេងស្ទាវពីរនាក់ជិះម៉ូតូមកក្បែរជនរងគ្រោះ រួចជនម្នាក់ដែលអង្គុយខាងក្រោយលោតចុះពីលើម៉ូតូដកកាំបិតចាក់ចំក្រោមឆ្អឹងជំនីរខាងឆ្វេងមួយកាំបិតបណ្តាលឱ្យដេកដួលលើដី ព្រមទាំងស្រែកឱ្យសាច់ញាតិជួយ រីឯជនដៃដល់នាំគ្នាគេចខ្លួនបន្សល់ទុកម៉ូតូនៅកន្លែងកើតហេតុ ។
សាច់ញាតិជនរងគ្រោះបានបញ្ចាក់ថា ភ្លាមៗនោះយុវជនរងគ្រោះត្រូវបានបញ្ជូនទៅមន្ទីរពេទ្យកាល់ម៉ែត ដើម្បីសង្គ្រោះជីវិត ក៏ប៉ុន្តែដោយសារមុខរបួសធ្ងន់ធ្ងរ ជនរងគ្រោះបានស្លាប់នៅវេលាម៉ោង៣និង៣០នាទីទៀបភ្លឺឈានចូលថ្ងៃទី១០ មីនា ក្រោមសំឡេងស្រែកយំពីក្រុមគ្រួសារ ព្រោះយុវជនដែលស្លាប់នេះគឺជាកូនពៅមកចូលរួមមង្គលការបងប្រុសជាកូនទីប្រាំ ។ សពយុវរងគ្រោះត្រូវបានគេដឹកយកទៅធ្វើបុណ្យនៅឯស្រុកកំណើត រីឯជនដៃដល់ត្រូវបានស្គាល់អត្តសញ្ញាណ ហើយពេលនេះសមត្ថកិច្ចកំពុងស្រាវជ្រាវ៕
ចែករំលែកព័តមាននេះ