ខេត្តកំពង់ឆ្នាំង ៖ មន្ត្រីនគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តកំពង់ឆ្នាំងបានអំពាវនាវឲ្យអ្នកបើកបរដែលប្រើប្រាស់លើដងផ្លូវត្រូវគោរពច្បាប់ចរាចរណ៍ទាំងអស់គ្នា សូមកុំដឹកសំពីងសំពោងដែលបង្កឲ្យមានគ្រោះថ្នាក់ចរាចរណ៍ជាយថាហេតុ ។ ការលើកឡើងបែបនេះ ខណៈដែលសមត្ថកិច្ចនគរបាលចរាចរណ៍ផ្លូវគោកខេត្តបានចាប់ឃាត់រ៉ឺម៉កម៉ូតូដឹកសំពីងសំពោងជាច្រើនគ្រឿង កាលពីព្រឹកថ្ងៃទី០២ ខែកក្កដា នេះ ។
លោកអនុសេនីយ៍ទោ ឈឹម លីឡេង នាយផ្នែកដោះស្រាយគ្រោះថ្នាក់ចរាចរណ៍នៃការិយាល័យចរាចរណ៍ផ្លូវគោក ខេត្តកំពង់ឆ្នាំងបានឲ្យដឹងថា យោងតាមអនុសាសន៍ដ៏ខ្ពង់ខ្ពស់របស់ឯកឧត្តម គណៈបញ្ជាការឯកភាពខេត្តក៏ដូចជា លោកស្នងការនគរបាលខេត្តស្តីពីការចាប់ឃាត់រថយន្តដឹកសំពីងសំពោងគ្មានសណ្ដាប់ធ្នាប់ដែលអាចបង្កកត្តាគ្រោះថ្នាក់ចរាចរណ៍ផ្សេងៗ ។ នៅថ្ងៃនេះសមត្ថកិច្ចជំនាញបានចាប់ឃាត់រ៉ឺម៉កម៉ូតូដឹកសំពីងសំពោងដែលដឹកពូកចេញពីខេត្តប៉ៃលិនឆ្ពោះទៅរាជធានីភ្នំពេញ និងបន្តដឹកទៅខេត្តតាកែវ បានជាច្រើនគ្រឿង ដោយក្នុងនោះសមត្ថកិច្ចបានចាត់វិធានការតាមផ្លូវច្បាប់ គឺត្រូវធ្វើការផាកពិន័យ និងឲ្យម្ចាស់រ៉ឺម៉កម៉ូតូរើអីវ៉ាន់ចេញទៅដាក់រថយន្ត ឬយានផ្សេងៗទៀត និងធ្វើកិច្ចសន្យាត្រឹមត្រូវទើបឲ្យបន្តទៅមុខទៀតបាន ។
ជាមួយគ្នានេះដែរ ក្នុងនាមមន្ត្រីនគរបាលចរាចរណ៍ផ្លូវគោកខេត្តកំពង់ឆ្នាំង លោកសូមអំពាវនាវដល់ម្ចាស់យានយន្តរថយន្តទាំងអស់ សូមមេត្តាចូលរួមគោរពច្បាប់ចរាចរណ៍ទាំងអស់គ្នា ដើម្បីកាត់បន្ថយគ្រោះថ្នាក់ ឲ្យនៅកម្រិតទាបបំផុត ។
បុរសឈ្មោះ ប៊ុត វ៉ាត អាយុ៣៥ឆ្នាំ និងឈ្មោះ ប៊ូ ថេត អាយុ៣៣ឆ្នាំ មានទីលំនៅខេត្តតាកែវ ជាអ្នកបើកម៉ូតូ ដឹកពូកខាងលើបានឲ្យដឹងថា ពួកគាត់បានដឹកពូកទាំងនេះពីខេត្តបាត់ដំបងយកទៅលក់ដល់ខេត្តតាកែវ ដោយក្នុងរ៉ឺម៉ក១គ្រឿងដឹកបានចំនួន២០០ពូក ហើយក្នុង១ជើងមួយៗ គាត់ប្រើរយៈពេលប្រមាណពី១០ទៅ១៥ថ្ងៃ ទម្រាំដល់ខេត្តតាកែវ ព្រោះត្រូវដឹកលក់តាមផ្លូវខ្លះ ពិសេសលក់នៅតាមមុខរោងចក្រពេលកម្មករបើកប្រាក់ខែ ។ ពូកមួយតម្លៃត្រឹមតែពី៤ទៅ៥ម៉ឺនរៀលតែប៉ុណ្ណោះ គឺមានការចំណេញតិចតួចបំផុតហេតុនេះហើយបើមិនដាក់ច្រើនទេក៏មិនរួចថ្លៃចំណាយដែរ ។
ពួកគាត់ទាំងពីរនាក់បាននិយាយថា កន្លងមកធ្លាប់ដឹកច្រើនបែបហ្នឹងដែរ ពេលខ្លះក៏ត្រូវប៉ូលិសផាកពិន័យចាប់ឃាត់ឲ្យរើចេញសាងរ៉ឺម៉កផ្សេង ប៉ុន្តែពេលខ្លះក៏រួចខ្លួនដែរម្ល៉ោះហើយចេះតែលួចលាក់ដឹកបែបនេះទៅដើម្បីបានប្រាក់ចំណេញសម្រាប់ចិញ្ចឹមគ្រួសារ ។ តែថ្ងៃខ្លះក៏ស៊យត្រូវសមត្ថកិច្ចចាប់ឃាត់ដូចថ្ងៃហ្នឹងចឹងទៅ ។ តែគាត់ថា ចាប់លើកនេះទៅគាត់រាងផ្អាកដឹកច្រើនបែបនេះទៀតហើយ ៕
ចែករំលែកព័តមាននេះ